¹ Dina ima e ore ai Ananias hahelaga tauna badana, hanua tau-badadia haida ida, bona haroro mai dibana tauna ta ladana Teretulo unu ela. ² Bena Paulo na governor vairanai e gini, Teretulo ese governor enai e habadelaia matama, eto, "Badina be oi daimu ai maino ai a nohomu, bona emu aonega dainai ina bese ena dala vada eme maoromaro, ³ una dainai ai ese nega idoidiai bona gabu iboudiai oi emu hereva abiadaemu bona a hanamomumu. ⁴ Edeheto, baina haturiamu na garina na noimumu, mani ame bogamai hisi emai hereva kwadogina ba kamonai. ⁵ Badina be ai ese ina tau a davaria ia na dika ihavarana tauna Iuda taudia iboudiai tanobada kahadia idoidiai ia ese e hahelogo-helogodiamu ia danu Nasareta oreana ihakauna tauna ta. ⁶ Ia ese Dubu Helaga e hadikaia toho, to ai ese a dabaia tao baia hahemaoro henia emai taravatu hegeregerenai ato. ⁷ A Lusia, tuari biaguna badana ema imamai amo eabia oho mai dagedagena ida. ⁸ Mani oi sibomu ese ba nanadaia ini kara idoidiai e habadelaimumu herevadia sibomu ba diba gaudia amo ai ese a habadelaiamu. ⁹ Iuda taudia ese ena hereva e abiadae unu hereva iboudiai na mo-momokani. ¹⁰ Gavana ese Paulo e lodu henia, bena Paulo e haere, eto, "Lau dibagu lagani momo oi ese ina bese vada o hahemaoro henidia, una dainai sibogu herevagu ai na gwaurai mai moalegu ida. ¹¹ Boma tahua boma diba dina gwauta-rua vada ela lau na toma-diho totona Ierusalema ai na hadara dae. ¹² Tau ta ida hepapa-ahuahumai ai asie davarigu, eiava hutuma na habadudia, bona dubu ai eiava hanua ariaradiai ai heolog-helogo ta asina havaraia. ¹³ Idia danu harihari e habade laigumu herevadia na oi vairamu ai basie hamomokani dibamu. ¹⁴ A ina-na na gwauraia hedinaraimu oi vairamu ai, idia ese kererena, e gwauraimu dalana ai lau ese senemai edia Dirava na toma henia dihomu. Lau na gau iboudiai taravatu ai bona peroveta bukadia ai e torena na abidaemu danu. ¹⁵ Mai egu helaro danu Dirava enai ini hahebade taudia hegeregeredia mase taudia do bae toreisi lou kara maoromaoro taudia bona asi edia kara maoromaoro taudia danu. ¹⁶ Ina danu na goadalaiamu lalogu na basine kerere helaoreana Dirava vairanai bona taunimanima vairadiai. ¹⁷ Lagani haida vada e lao bubuni bena nala harihari gaudia bona boubou gaudia egu hanua baina laohai nato. ¹⁸ Unu na kara toma, bena na hahegoeva ai na Dubu Helaga ai, e davarigu aru taudia na lasi, helogohelogo danu lasi. ¹⁹ A Iuda taudia haida Asia amo be unuseni ai oi vairmu ai bema mai bema habadelaigu, idia na egu kara dika ta bema diba una na bema maoro. ²⁰ Eiava, ini vada ema taudia ese bema hamaorogu egu kara dika be edena e davaria Iuda kaunsolo taudia vairadia nagini negana ai. ²¹ A ina hereva tamona na gwauraia badabada idia bogaragidia ai ginigu ai nato, "Mase taudia edia toreisi lou herevana dainai, hari dina o hahemaoro henigumu, ²² Bena Felix hari 'Dala' vada e diba maoromaoro tainai idia e gwaudia tubu eto, "Bema Lusia tuari biaguna badana bainema neganai emui hereva baina tahua namonamo. ²³ Bena tuari biaguna e hagania Paulo baine gimaia, to basine koua kunuka-kunuka, bona basine gwaua tao turana haida ese danu bae igoa ita. ²⁴ Dina haida muridia ai, Felix na adavana Darusila, Iuda hahinena, ida ema bena Paulo hesiaina e kara bena ia ena amo e kamonai Keriso Iesu iabiabiraina herevana. ²⁵ A Paulo ese kara maoromaoro bona boga auka bainema hahemaorona danu e herevalaia, Felix na e gari, eto, Harihari aola nega baine namo ma baina boirimu lou. ²⁶ Ia danu mai ena helaro Paulo ese moni baine henia ia iruhana davana una dainai ia ese e boiria loulouva, ia ida e hereva-herevava. ²⁷ A lagani rua vada e lao bubuni, bona Porokio Festo ese Felix e boloa, A Felix na Iuda taudia lalodia ihanamodia urana e urava dainai, ia ese Paulo na igunai e rakatania.