¹ Iesu na unu hereva iboudiai eore, bena ia ese ena hahediba e hamaorodia, eto, ² Dibamui vainana-negai lagau-hanai ariana bae karaia, una neganai Taunimanima Natuna taona bae torea bae hasatauroa. ³ Bena hahelaga taudia, bona hanua tau-badadia ese hahelaga tauna badana, ladana na Kaiafa, ena ruma ai e hebou. ⁴ E henega, dibaka karadia amo Iesu bae dabaia tao bae alaia mase eto, ⁵ To idia eto, dia aria dinadia ai, aru taudia bae helogo-helogo na garina. ⁶ Iesu na Betania ai, Simona, lepera tauna, ena ruma ai. ⁷ Bena hahine ta ia dekena ela, nadi kavabuna ta e abia kau, lalonai na dehoro namo hereana, davana bada gauna: Bena Iesu egedihona ai hahine ese dehoro e horolaia. ⁸ Ena hahedia ese e itaia, bena e badu, eto, dahaka dainai ina dehoro e negea kavamu? ⁹ Bema hoia, moni dia gau bema abi, bena ogogami taudia bema henidia. ¹⁰ Iesu na dibana, bena e hamaorodia, eto, dahaka dainai o maumau heniamu. ¹¹ Ogogami taudia be nega idoidiai dekemui ai nonoho. Bena ba ura negadia ai vada baha namodia. A lau be nega idoidiai basina noho. ¹² Ina dehoro amo taugu vada eme dahua hegaegae, igurigu totona. ¹³ Na hamaoromui momokanimu, ina sivarai namona bae harorolaia gabudia iboudiai tanobada hegege-madai. Hari eme karaia karana bae gwauraia ia ihelalolaina. ¹⁴ Bena gwauta rarua tauna ta, ladana na Iuda Isakariota, hahelaga taudia dekedia ela. ¹⁵ Eto, taona bama torea, dahaka boma henigu. Bena idia ese siliva monidia toi-ahui e henia. ¹⁶ Una negana ela ia ese taona itorena negana namona e tahuava. ¹⁷ Asie hatubua flaoana ariana dinana gini-gunana, Ahedibana Iesu dekena ela. E nanadaia , eto, edeseni ai lagau-hanai baia karaia hegaegae bena bavania. ¹⁸ Bena ia na e haere, eto, hanua aola, tau ta dekenai ba hamaoroa, baoto, hahediba tauna na e tomu egu nega vada eme kahikahi egu hahediba ida lagau-hanai na emu rumai baia ania. ¹⁹ Bena hahediba na Iesu ese e hamaorodia hegeregerena e karaia, lagau-hanai ariana vada e karaia hegaegae. ²⁰ Adorahi ai, ia na ena hahediba gwauta-raruosi ida e ege diho. ²¹ Bena e anianiva negana ai ia eto na hamaoromui momokanimu, umui ta ese taogu baine tora. ²² Idia na lalodia e hisihisi, bena ta ta ese e nanadaia, eto, Lohiabade e, ina lau a? ²³ Ia e haere, eto, lau ida nau tamona ai adau dobimu tauna ese lau taogu baine torea. ²⁴ Taunimanima Natuna vada be laomu, e tore laia hegeregerena, A taunimanima Natuna taona itorena tauna madi ihabaina, una tau basinema vara hari namo. ²⁵ Bena Iuda, tao-tore tauna, ese e nanadaia, eto hahediba taumu, ina lau a? Iesu eto, o ena vada o gwaumu. ²⁶ Idia na e anianiva lalonai, Iesu ese flaoa atagana ta e abia, e hanamoa bena e bitua, ena hahediba e henidia, eto, avabia avania, lau taugu binai. ²⁷ Ma kehere ta ea baia, e hanamoa, e henidia eto iboumui ai a inua; ²⁸ Badina be ina na lau raragu, herohemaino rarana, hutuma daidiai baine hebubu, dika igwautaona. ²⁹ Na hamaoromuimu, vine ranuna do basina inua lou, ela bona dinana baine kau lau umui ida matamatana baita inua Dirava ena basileia