¹ idia vada ema davara unu kahana ai, Garasa tanona ai e kau. ² Iesu vanagi amo e dihovai, lauma dikana ese e boloa tauna ta ena gara amo e raka lasi ia dekena ela. ³ Tauna na gara gabunai e nohova. Tau ta ese ma basine guia lou diba bona auri iguidia danu dia hegeregere. ⁴ Ia na nega momo vada e guia aena auridia bona auri iguidia amo. Ia ese iguidia eha motuva bona aena auridia danu e hamakohidia rohorohova. Tau ta asi goadana ia baine hamanadaia. ⁵ Hanuaboi bona daba iboudiai gara bonna ororo lalodiai, ia na e tai lolova bona nadi mai matadia amo sibona e heivava. ⁶ Bena ia ese Iesu daudauna ai e itaia neganai, ia ese e heau henia bona vairanai e tomadiho henia. ⁷ Ia na mai tai lolona ida, e tomava, "Lau be vada dahaka baina kara oi emu ai, Iesu, Dirava Herea Mikamika Natuna, a? Lau na Dirava sibona dainai na noimumu, asi o hahisihisigu." ⁸ Badina ia ese vada e hereva heniava, e tomava, "Lauma dikana, tau ena amo a raka lasi," ⁹ Ia ese e nanadaia, etomava, "Oi ladamu be daika, aha?" Ia ese e haere henia, etomava, "Lau ladagu na Legiona (Lepeona), badina ia na hutuma. ¹⁰ Ia ese ma e noia loulouva una tano amo basine siaidia lasi. ¹¹ Harihari boroma momo be unuseni ororo ai e anianiva, ¹² bona idia ese e noia, e tomava, "Asiamai boroma lalodia baia vareai; idia lalodiai aita vareai." ¹³ Bena ia ese vada e siaidia, lauma dikadia e rakalasi bona boroma lalodiai vada e vareai, bona idia vada ororo amo mai tata siahudia ida davara lalonai e diho, bona boroma daha rua hegeregerena davara ai e maloa. ¹⁴ Bena unu boroma e ubudiava taudia vada e heau ela hanua lalodiai bona uma gabudiai e varava gaudia haripiudia e karadia, bona taunimanima vada ela e varava gaudia bae itadia totona. ¹⁵ Bena idia ema Iesu dekena bona lauma dikana ese e boloa tauna e itaia, lauma dikadia logora ese e boloa tauna, unuseni ai helai, e hadabuaia bona lalona vada e maoro; bona idia na e gariva. ¹⁶ E vara karadia e ita taudia ese lauma dikana ese e boloa tauna sivaraina idoinai e hamaorodia bona idia ese boroma sivaraidia danu e hamaorodia. ¹⁷ Bena idia ese e noiava edia tano amo baine raka oho. ¹⁸ Ia na vanagi ai e guiva neganai, lauma dikana ese e boloa tauna e noinoi ia ida bainela. ¹⁹ A Iesu ese e gwauatao, a e hamaoroa eto, "Aola emu ruma bona emu taunimanima dekedia bona ba hamaorodia Lohiabada ese oi be dahaka eme kara henimu, bona ia ena hebogahisi oi emu ai." ²⁰ Una dainai, ia vada ela bona Iesu ese kara badadia e kara henia na e harorolaiava. Hanua gwauta (Dekapolis) tanodia ai, bona taunimanima iboudiai vada e hoa. ²¹ Hari Iesu, vada vanagi amo ma e lou lao gohu kahana neganai, hutuma bada ese kone ai ma e ginia hegege. ²² Bena dubu hegunalai tauna ta, ladana Iairo, ema, bona ia e itaia, aena badinai e goru diho. ²³ Ia ese e noia loulouva, e tomava, "Natugu kekenina vada be masemu. Na noimumu aoma bona enai ba daukau bena ia na baine namo bona baine mauri. ²⁴ Bena ia na ia ida ela bona hutuma bada ese e gavadia bona muridiai e raka hesede-hesedeva. ²⁵ Hari hahine ta unuseni ai na rara-moru gorerena e hakaua lagani gwauta-rua. ²⁶ Ia na e hisihisi bada muramura taudia edia amo bona ena moni iboudiai vada e haoredia, a ena gorere na se namova a e bada e laova. ²⁷ Ia ese Iesu sivaraina vada e kamonaia neganai, ia na ia murina amo ema hutuma bogaragidiai bona ena dabua ai e daukau. ²⁸ Badina ia na e tomava, "Bema lau ese ena dabua ai mo baina daukau, lau na baina namo." ²⁹ Ia ese e dogoatao neganai, rara-moru vada e doko, bona tauaninai mamina eabia, ia na ena gorere amo vada e namo. ³⁰ Iesu na una horai sibona e diba siahu na ena amo vada e lasi. Ia na hutuma bogaragidiai e roha kerehai bona eto, "Daika lau dabuagu ai eme daukau, a?" ³¹ Ena hahediba e haere eto, "Hutuma e raka hesede-hesedemu be o itadiamu, bona oi be o tomu, 'Daika ese eme daugu toho, a?" ³² A Iesu na e roharoha daika unu e kara toma na baine itaia. ³³ Hahine, mai dibana dahaka enai e vara, vada e gari bona e heude-heudeva. Ia na ema bona ia vairainai e goru diho bona hereva momokanidia e hamaorolaia. ³⁴ Ia ese e hamaoroa, eto, "Natugu e, emu abidadama ese vada eme hanamomu. Mai mainomu ida aola bona emu gorere amo ba namo vaitani." ³⁵ Ia dounu e herevava ai, taunimanima haida dubu e gunalaimu tauna ena mo ema, e tomamu, "Natumu kekenina na e hamase. Dahaka dainai hahediba tauna doini o hametauamu, a?" ³⁶ A Iesu ese edia hereva e kamonai neganai, ia ese dubu igunalaina tauna e hamaoroa, eto, "Asio gari. Bavabidadama mo." ³⁷ Ia na seura haida ese bae bamoa, a Petero, Iakobo, bona Ioane, Iakobo tadikakana, sibodia ese e bamoa. ³⁸ Idia ema dubu igunalaina tauna ena ruma bona unuseni ia ese taunimanima e itadia rege bada herea e karava; idia na e taiva bona e tai lolova. ³⁹ Ia ruma ai e vareai neganai, ia ese e hamaorodia, eto, "Dahaka dainai o lalo hisihisimu bona dahaka dainai o taimu? Kekeni na se mase a e mahutamu." ⁴⁰ Idia ese e kirikirilaia. A ia ese iboudiai murimuri ai eatodia bona kekeni tamana bona sinana bona ia e bamoa taudia mo eabidia, bona ia ida e vareai kekeni ena hekure gabunai. ⁴¹ Ia ese kekeni imana ai eabi bona e hereva henia, eto, "Talita Kumi! Anina be etomu, "Kekeni Kekeni e, na haganimumu, a tore-isi." ⁴² Kekeni vada e toreisi bona e raka (badina ia laganina na gwauta-rua). Idia iboudiai e hoa dikadika. ⁴³ Ia ese e tamanudia ini e vara karana na ta basine diba. Bena ia ese vada e hamaorodia kekeni gau ta ba henia baine ania.