¹ Dina taura-toi muridiai, Iesu ese Petero, Iakobo bona Ioane ia tadina sibodia mo eabidia bona ela ororo ai e dae. ² Ia oromana na e idau idia vairadiai. Ia vairana e hururu-hururu dina na heto, bona ena dabua na e kiama-kiama diari na heto. ³ Bena Mose bona Elia na idia vairadiai e hedinarai Iesu ida e hereva-hereva. ⁴ Petero ese Iesu e haere henia eto, "Lohiabada, ina na herea ai danu iniseni. Bema o uramu neganai, lau ese kalaga au-toi aina karadia iniseni ai, ta oi emu, bona ta Mose ena, bona ta Elia ena." ⁵ Ia na dounu e herevava lalonai ori kiam-kiamana ta ese e govadia ahu bona gado ta ori lalona amo e hereva eto, "Ina na lau Natugu lalokauna, lau ese na lalo-namo heniamu, Ia ba kamonai henia." ⁶ Hahediba memerodia e kamonai neganai, e goru-goru diho, bona e gari bada. ⁷ Bena Iesu na ela dekedia, e dogodia-tao bona eto, "O toreisi bona asio gari." ⁸ Bena matadia e kehodia, to tau-ta asie itaia, Iesu mo sibona e itaia. ⁹ Idia na ororo amo e dihova ai, ia ese eha-ganidia, eto, "Ina mata-hanai ai ome itaia gauna ta basio hamaoroa ela bona Taunimanima Natuna na mase amo baine tore-isi lou. ¹⁰ Ena hahediba memerodia ese e nanadaia, eto, "Benaini, dahaka dainai Itorena taudia na etomu Elia na bainema guna?" ¹¹ Iesu na e haere eto, "Elia na, momokani do bainema guna, bona gau iboudiai baineme atodia namonamo." ¹² "A lau ese na hamaoromuimu, Elia na vada ema, to asio dibaia, lalona amo, edia ura karana ia enai vada e kara henia. Una dala tamona amo Taunimanima Natuna danu idia ese unu do bae hahisia toma. ¹³ Bena hahediba memerodia lalodia na e parara idia na ia ese Ioane Bapatiso e herevalaiava. ¹⁴ Aru taudia hutuma vairadiai, tau ta na ema ia vairanai e goru diho, ¹⁵ bona eto, "Lohiabada e natugu na boma bogaia-hisi badina ia na tororo-tororo gorerena ese e abiamu, bona ena hisi e badamu neganai, nega momo lahi latanai e morumu bona nega momo ranu lalonai e morumu." ¹⁶ Emu hahediba memero dekedia danu na laohaia, to asie hanamoa." ¹⁷ Iesu e haere bona, eto, "Asi emui kamonai bona kara kerere-kerere uruna nega hida lau na umui dekemui name noho, a? "Nega hida umui ida baita haheauka heheni, a? "Mero na a mailaia lau dekegu." ¹⁸ Iesu ese lauma dika na e gwau henia, bona ia ena amo e lasi, bona una hora ai hari mero na e namo guguru ena gorere amo. ¹⁹ Bena ena hahediba memero dia na Iesu dekena ela hehuni, e nanadaia eto, "Dahaka dainai ai ese na asia lulua lasi? ²⁰ Iesu ese e haere hendia, eto, "Emui abidadama na maragi herea dainai. Lau ese na hamaoromui momokanimu, bema umui na mai emui abidadama sinapi nadinadina na heto, ina ororo do ba hamaoroa, ini amo a marere aola unukaha, bona ia do baine marere bona gau ta na dia auka umui emui ai." ²¹ Benaini, ina gau ilulu-ohona na dala tama lasi a guriguri bona anivaga mo." ²² Idia na Galilea ai e nohova lalonai, Iesu ese ena hahediba memerodia e hamaorodia, eto, "Taunimanima Natuna na taunimanima imadia ai do baine henia hanai, ²³ bona idia ese do bae alaia mase bona dina ihatoinai do baine tore-isi." Ena hahediba memero lalodia na e hisihisi bada. ²⁴ Bena idia na Kaperanauma ai e kau neganai, tax gogo tauna na Petero dekena ela, eto, "Emu hahediba tauna ese pene rua tax danu e henimu eiava lasi?" ²⁵ Ia e haere eto "Oibe", Petero na ruma e lou henia neganai, Iesu e hereva matama bena eto "Oi be ede bamona o haeroamu, Simona? Ina tanobada pavapavadia ese be daidia edia amo e gogomu, a?" Natudia edia amo eiava haida edia amo, a." ²⁶ Ia e haere, eto, "haida edia amo." neganai, Iesu ese e hamaoroa eto "Benaini natudia ediai na asi taravatuna!" ²⁷ To una na ita ese tax gogo taudia basie kara dika dainai Aola, davara ai kimai ba tahoa, bona gwarume ginigunana ba veria dae. Gwarume uduna na ba kehoa lalonai pene monina ta ba davaria. Bavabia bona tax gogo tauna ba henia, lau bona oi eda." Translation done and completed by: Ret/Dk. Lohia Gari on Thursday (18/05/23), time: 5.30 pm