¹ Tatau haida na Iudea amo e diho ela Antioka. Varavara e hadibadia, eto, basie peritomemui, Mose ena taravatu hegeregerena, umui na hahemauri basio abia. ² Paulo bona Banaba na idia ida e heai bona e hepapa-ahuahu bada herea dainai, idia na e hahedua, Paulo bona Banaba, ma haida danu, Ierusalema baela, aposetolo bona heitatao taudia dekedia, una hereva bae nanadailaidia. ³ Ekalesia taudia ese edia dala matamana ai e bamodia bena Foenikia bona Samaria tanodia e rakadia hanai, bese idau-idau taudia ese e helalo-kerehai sivaraina e gwauraia bena varavara iboudiai e moale bada. ⁴ Idia na Ierusalema ai e ginidae ai, dubu taudia apostolo bona heitatao taudia ese e abidia dae; bena idia na Dirava ida e kara bouva gaudia idoidiai e hamaorolaidia. ⁵ A Farasia oreana amo Iesu vada eabiabiraia taudia haida na e tore isi, eto: Maorona binai idau taudia danu bae peritomedia, bona bae hadibadia danu Mose ena taravatu bae badinaia. ⁶ Bena aposetolo bona heitatao taudia e hebou, una hereva e haeroa. ⁷ Bena e hepapa-ahuahu daudau, murinai Petero e toreisi, eto: Tatau bona varavaragu e, dibamui Dirava ese umui bogaragimui amo e abiguhidi, lau udugu amo bese idaudia taudia ese sivarai namo bae kamonai bona bae abiadae. ⁸ Bona taunimanima kudouna mai dibana Diravana ese idia ediai e hedinarai, bona Lauma Helaga e henidia, ita e henida hegeregerena. ⁹ Ita bona idia se-haidauda badina edia abidadama ese lalodia vada e hagoevadia. ¹⁰ Dahaka dainai Dirava o dibaiamu taumui ese ia ibadinana taudia na maduna metau o ato kaumu. Tubuda bona ita danu ihuana asita hegeregere maduna na. ¹¹ Ita ta abia daemu Iesu Keriso ena harihari-bada dainai baita mauri, idia danu unuheto. ¹² Hebou taudia iboudiai asi regeregedia. Bena Banaba bona Paulo edia hereva mo e hakala henia; Dirava ese bese idau-idau taudia bogaragidiai toa bona hoa karadia idia imadia amo e karava sivaraidia raruosi ese e gwaurai. ¹³ Edia hereva e ore, bena Iakobo na e hereva, eto, Bamogu bona varavaragu e, a kamonai henigu. ¹⁴ Simona ese e hamaorodia, Dirava ese na gunaguna bese idau-idau e hanamodia, edia bese bae abia hidi ia ladana baine nanoe laia. ¹⁵ Una na peroveta taudia edia hereva eme hegeregere: E torea, eto, ¹⁶ Ini gau muridiai baina lou mai Davida ena kalaga e kohu gauna ma baina haginia lou, e hegigi rohoroho, ma baina hadaia lou bona baina haginia vaitani. ¹⁷ Bena taunimanima gabedia ese Lohiabada bae tahua. Oibe, bese idau-idau lau ladagu vada e nemailaidia na bae tahua. ¹⁸ Lohiabada e tomamu ini gau e gwaurai hedinaraiva guna negana amo ema hari. ¹⁹ Bena lau na tomamu bese haida ese Dirava e hagereamu ita ese be basita haraivadia. ²⁰ Ai ta tore henidia, baitato, kaivakuku ihaboulaidia gaudia basie ani, bona basie heuda-hanai bona aiodia e taudae gaudia hidodia bona rarana basie ani. ²¹ Badina sene negadia amo ema ina hari, Mose na mai ena haroro taudia hanua iboudiai lalodiai bona dina helaga iboudiai ena taravatu na dabu lalodia ai e duahiamu. ²² Bena apostolo bona heitatao taudia, ekalesia taudia ida lalodia e hadai edia orea amo haida bae abidia hidi Paulo bona Banaba ida baela Antioka. Taudia be ini Iuda e nemaia Baraseba bona Sila idia raruosi na varavara ikwaradia taudia. ²³ Ina revareva imadia ai e torea e laohaia aposetolo taumai bona ekalesia hegunalai taumai bona bese taumui Antioka ai bona Suria ai bona Kilikia ai o nohomu iboumui ai ba namo ba mauri. ²⁴ Aina vada ame kamonai haida emai amo e vasi, edia hereva amo e haraivamu bona e hadaradaramui to ai ese asia hamaorodia toma. ²⁵ Badina be, ai iboumai ai emai lalo-hadai tamona binai tatau haida baia abidia hidi baia siaidia emai lalokau taudia Banaba bona Paulo bae vasi. ²⁶ Taudia raruosi bene edia mauri e nege daure, eda Lohiabada Iesu Keriso ladana dainai. ²⁷ Badina bunai Iuda bona Sila a siaidiamu, ini hereva hegeregeredia mo ududia amo ma bae gwaurai. ²⁸ Badina be Lauma Helaga bona ai atomamu ina na baine namo: maduna metaudia na pagamui ai basia ato kau; a ini mai badidia gaudia mo baia ato kau. ²⁹ Kaivakuku ihaboulaidia gaudia rara bona aiodia e gigi gaudia hidiodia na basio ani, bona basio heuda-hanai. Unu gau idoidiai na basio abi dae vada ba namo, ba mahuta. ³⁰ Badina be, e siaidia taudia na Antioka ela, kamonai taudia unuseni ai e haboudia, bena revareva e henidia. ³¹ Idia ese e duahia, bona unu hahealo herevadia e moalelai. ³² Iuda bona Sila na peroveta taudia: badina be raruosi ese hereva diagau amo e hadibalaidia bona e hagoada laidia. ³³ Idia na unuseni ai dina haida ma e noho: Bena varavara ese e tu-dia, mai mainodia ida ela e siaidia taudia dekedia. ³⁴ A Sila na ena ura dainai dounu e halaheva. ³⁵ Paulo bona Banaba na Antioka lalonai e nohova, e hahedibava bona Lohiabada ena hereva e haroro laiava hutuma ida. ³⁶ Dina haida vada ela bena Paulo ese Banaba e hereva henia, eto, Aitala Lohiabada ena hereva aita harorolai henidia hanuadia iboudiai baita lou henidia varavara baita itadia ede e hetomu. ³⁷ Bena Banaba e urava Ioane Mareko na idia ida ma baela. ³⁸ A Paulo ena lalo-hadai be ia bae laohaia na dia namo badina be Pamfulia ai e rakatanidia, edia gaukara ai se bamodia. ³⁹ Una gwauna raruosi e heai, bena e haheparara Banaba ese Mareko e abia lagatoi auta ai egui Kupro ela. ⁴⁰ A Paulo ese Sila e abia hidi, varavara ese Dirava ena harihari-bada ai e hahelagadia bena e tore isi. ⁴¹ Suria bona Kilikia tanodia e rakadia hanai ekalesia oreadia e hagoadadia.