¹ Dina haida vada ela ia na Kaperanauma e lou lao, bena harina e piua ia na ruma aia. ² Bena hutuma e raka ela bona ruma lalonai gabu ta lasi, iduara badina danu asi gabuna. Bena ia ese e haroro henidia. ³ Bena tatau hahani ese pada tauna ta na ia dekena e huaia lao. ⁴ a hutuma daidiai asi edia dala Iesu dekena bae kahilaia lao. Una dainai, ia gini gabuna daenai idia ese guhi e giua oho, bena pada tauna mai gedana ida e tua dobi vairanai. ⁵ Iesu ese edia abidadama e itaia, bena ia ese pada tauna e hamaoroa, eto, Natugu e, emu dika vada eme hegwau tao. ⁶ A itorena taudia haida unuseni ai hehelai, lalodia ini e hadai tomava, ⁷ eto, Badina be dahaka ina tau unu e hereva tomamu? Ia ese Dirava se matauraiamu, Daika ese dika baine gwau tao? Dirava mo sibona. ⁸ Iesu dibana idia na unu e helalo tomava, bena e nanadaidia, eto, Badina be dahaka lalomui ene o hadai tomamu? ⁹ Edena be haraga, pada tauna na hamaoroa, nato "Emu dika vada eme hegwau tao", eiava bama toma "A gini tore, emu geda a lokua, a raka"? ¹⁰ A baina hadibamui Taunimanima Natuna na mai siahuna dika baine gwau tao ina tanobada ai, (ia ese pada tauna e hamaoroa eto), ¹¹ A gini tore, emu geda a lokua emu ruma vada aola. ¹² Bena ia na e gini tore, ena geda e lokua, idia vairadiai e raka lasi. Iboudia ai e hoa, Dirava e imodaia, eto. Ini hetomana ta asi ta itaia. ¹³ Ia na kone ai ma e lasi; hutuma ia dekena ela bena ia ese e hadibadia. ¹⁴ Raka hanaina ai, ia ese Levi Alfeo tax gabunai helaina ai e itaia bena e boiria eto, murigu ai a raka. Bena e tore isi ia murinai e raka. ¹⁵ Iesu na Levi tauna ena ruma ai e aniani, bona tax gogo taudia iboudiai, kara dika taudia diagau danu, Iesu mai ena hahediba ida ege diho, badina be hutuma na ia murinai e raka. ¹⁶ Itorena taudia, Farisea edia orea amo, e itaia, ia na kara dika taudia bona tax gogo taudia ida e aniani hebouva, bena idia ese ena hahediba e nanadaidia, eto, Ia na dahaka dainai tax gogo bona kara dika taudia ida e aniani heboumu? ¹⁷ Iesu e kamonai, bena e hamaorodia, eto, Goada taudia ese muramura tauna basie tahua, a gorere taudia hari, lau danu nama, dia kara maoromaoro taudia iboiridia totona, a kara dika taudia hari. ¹⁸ Ioane ena hahediba bona Farisea edia hahediba edia anivaga ta ai haida ese Iesu e nanadaia, eto, Dahaka dainai Ioane bona Farisea edia hahediba e anivagamu, a oiemu hahediba na asie anivagamu? ¹⁹ Iese e haere, eto, Headava matamata tauna na turana dekediai be bae anivaga a? Lasi, headava matamata tauna na dekediai noho, idia na basie anivaga. ²⁰ A negana baine gini dae, headava matamata tauna na edia amo baine heabi oho una negana ai bae anivaga. ²¹ Dabua matamatana kopi gunadia ai basie banilaia. Unu bema kara toma, e banilaia seana na dabua gunana amo bema hedare oho, bona hedarena bema bada. ²² Vine ranuna matamata na kopi gunadia ai basie vedaia. Unu bema kara toma, vine ranuna matamatana ese kopi gunadia bema hapou; bena vine ranuna bona kopi bema dika hebou. ²³ Dina Helaga ta ai, ia na uit umana ta e raka hanaiva ai, ena hahediba na rakadia ai uit e burukiva. ²⁴ Farisea taudia ese e nanadaia, eto, Idia dahaka dainai hegwau-tao dina helaga ai e karaiamu? ²⁵ Ia e haere eto, Nega ta asio duahia, a, Davida ena kara ta, e hitoloa negana ai, ia mai bamona ida? ²⁶ Dirava ena ruma ai e dae kau, Abiata hahelaga tauna negana ai, bena pata helagana amo malamala e abia, e ania, bona bamona e henidia, a una malamala na e helaga vaitani, hahelaga taudia mo adia. ²⁷ Ma eto, Dina Helaga e karaia taunimanima edia, dia taunimanima Dina Helaga ena. ²⁸ Una dainai, taunimanima natuna na Dina Helaga biaguna.