lalonai. ³⁰ idia na ane e abi vaitani, bena e didi lasi, olive ororona ela. ³¹ Bena Iesu ese e hamaorodia, eto, iboumui ai lau daigu ai ba hekwakwanai badina be ini e torea toma. Mamoe iregudia tauna baine gwadaia bena mamoe vada bae karoho. ³² A lau baina tore isi lou, bena baina gunalaimui Galileia ai. ³³ Petero ese e haere henia, eto, ena be taunimanima iboudia ai oi daimu ai bae hekwakwanai, to lau na lasi. ³⁴ Bena Iesu ese e hamaoroa, eto, na hamaoromui momokanimu, hari ina hanuboi, kokoroku do basine tai oi ese hatoi lau ba goregu. ³⁵ A Petero eto, ena be oi idia baita mase hebou, to lau oi na basina goremu. Ena hahediba iboudiai danu unu mo e gwau toma. ³⁶ Iesu na idia ida gabu ta ai e lasi, ladana Getesemane bena ia ese ena hahediba e hamaorodia, eto, iniseni ai ba helai: lau do baina ha guriguri. ³⁷ Bena ia ese Petero bona Sebedeo natuna raruosi e hakaudia siri, bena laumana e daure, darana e doko. ³⁸ Bena e hamaorodia, eto, lau na lalogu eme hisihisi bada, mokona name mase: iniseni ai ba noho, baita gima. ³⁹ Taina ma e raka lao, bena tano ai e goru parapara, e guriguri, eto. Tamagu e, bema mai dalana ina kehere na egu amo boma abia oho: to dia lau egu ura, oiemu ura hari. ⁴⁰ Ena hahediba dekedia e lou lao, mahutadia ai e davaridia bena ia ese Petero e gwau henia, eto, be asi goadamui hora tamona mo lau ida baitama gima a? ⁴¹ Ba gima, ba guriguri hedibagani ai ba vareai na garina. Laumana na e uramu a tauanina na eme manoka. ⁴² Nega iharuana ma e raka lao, eha guriguri, eto, Tamagu e, ina kehere iabi-ohona readia asi dalana dahaka, ela bona baina inua; emu ura baine guguru. ⁴³ Ma e lou lao dekedia, mahutadia ai ma e davaridia, badina be matadia e mahutava. ⁴⁴ E rakatanidia, e lou ela, nega ihatoina ma eha-guriguri, ena guriguri herevadia gunadia ma e gwaurai lou. ⁴⁵ Ma e lou lao, ena hahediba dekediai e hamaorodia, eto, madi vada a mahuta, lagamui avani vadaeni, negana vada eme kahira-kahira Taunimanima Natuna na dika taudia imadiai be atoamu. ⁴⁶ Be, o tore, aitala, taogu itorena tauna na e maimu. ⁴⁷ Ia dounu e herevava ai, Iuda, gwauta-rarua tauna ta, e gini dae, hutuma bada ida, mai edia dare bona mai edia kareva: Hahelaga taudia bona hanua tau-badadia ese e siaidia taudia bunu. ⁴⁸ Tao-tore tauna ese toa ta e henidia guna, eto, baina harahua tauna gauna bunai: ba dabaia tao. ⁴⁹ Bena ia na Iesu dekena e raka kahi lao, eto, hahediba taumu e, ba mauri, bena e harahua. ⁵⁰ Iesu ese e hereva henia, eto, henamo e, ikarana totona oma, karana vada a karaia. Bena idia ese Iesu imadia ai e dau henia, e dabaia tao. ⁵¹ Iesu ena orea tauna ta ese imana e dau tari ena dare e veria lasi hahelaga tauna badana ena hesiai tauna ta e taraia, taiana e utua oho. ⁵² Bena Iesu ese e gwau henia, eto, emu dare na gabuna ai avatoa lou. Badina be dare e abi taudia iboudia ai na dare amo do bae mase. ⁵³ Emu lalo-hadai be lau asi siahugu a, Tamagu bama noia bena ia ese aneru oreadia gwauta-rua, ma haida bema siaidia lau idurugu. ⁵⁴ To unu bema