1
Lohiamu Teofilo e, ita taunimanima iboudai ese ta abia dae herevadia na e tore.
2
Matadia ai e ita bona matamana amo e harorolai taudia ese e henidava bamona.
3
Badina Lau danu hereva iboudai na tahudia goeva-goeva. Matamanai bena na tomamu namona binai, lau ma baina tore lou oiemu.
4
Bena vada badiba, e hadibamuiva herevadia be momokani.
5
Herod ese Iudea e lohiava negana ai hahelaga tauna ta e nohova ladana na Sakaria. Abia ena orea tauna, adavana be Arona ena iduhu hahinena ladana Elizabeta.
6
Idia raruosi na kara namo taudia Dirava - vairanai, bona Lohiabada ena taravatu ena hahegani iboudiai e badinava, asi bebeka-bebeka dia.
7
A raruosi asi natudia, Elisabeta e gabani dainai, bona raruosi vada e buruka.
8
Dina ta Sakaraia bona ena orea taudia na hahelaga karadia e karava Dirava vairana ai.
9
Bena edia kara hegeregerenai ia na eabia hidi gabu helaga na lalonai muramura mai bonana baine gabua: Bena ia na e raka vareai muramura baine gabua dainai.
10
A taunimanima iboudiai na murimuri ai e noho e guriguri.
11
Una horana ai Lohiabada ena aneru ta e itaia. Muramura mai bonana patana idibana kahana ai e gini.
12
Sakaria ese e itaia, bena kudouna e hetaha, bena gari ese eabia.
13
Bena aneru ese e hereva henia, eto, Sakaria asio gari, badina emu guriguri na e kamonaia, adavamu Elisabeta na natumu ta do baine abia ladana ba hatoa Ioane.
14
Ba moale, ba hisidae, hutuma danu bae moale ia baine vara dainai.
15
Badina ia na Lohiabada vairanai baine herea ia ese vine ranuna bona kekero muramuradia basine inu, bona sinana boganai ia na Lauma Helaga ese baine rohea.
16
Ia ese Isaraela memerodia iboudiai baine girodia Lohiabada edia Dirava bae lou henia.
17
Bona Lohiabada vairanai baine raka, Elia e kara siahuna hegeregerena. Tamadia lalodia bona natudia lalodia ida baine hatamona dia. Gwau edede taudia aonega baine henidia.
18
Sakaria ese aneru e hereva henia, eto, Ina be ede baina diba toma? Lau na iahu: adavagu danu vada e buruka.
19
Aneru e haere ma e hereva henia, eto, lau na Gabriel, Dirava vairanai na gini oi baina hereva henimu bona ina hari namona ihamaorolaimu totona, dainai e siaigu.
20
Benaini asi regeregemu bona basio hereva diba ela bona ina hereva anina baine vara dinana, badina be egu hereva na some abia dae: To, ena nega korikori ai do baine momokani.
21
Taunimanima ese Sakaria e naria mase, bena e hoa, badina be gabu helaga nai e halahe.
22
Bena ia na e raka lasi, to se hereva henidia bena lalodia e parara. Ia na gabu helagana ai vada e mata hanai. Bena ia ese toa amo e hadibadiava ia na se herevava.
23
Ena gaukara dinadia eha guguru bena vada ela ena ruma.
24
Dina gabedia ai, ia adavana Elisabeta vada e rogorogo, bena hua ima e noho hehuni.
25
Eto, Lohiabada ese ini eme karagu toma, ena ura dinana ai eme hageregu. Egu hemarai taunimanima vairadiai eme abia oho.
26
Hua ihatauratoinai, Dirava ese aneru ladana Gabriel e siaia, Galileia hanua na ta ladana Nasareta ela.
27
Haneulato ta na unuseniai, ia na Davida ena iduhu tauna ta, ladana Iosepa, maohenina: haneulato ladana be Maria.
28
Aneru na ia dekenai e raka vareai, eto: Ba namo ba mauri, e lalokau henimumu hahinemu Lohiabada na oi ida.
29
Una hereva dainai ia na e hegonu bona lalona e haguhi una hahenamo anina be dahaka.
30
A aneru ese e hamaoroa, eto, Maria e asio gari badina be Dirava ena harihari bada ome abia.
31
Oi na do ba rogorogo, mero ta bavabia, ladana ba hatoa Iesu.
32
Ia na baine herea dae, Herea Mikamika Natuna bae gwauraia: Dirava Lohiabada ese tamana Davida ena terona na baine henia.
33
Iakobo ena iduhu baine ha lohiaia hanaihanai ena basileia na basine doko.
34
Maria ese aneru e hamaoroa, eto: lau na tau asi dibagu, ina be ede baine vara toma?
35
Bena aneru na e haere, eto: Lauma Helaga na latamu ai baine diho, bona Herea Mikamika ena siahu ese baine hakerukerumu. Bena oiemu amo baine vara merona ia na helaga, Dirava Natuna bae gwauraia.
36
Bena baitaia, oi varavaramu Elisabeta na burukana ai e rogorogo: Ia na e gwauraiava gabani, to ena hua ihatauratoina binai.
37
Badina Dirava enai, gau iboudiai na haharaga.
