¹ Avo eto nango orere to athithi peimi eto ketora avo mane toaro pambati uja ² Eto pine akari era anera mi era avo aro thumotha eto ke pe ari ati uja eto avo eto samuna eto peveie oa avo memekame humbati oa. ³ Eto nango kosari peimi avokito kia sirako atora amomo reki jigato pambati ore? Eto kosari Bada Jesu ta evire, iji mauha te ari ingeri ra Bada Jesu mi eto haing tari ra Bada ta ke ingeri embo meni ami. ⁴ Mama peimi ta ke hakarika te keri eni eto ara-ira ivo te avo Mama ta ahihi otofu pure evo amita uje avo. ⁵ Eto evi anera ta manera Mama ari embo mi anera umo ambota avo ijeka hijetura hijou vuvureti uja, ari evire angato era. ⁶ Embo emomo amunture, eto embo amomo othemba othemba mo ove? Eto nimo embo amomo overe orera mo oe. ⁷ Mama, nine embo ehe meni isoho sira eto anera ta thembai eto ungata auma operi eto otofu ari hije turihuja. ⁸ Bada, nine tonda pitapa ta avo nio theiki thembai hijou. Eto tonda ijeja katheka atoa avo Mama mi meni Jesu mi tonda amutu kathekena avo Mama mi mane katheka uja. ⁹ Rate nango eha keti ora, Bada Jesu, nimo nuha veto meni isoho sira eto anera angoto iji tufo pe ami, nimo Mama ari embo amita operi te otofu te ami ombuto humbuna, amita pe avo nangota samuna amita ambureti vuvuna. ¹⁰ Eto Jesu ta iji pe ami tonda pitapata avo ehei irerembena. Eto Mama mi tonda petapa avo operi ami ombuna hijina, tofota meme te osaga ta iji te, ehe ikiri kena. ¹¹ Eto reki tho eni, avo akari humbati uja avo susu pe ra. Amita pe avo, meni avo enso hoi uja avo mekeri mane ra. ¹² Eto Bada Jesu mi ija nio javo avo Jesu ke ija namo ningota javo avo hijono ithare pe ai fietuja, nau nane nameni, namo ningo kao haveni ati ona, jo ai tapata ari ai. ¹³ Eto thoro javo nio avo maha angato thumotha ue mehentona, "Eto kijo, namo emara, eto memeni Mama mi nanae hijina." ¹⁴ Avo eto meni mi ando te sasa te avo mine, hija ena, eto angari angato ambure ami tonda petapa ivo avo tufei mihae aja, sova avo mihae aja. ¹⁵ Ari evi, ambureta ahihi samuna joru ahihi amita pure embo ue amiha avo katheka tora eto ejefa are. ¹⁶ Avo embo, anera kao mane are, rate Mama ta meni nuha pe ungai fietuja, Abraham ta ve ami kao tapa ai pambati uja. ¹⁷ Avo eto reki eni re, anita ane nameni iji pitapa ami reki thoeni eto Jesu jo ari eto Mama ta tonda tofo pe avo humbati uja avo jene ai jeneta uja. Avo eto embo ta samuna ta mine orembeto humbuna. ¹⁸ Eto Mama ta meni nimo nuha pe ami enda embo ta samuna ta meme, osaga te avo engeka ari umbuna eto angato enda embo ta engari avo orembeto humbuna.