¹ Iesu na dubu helaga amo e raka lasi, bena ena hahediba ia dekena ela dubu helaga rumadia e duanai. ² Iesu ese e hereva henidia, eto, ini gau o itamu a? Na hamaoromui momokanimu, nadi ta nadi ta latanai basine mia, iboudiai bae hegigi dobi ³ Ia na Olive orornai e helai, ena hahediba ia dekena ela, e hereva henia hehuni, eto, Mani a hamaoromai hari gau be edena hora bae vara? Oi ba lou mai, tanobada dokana bona toadia be dahaka? ⁴ Iesu ese e haere henidia, eto, nahuamui ba toho, tau ta ese baine koimu na garina. ⁵ Badina be hutuma lau ladagu ai baema. Baeto, 'lau bina Keriso,' dia gagadoi bae koidia. ⁶ To umui ese tuari haridia bona tuari badadia ba kamonai, lalomui basie daradara. Ini do bae vara guna, a dokona be vairai. ⁷ Badina be bese ta, ta bae heala heheni, bona basileia ta ta ida bae tuari. Doe bona tano-marere bae vara gabu ta ta lalodiai. ⁸ To ini gau iboudiai na mara hisihisi na matamana mo. ⁹ Una negana ai taomui bae tore, bona bae alamui mase. Bae inai henimui bese iboudiai ese lau ladagu dainai. ¹⁰ Bena bae hetao tore heheni bona bae heinai (heiri-heiri) heheni. ¹¹ Peroveta taudia koikoidia diagau danu bae toreisi hutuma bae koidia. ¹² Kara havara danu bae vara rohoroho, bena diagu edia lalokau do baine keruma. ¹³ A baine haheauka ela bona dokona tauna na do baine mauri. ¹⁴ Basileia sivaraina namona na tanobada idoinai bae harorolaia, bese iboudiai ihadibalaidia, bena dokona vada baine kau. ¹⁵ Badina umui ese gau dika rohorohona, hekohu tania badina, Daniela peroveta tauna ese e hereva laia gauna, ba itaia, basinema gini gabuna ai do baine gini. ¹⁶ Iudea ai bae noho taudia na ororo bae heau lao. ¹⁷ Bona ruma guhina ai baine helai tauna na ruma lalonai basine raka vareai, ena kohu basine abi. ¹⁸ Bona uma ai bae noho taudia na ororo bae heau lao baine gaukara tauna danu ena dabua iabina basine lou lao. ¹⁹ Una neganai rogorogo hahinedia bona mara roto hahinedia madi ihabaidia. ²⁰ Ba guriguri, keru neganai eiava dina helagai na basio heau. ²¹ Badina be unu dinadiai hisibada herea bae vara, Dirava ese tanobada e karaia negana amo hisi unuhetomadia asie vara ema bona harihari, gabeai unu hetomana ta basine vara lou. ²² Unu dinadiai na basine gadoi, taunimanima ta basine mauri diba, to eabidia hidi taudia daidiai unu dinadiai do baine gadoi. ²³ Una neganai ta baineto, a itaia, Keriso eiava? Umui basio kamonai. ²⁴ Badina be Keriso koikoidia bona peroveta taudia koikoidia bae tore is toa bona hoa gaudia bae hedinarai, e abidia hidi taudia ihahekwakwanai dia. ²⁵ Ba laloa tao, vada na hamaoromui gunamu, ²⁶ Una dainai, bae hamaoromu baeto, 'Aitaia, ia na tano gagaena ai,'to basiola, eiava' aitaia, ia na daiutu lalonai, to basio kamonai. ²⁷ Badina be kevaru na heto dina dae kahana amo e kevarua isimu ela bona dina diho kahana ai e hedinaraimu, Taunimanima Natuna bainema danu unu baine heto. ²⁸ Badina be mase tauanidia e miamu gabuna ai galo bae hebou. ²⁹ Una dikadika baine ore murinai dina do baine dibura, hua danu basine tara, hisiu guba amo bae moru, bona guba siahudia bae heude-heude. ³⁰ Bena Taunimanima Natuna toana guba ai baine hedinarai, una negana ai tanobada besedia iboudia ai bae tai, badine be Taunimanima Natuna bae itaia, ori latanai bainema, mai siahu badana bona mai hairana ida. ³¹ Bena ia ese ena aneru baine siaidia, kibi regena badana ida e abidia hidi taudia lai haniosi gabudia amo, bona tanobada dokona ela bona guba dokona amo, bae gogodia ³² Palabore herevadia amo ba diba, tuhutuhuna amo e varamu, rauna e papamu, vada ba diba lahara be kahira-kahiramu. ³³ Badina bunai umui danu ini gau bae vara ba itadia bena ba diba ia na eme kahiria-kahiria, iduara badibadinai. ³⁴ Na hamaoromui momokanimu, ina uru basine ore ela bona ini gau iboudia ai bae vara. ³⁵ Guba bona tanobada bae ore, a Dirava ena hereva na basine ore. ³⁶ Una dina, bona hora, ta asi dibana, guba anerudia danu asi dibadia, natuna danu asi dibana, Dirava sibona mo dibana. ³⁷ Noa negana hegeregerena, Taunimanima Natuna ena mai negana ai unu baine heto. ³⁸ Badina una negana ai abata do se kau ai, idia na e anianiva, e inuinuva, e headavava, ema bona Noa lagatoi ai e gui. ³⁹ Matadia asie kani ema bona abata e utu dae bena iboudiai e mase. ⁴⁰ Una neganai rarua-rarua bae noho, ta baine hekoko, ta baine noho. ⁴¹ Hahine rarua uit igwadana nadina bae giroa, ta baine hekoki, ta baine noho. ⁴² Ba gima, badina be emui Lohiabada bainema negana asi dibamui. ⁴³ Ina, ba diba, ruma biaguna na bema diba guna edena negai henao tauna bema mai, ia na bema hegaegae, bena ena ruma basinema darea. ⁴⁴ Bena umui danu ba hegaegae, badina asi dibamui horanai, Taunimanima Natuna bainema. ⁴⁵ Daika be hesiai tauna, kamonai bona kara maoromaoro, ena ruma biaguna bona aniani negadiai memero adia aniani baine henidia? ⁴⁶ Bena biaguna bainema neganai baine davaria unu e kara tomamu tauna be namo. ⁴⁷ Na hamaoromui momokanimu ena kohu idoinai ireguna tauna ai baine halaoa. ⁴⁸ A hesiai tauna dikana lalona baine hadaia, biaguna vada e halahemu. ⁴⁹ Bena ia ese biaguna baine dadabadia, kekero taudia ida baine aniani bona baine inuinu iavara. ⁵⁰ Una hesiai tauna na se laloa dinana ai biaguna baine gini dae. ⁵¹ Bena baine utua sisi, koikoi taudia bogaradia ai gabunai baine henia, unuseniai bae tai, gadigadidia bae hahedai. Translation done by: Dkh. Konio Kila on Tuesday (01/08/23), time: 11.08 pm. Ready for quality checking.