heto, revareva helaga na ede bema momokani toma. Vada e torea ini baine hekara toma. ⁵⁵ Una negana ai Iesu ese hutuma e gwau-henidia, eto, umui na mai daremui bona mai karevamui ida lau idabai-taogu oma. Dadidadi tauna idabai taona boma mai na heto. Dina iboudiai lau na dekedekemui ai na helaiva bona na hahedibava, dubu helaga lalonai, to asio dabaigu tao. ⁵⁶ A ini gau iboudiai vada e vara, peroveta taudia ese e tore herevadia ihamomokani laidia bena ena hahediba iboudiai ese e heautania. ⁵⁷ Bena Iesu e dabaia tao taudia ese hahelaga tauna badana Kaiafa dekena e dabuia lao. Unuseni ai itorena taudia bona hanua tau-badadia vada e hebou. ⁵⁸ Petero ese e gavaia, to mai padana, ela bona hahelaga tauna badana ena ruma maguna lalonai e raka vareai hesiai taudia ida e helai hebou. Una kara dokona be dahaka baine e ita eto. ⁵⁹ Bena hahelaga taudia bona kaunsil taudia iboudiai ese hahebade koikoi taudia e tahudia malaka-malaka ialana badina bae davaria eto. ⁶⁰ Hahebade koikoi taudia diagau e toreisi to ialana badina ta asie davaria ela bona koikoi taudia rarua ma e toreisi, eto, ⁶¹ Ina tau e hereva, eto, lau na mai siahugu Dirava ena dubu helaga baina rohoa, bena dina toi muridiai ma baina haginia lou. ⁶² Bena hahelaga tauna badana e tore isi e nanadaia, eto, oi so herevamu a? Ini edia hahebade herevadia be dahaka? ⁶³ A Iesu na asi regeregena, bena hahelaga tauna badana ese ma e hereva henia, eto, mauri Diravana ladana ai na haganimumu: A hamaoromai, oi na Keriso, Dirava natuna, eiava? ⁶⁴ Iese ese e haere henia, eto, o ena vada o gwaumu. Ina danu ma aina hamaorolaimui: Taunimanima Natuna do baitaia, siahu imana idibana ai baine helai bona guba oridia ai bainema. ⁶⁵ Bena hahelaga tauna badana ese sibona ena dabua e darea, eto, Dirava ihadikana herevana vada e gwauraiamu, ma dahaka hahebadena ta tahuamu a? Dirava ihadikana herevana vada eme gwauraia ome kamonai. ⁶⁶ Dahaka o tomamu? idia e haere, eto, baine mase hari namo. ⁶⁷ Bena idia ese ia vaira huahuana e kanudia e tutua e pataia ahu bena eto, ⁶⁸ Keriso e, a hamaomai, daika ese e tutumumu. ⁶⁹ Petero na murimuri ai, magu lalonai e helaiva bena hesiai hahinena ta dekena ela, eto, ina oi danu Iesu, Galileia tauna o bamoava ani? ⁷⁰ To ia na iboudiai vairadiai e hegore, eto, emu hereva na lalogu seme parara. ⁷¹ Ia na e raka oho, ela ikoukou badibadinai, ma hahine ta ese e itaia bena dekedekena taudia e hamaorodia, eto, ina tau danu Iesu Nasareta tauna e bamoava. ⁷² Bena ia ere dika, e hegore lou, eto, una tauna asi dibagu. ⁷³ Asi vanahana una gabu ai e gini taudia na Petero dekena ela, eto Momokani, oi na idia ta badina be gadomu ese e hahedinaraimumu. ⁷⁴ Bena sibona vada e heuduguirai, ere dika, eto, una tau lau asi dibagu, bena kokoroku vada e tai. ⁷⁵ Bena Petero ese Iesu e gwauraia herevana vada e helalolaia une, eto, kokoroku do basine tai, oi ese hatoi ba goregu, bena e raka lasi, e tai dika dika. Translation done by: Dk. Karoho Kila on Wednesday (19/07/23), time: 4.17 pm. Ready for quality checking.