¹ Kudoumui na basie hetaha. Umui ese Dirava bavabidadama henia, lau danu bavabidadama henigu. ² Tamagu ena ruma ai noho gabudia na momo herea. A bema lasi negana ai, vada nama hamaoromui, badina lau na ba laomu gabu ta baina hahegaegaea umui emui, ³ bema bainala gabu ta baina hahegaegaea umui emui, lau na ma balou maimu bona sibogu ese bainame abimui, unu amo lau edeseni ai umui danu unuseniai. ⁴ Umui na dibamui lau ba laomu (gabuna) dalana. ⁵ Toma ese Iesu e hamaoroa, eto, "Lohiabada e, ai na asi dibamai oi be ede bo laomu, ai dala be ede baia diba toma, a? ⁶ Iesu ese e hamaoroa, eto, "Lau na dala, bona hereva momokani, bona mauri; Tamagu dekena baema taudia iboudiai (edia dala na lau) na lau egu amo baema. ⁷ Bema lau vada boma dibagu, umui ese Tamagu danu vada boma dibaia. Ina harihari amo ela vada ome dibaia bona ome itaia." ⁸ Filipi ese Iesu e hamaoroa eto, "Lohiabada e, Tamada a haheita laimai, bona emai ai vada baine hegeregere." ⁹ Iesu ese e hamaoroa eto, Lau na umui ida nega daudau tame noho bona umui na dounu so dibamu lau be daika, Filipi? vada e itagumu tauna ese Tamagu vada e itaia. Ede bamona ai oi ma otomu, 'Tamagu a haheita laimai? ¹⁰ Umui ese so abia daemu lau na Tamagu lalonai bona Tamagu na lau laloguai, a? Na herevalai henimuimu herevadia na dia lau sibogu ese na hereva laimu, a Tamagu lau laloguai e nohomu na ena gaukara e karaiamu. ¹¹ Bavabigu dae lau na Tamagu lalonai, bona Tamagu lau laloguai, eiava bavabigudae badina na karamu karadia mo daidiai. ¹² Momokani, momokani, na hamaoromuimu, e abigudaemu tauna ese na karamu karadia danu do baine kara, bona ia ese kara badadia ini kara daediai baine karadia badina be lau na Tamagu dekena ba laomu. ¹³ Ladagu ai gau iboudiai ba noinoi laidia, lau ese na baina karaia, unu amo Tamagu hairaina baine hedinarai Natuna ena amo. ¹⁴ Bema gau ta ladagu ai ba noia, lau ese na baina karaia. ¹⁵ Bema o lalokau henigumu, egu hahegani ba badinadia, ¹⁶ bona lau ese Tamagu baina noia, ia ese Hekaha Tauna ta ma baine henimui bena ia na umui ida ela hanaihanai. ¹⁷ Hereva Momokani Laumana. Tanobada ese na basine abiadaemu badina be se itaiamu bona se dibaiamu. A umui na dibamui ia, badina ia na umui ida o nohomu bona ia na lalomui ai. ¹⁸ Lau ese basina rakatanimui ihareha hetomadia; lau na baina loumai dekemui. ¹⁹ Nega kwadogi do mia bona tanobada ese vada basine itagu loumu, a umui ese ba itagu. Badina be lau na maurimu, umui danu ba mauri. ²⁰ Una dina ai umui na bo dibamu lau na Tamagu lalona ai, bona umui na lalogu ai, bona lau na umui lalomui ai. ²¹ Egu hahegani e abia daemu bona e badinamu tauna ese lau e lalokau henigumu, bona e lalokau henigumu tauna na Tamagu ese baine lalokau henia, bona lau ese baina lalokau henia bona ienai do baina hedinarai. ²² Iuda (dia Isakariota) ese Iesu e hamaoroa eto, "Lohiabada e, dahaka dainai oi na ai emai ai do ba hedinarai bona tanobada enai be lasi, a? ²³ Iesu e haere bona e hamaoroa eto, "Bema tau ta ese e lalokau henigumu, ia ese egu hereva do baine badina. Lau Tamagu ese baine lalokau henia, bona ai na baiama ia dekena bona ia ida baia noho hebou. ²⁴ Asine lalokau henigumu tauna ese egu hereva na se badinamu. O kamonaimu herevana na dia lauegu amo a Tamagu e siaigu tauna ena amo. ²⁵ Lau ese ini hereva vada na hamaoromui, dekemui ai na nohova neganai. ²⁶ Vadaeni, Hekaha Tauna - ia na Lauma Helaga Tamagu ese lau ladagu ai baine siaia - ia ese gau iboudiai baine hadibalaimui bona ia ese na hamaoromui herevadia iboudiai do baine hahelalomui-une. ²⁷ Maino na emui ai na rakataniamu; egu maino na henimuimu. Lau na dia tanobada e henimu hegeregerena umui na henimuimu. Kudoumui na basie hetaha, bona basio gari. ²⁸ Vada o kamonai na hamaoromui, nato, 'Lau na ba raka ohomu, bona ma baina loumai dekemui?' Bema umui ese lau o lalokau heniguva, umui na ba moale badina launa na laomu Tamagu dekena, badina Tamagu ese lau na e hereagumu. ²⁹ Harihari vada na hamaoromui guna karana do sevarai, unu amo karana bae vara, umui ese na bavabia dae. ³⁰ Lau na umui ida basina hereva daudaumu, badina ina tanobada lohiana na e maimu. Ia na asi ena gau ta lau egu ai, ³¹ a tanobada na baine diba maoro lau ese Tamagu na lalokau heniamu, bona Tamagu ese e haduagumu hegeregerenai na karadiamu. Aita toreisi bona ini amo aitala. Translation done by: Mrs. Boio English on Wednesday (16/08/23), time: 5.46pm. Ready for quality checking.