¹ Pura dina gini-gunana ai, Maria, hane magadala, na daba vaburana ai gara ela, bena nadi e itaia gara amo vada e hekei oho. ² Bena e heau lou ela, Simona Petero bona Iesu ese e lalokau henia hahedibana dekedia ela, eto, idia ese Lohiabada na gara amo vada e abia oho, edeseniai e atoa na asi dibamai. ³ Bena, Petero bona hari hahediba ta e raka lasi, gara e heau lao. ⁴ Raruosi e heau hebou, bena hari hahediba ta ese Petero e heautania, iana gara ai e kau guna. ⁵ Bena ia na e igo vareail, dabua aukadia e ita, tano ai e heato, a gara lalonai se raka vareai. ⁶ Simona Petero ese e gavaia, ela gara lalonai e raka vareai. Bena ia ese dabua aukadia e ita, tano ai e heato. ⁷ Bona dabua danu. Iesu kwarana e kumilaia gauna na dabua aukadia ida asi e heato hebou, a idau gabu ai e heloku. ⁸ Bena gara ela guna hahedibana na e raka vareai, e ita bona e abi dae. ⁹ Badina be idia na buka herevana do asie diba, ia na mase amo baine toreisi lou. ¹⁰ Bena hari hahediba na edia ruma e lou heni. ¹¹ Maria na gara murimurinai mai taina ida e giniva e taiva ai, e igo vareai, gara lalona e itaia. ¹² Bena ia ese aneru rarua mai dabua kurokurodia ida e itadia, Iesu tauna e atoa gabunai: Ta be aena gabunai ma ta be kwarana gabunai hehelai. ¹³ Idia ese e hereva henia eto, hahine e, dahaka dainai o taimu? Ia ese e haere henidia eto, egu Lohiabada na e abia oho, bona e atoa gabuna na asi dibagu. ¹⁴ Unu e gwau toma bena e roha hegiro, Iesu na gininai e itaia, to asi dibana una be Iesu. ¹⁵ Iesu ese e nanadaia eto, hahine e dahaka dainai o taimu? Daika o tahuamu? Maria banava eto, ia na uma inarina tauna ta. Bena eto, gauka e, bema oi ese ia tauanina o laohaia gabu ta negana ai, a hamaorogu, bena bainala baina ha abia. ¹⁶ Iesu, eto, Maria e! Maria na e gini hegiro, eto Raboni! (una hereva anina be hahediba taumu). ¹⁷ Iesu ese e hamaoroa eto, taugu ai do basio dau kau. Badina be tamada dekena do asina dae kau. A varavaragu hari dekedia aola. Ba hamaorodia do aina dae kau tamagu bona tamamui, egu Dirava bona emui Dirava dekenai. ¹⁸ Bena Maria, hane magadala, na ela hahediba e hamaorodia eto, Lohiabada na itaia. Bena Iesu ese e herevalai henia herevadia na e hamaorodia. ¹⁹ Una pura dina gini-gunana hanuaboina ai, hahediba ese edia ruma iduarana e koua ahu, Iuda taudia garidia. Bena Iesu na ela idia bogaragidiai e gini eto, maino avabia. ²⁰ Unu e gwau toma, bena imana ruaosi bona ohena danu e haheitalaidia bena hahediba e moale Lohiabada e itaia dainai. ²¹ Iesu ese ma e hereva henidia eto, maino avabia. Tamada ese e siaigu hegeregerena ai lau ese danu umui baina siaimui. ²² Unu e gwau toma bena e hahoho henidia eto, Lauma Helaga avabia. ²³ Edia dika ba gwautao taudia iboudiai na edia dika bae hegwau tao. A edia dika basio gwautao taudia iboudiai na edia dika do bae mia. ²⁴ Toma, gwauta-rua taudia ta, e nemaia hekapa, idia ida asie hebou Iesu dekedia ela hanuaboina ai. ²⁵ Badina, hahediba oredia ese e hamaoroa, eto, ai ese Lohiabada na ame itaia. A Toma eto, bema ikoko berodia ia imana ai basina itamu, imagu kwaki kwakina na basina atoa kaumu. Bona imagu na ia ohena ai basina toia vareaimu negana ai, lau ese basina abia daemu. ²⁶ Dina taurahani e ore, bena ena hahediba na ruma lalonai ma e heboulou, Toma danu idia ida. Ena be iduara e koua ahu, to Iesu na ela bogaragidiai ma e gini eto, maino avabia. ²⁷ Bena ia ese Toma e hereva henia, eto, imamu kwaki-kwakina na atoia mai, lau imagu ba daua toho: Bona ohegu ai imamu danu ba toia vareai, bena basio daradara: bavabiabiraigu. ²⁸ Toma ese e haere henia, eto, egu Lohiabada, egu Dirava? ²⁹ Iesu eto, vada ome itagu dainai o abiabiraigumu, ena be asie itagu to e abiabiraigumu be nanamo. ³⁰ Toa diagau Iesu ese ma e kara, ena hahediba: A idia na ina buka lalonai asi e tore guguru. ³¹ A ini hidaosi mo vada e tore, umui ese bavabia dae Iesu na Keriso, Dirava Natuna bena bavabiabiraia mauri bavabia ia ladana ai. Translation done and completed by Dk. Karoho Kila on 15/05/23, Time: 10.35 pm