¹ Iesu nimu seni uguhi oroḡoge uhura koita dadaḡava raki au ruta otege; ² renu dika koita be raki au ḡasina oroḡi, au vaḡotoni komuko daivi, roege, “di Rohite, akera daki a imiḡima, ana beta da maḡe ḡahiḡa vanu.” ³ Iesu raki au ade inuḡi kamui, roege, “Riaḡa daka a maḡe ḡahiḡa vara. Maḡe ḡoisa!” Ḡamana veite au dikave raki ḡaremanu. ⁴ Gerege Iesu raki kironu, “A negu koita be kirome; eduge ote, dubu aena ḡaha iau ḡaḡae ḡoisa, renu Mose aena maemane iauma eraḡare riaḡa ḡahisa, era koita iabaramu riaḡa ḡahisa.” ⁵ Iesu raki Kaperanamu sirivare, Roma koita bauge be raki au ḡasina oroḡime auki imiḡi ⁶ roege, “di Rohite, di besubesu koitave ramu dikai iagahu vaḡava veite, huhu raho ketake ruta.” ⁷ Iesu raki kironu, “Dakena ai iagehe oroḡime dana au dikave maḡe ḡahisa.” ⁸ Eduge Roma koita bauge eraki kironu, “Di Rohite, daka ai vaḡotoni beta maḡe koitava ge aki roma aka di iagehe oroḡisa; eduge ana beta gavaḡu roege gerege di besubesu atave ramu maḡe ḡoiare. ⁹ Da tage, bia bauge be iau hedoke derikahe, ḡarara ḡami ḡaitage di derikehe; renu da be kiroiare, Ote, auka otito vara, se da mati be kiroiare, Oroḡo, auka ororo vara, renu da di meve kiare koitava kiroiare, Me o kisa, renu auka kiki vara.” ¹⁰ Iesu ga e ihinei, auki au itahe oḡine kiro gevenu, “Riaḡava daki ia kirogei roma, dakamu beta Isaraela uhura onaki ihihi be eraḡanu. ¹¹ Dakamu o roma, koita dadaḡa vani ḡadimare renu vani uguhare oroḡisa iauna vava gurahi Aberahamo, Isako renu Iakobo ruḡa tamuta raḡisa, ¹² edube vava gurahare ḡahava iabara itahe iauna vadibua iauna kiragei otisa, eige iauna niḡo raḡohi renu huhu naḡohi iau eḡie ginono ḡahigeisa. ¹³ Renu Iesu raki Roma ata bauge kironu, “Ote; enakime ana a imimi vane naḡate ai ihihive dainehe ana oti eraḡisa.” Nega kobuḡa ei Roma ḡarara koita eraki maḡe ḡoinu. ^{15 14} Iesu raki Petero iagehe sirivane, auki au vare maḡiva dikai iaḡiaḡe eraḡa. auki au adehe kamui, negu komata eraki ḡaremanu, auki urimare au demake kinu. ¹⁶ Vahi eige iauki koita dadaḡa sua daure idigevene au ḡasina idigei oroḡanu; auki au ga hedokehe sua daure oiagei hakivi, renu dika raḡane inuhati maḡe ḡahi gevenu. ¹⁷ Oramu peroveta Isaia gare riaḡa ḡahiḡa vara, “Auki ni isuke inuhati noi ari gevenu renu ni daureve maḡe ḡahi gevenu.” ¹⁸ Iesu raki koita dadaḡa au oriḡi eragei, auki au ḡamituhe boriti ḡahigei iauka hakirahe otisa. ¹⁹ Gerege aena koita be raki au ḡasina oroḡime auki ronu, “di Biage, ana orei otare dakamu ai itahe ororo vara.” ²⁰ Gerege Iesu raki kironu, “Ura totoka iabera muni vaka uia, renu uguha iabera idi ada iau iage; eduge Koita Ḡamika vara au omote maemi vaḡa roro taru veitera.” ²¹ Au ḡamite be raki kironu, “Di Rohite, da so oti di mame abatemima.” ²² Eduge Iesu raki kironu, “Di itahe oroḡo, renu hoḡe raḡohane ḡare geve iaukena iavaḡu iau hoḡeve abate geisa.” ²³ Iesu raki vanaḡiva ḡadimege, au ḡamituhe iaberaki au itahe oti ḡadihi. ²⁴ Tutube veite nono ketake veni ruta geraki koa uhura seni hakivi renu iau vanaḡive eiava raki ḡadimi; eduge Iesu ra iaḡiaḡe. ²⁵ Au ḡamituhe iaberaki oti ḡutihi, roege, “Ni Rohite, no maḡuri ḡahigeve! Nokamu negu hoḡe raḡohira vara. ²⁶ Auki kiro gevenu, “Esemena ia siḡo raḡoha, kava ihihi ḡamikava ianu?” Gerege auki urimi nono mati eve gaḡa gevege; iauki ḡoiraḡohi vea raḡanu. ²⁷ Au ḡamituhe inuhati geraki ḡaḡu raḡohi roege, “Ona otavado ata bena onu, nono mati eve ḡaitage au gare iha.