38
Maria, eto: Lau na Lohiabada ena hesiai hahinegu: Emu hereva dainai egu ai baine vara bena aneru na iena amo e raka oho.
39
Una dinanai Maria e toreisi e raka haraga Iuda ororodia hanua na ta ela.
40
Bena ia na Sakaria ena rumai e dae Elisabeta e hanamoa.
41
Elisabeta ese Maria ena hahenamo herevana e kamonai neganai, na ia bogana e marere: Bona Elisabeta na Lauma Helaga ese e rohea.
42
Bena e hereva lolo, eto: Hahine iboudiai bogaragidiai oi sibomu mo namo herea, bona bogamu anina danu namo herea.
43
Egu ai be dahaka eme vara, bena egu Lohiabada sinana, dekegu vada ema?
44
Badina emu hahenamo regena na taiagu ai eme vareai neganai, natugu na bogagu ai eme marere moale dainai.
45
Abidadama hahinemu, vada o namo: Badina be Lohiabada ena amo o kamonai herevadia na bae momokani.
46
Bena Maria eto, Lau lalogu ese Lohiabada eme imodaia.
47
Bona laumagu ese danu ihamaurigu Diravana eme moale laia.
48
Badine be ia ese ena hesiai hahinena ogogamina e hagerea. Badina bunai ini amo uru iboudiai ese bae hanamogu.
49
Badina be Siahu Diravana ese hoa karadia egu ai eme havara ia ladana na helaga.
50
Ena hebogahisi na uru uru iboudiai ia garina e garimu taudia latadia ai.
51
Ia imana ese ena goada vada e hahedinaraia lalodia e hekokoroku taudia ia ese eha-karoho dia.
52
Bona lohia na edia helai gabudia amo ia ese vada e doridia dobi a ogogami taudia ia ese vada e abidia isi.
53
Hitolo taudia ia ese gau namodia amo bogadia vada e hakunu a taga taudia ia ese ima kavakavadia e halou dia.
54
Ena hesiai besena Isaraela ia ese vada e kahaia ena hebogahisi vada e helalolaiaune.
55
Seneda e gwau henidia hamata hegeregerena Aberahamo mai garana ida do baine bogadiahisi hanaihanai, eto:
56
bena Maria na Elisabeta ida e nohova hua toi. Gabe amo ena ruma e lou henia.
57
Elisabeta ena mara dinana e ginidae, mero ta vada e abia.
58
Bena dekena taudia bona varavarana ese Lohiabada ena harihari bada ienai vada e vara gauna e kamonai, bena idia na ia ida e moale hebou.
59
Dina ihataura hanina ai, idia na mero iperitomena totona e hebou, bena ladana bae hatoa Sakaria tamana ladana, eto:
60
To sinana e haere, eto, lasi, ia ladana na Ioane.
61
Idia eto, be, una na emu iduhu tauna ta ladana a?
62
Bena idia ese tamana e itaia, toa ta e kara henia. Mero ladana ede bae hatoa toma.
63
Ia ese toretore gauna ta e gwauraia, bena ini e torea, ia ladana na Ioane bena iboudiai e hoa.
64
Una horana ai uduna e hagaia, malana danu e maoro bena e hereva Dirava e imodaia.
65
Bena, dekedia taudia iboudiai na e noho gariva badina unu kara haridia na Iudea ororodia hanuadia iboudiai lalodiai vada e piua.
66
Bena e kamonai taudia iboudiai e lalo tao eto, Ina mero na ede baine heto? Badina be Lohiabada imana na ia latanai.
67
Bena tamana Sakaria na Lauma Helaga ese e rohea, bena e peroveta laia eto,
68
Lohiabada, Isaraela ena Dirava aita hanamoa badina be ia ese edia bese taudia vada e vadivadidia bona vada e hamauridia.
69
Hahemauri badina ia ese vada e havaraia ita eda ena hesiai tauna Davida ena iduhu amo.
70
Ena peroveta taudia helagadia ududia amo e gwaurai herevadia na heto, tanobada matamatana amo ema hari.
71
Baine hamaurida, inaida bona e badu henidamu taudia imadia amo.
72
Ia ese ita tamada e bogadia hisi, bona ena gwauhamata helaga na danu e laloa tao.
73
Ita seneda Aberahamo e gwauhamata henia.
74
Ita inaida imadia amo baine hamaurida, eto bena isiaina baita lao henia asi eda gari.
75
Helaga bona maoromaoro ai ia vairanai baita raka eda mauri lalodia ai.
76
Natugu, oina Herea Mikamika ena peroveta tauna bae gwauraimu, badina oina Lohiabada vairanai do ba raka ena dala ba lailaia.
77
Mauri dalana oi ese ena bese ba hadibalaidia edia dika igwau taodia.
78
Eda Dirava ena hebogahisi dainai, daba e reremu na heto, atai amo bainema, baine itada tao.
79
Ba diari; mase laumadia bona diburai e nohomu taudia, ba hadiaridia, bona ita aeda maino dalana ai baine hakauda.
80
Bena hari mero na e bada oho bada oho, bona lalona e goada: bona tano gagaena ai e nohova ema bona Isaraela ediai e hedinarai dinana.