¹ Bena ere badana ta dubu helaga lalona amo na kamonai, aneru hahituosi e hamaorodia, eto, Aola, Dirava ena badu ai e honumu kibodia auhituosi na tanobada ai ba bubu dobi. ² Aneru gini gunana ela, ena kibo tanobadai e bubua. Bena dagedage gauna eabia bona laulauna e toma henia diho taudia ediai toto badadia mai hisidia eha dudu. ³ Aneru iharuana ena kibo davarai e bubua, mase tauna rarana hegeregerenai ela, bena davara lalonai e noho gaudia iboudiai vada e mase. ⁴ Aneru ihatioina ena kibo na sinavai ai bona ranu lhilohi gabudiai e bubua, bena rara ai ela. ⁵ Bena ranu ilohidia aneruna erena na kamonai, eto, Helaga Diravana e, onohova, onohomu. Ini ohahemaoro henidia tomamu na mamaoro. ⁶ Badina be helaga taudia bona peroveta taudia raradia e bubudia bena rara ohenidiamu, bae inu, edia kara hegeregerena. ⁷ Ere ta ma pata helagana amo na kamonai eto, Lohiabada Dirava e siahu idoinai Diravana momokani, emu hahemaoro na momokani bona maoromaoro. ⁸ Aneru ihahanina ena kibo na dina latanai e bubua, bena e hasiahua taunimanima baine aradia, lahi na heto. ⁹ Bena siahu badana ese taunimanima e aradia, idia ese haheisi e biagudia Dirava na ladana e uduguiraia asie helalokerehai bona asie heatolaia. ¹⁰ Aneru iha-imana ena kibo na dagadage gauna ena terona latanai e bubua, bena ena basileia e hadiburaia, taunimanima maladia e kori, hisihisi dainai. ¹¹ Bena Guba Diravana na e uduguiraia edia hisihisi bona edia toto daidiai asie helalokerehai bona edia kara dika asie rakatani. ¹² Aneru ihatauratoina ena kibo na sinavai badana, ladana Eufrate lalonai e bubua, ranuna e kororo, mairiveina kahana hanuadia pavapavadia edia dala e lailaia. ¹³ Vada na ita, lauma dikadia tatoi, paroparo na heto, huala bona dagedage gauna uduna amo bona peroveta koikoi tauna uduna amo e lasi. ¹⁴ Idia na lauma dika hereadia, hoa karadia e karamu bona tanobada idoinai hanua pavpavadia e lao henidiamu, eha goadadiamu, siahu idoinai Diravana ena dina badana tuarina dainai. ¹⁵ A itaia, henao tauna na heto be vasimu, Hegima tauna, ena dabua e abi hegaegaemu, asi ramina baine loa ena hemarai baine hedinarai na garina, ia hari namo. ¹⁶ Bena lauma dikadia ese e gogodia gabu ta ai, ladana Heberu Gadodiai be Aramagedono. ¹⁷ Aneru ihahituna ena kibo na guba padanai e bubua, bena guba dubana teronana amo ere badana ta e lasi, eto, vada e ore. ¹⁸ Kevaru, ere bona guba rahu e vara. Tano e laga bada, taunimanima tanobadai e noho matama ai ema bona harihari tano na unu se laga toma. ¹⁹ Bena hanua badana e parara, karoa toi, bese idau-idau edia hanua logora e hegigi dobi, bona Dirava ese Babulonia badana e laloa ena badu garagarana keherena e henia, ena badu vine-ranuna baine inua ore. ²⁰ Motumotu iboudiai e heau boio ororo na lasihidia. ²¹ Medu hetaridia badadia, edia metau na pound sinahu ta mai dikoana, na guba amo e moru taunimanima latadiai. Bena taunimanima ese Dirava e uduguiraia, medu-hetari hetari dainai, badina be ena haheisi na bada herea. Translation done by: Mrs Konio Kila on Sunday 17th November, 2023, time: 2.35 pm, ready for quality checking.