¹ Farisea mati Sadukea ḡahava iaberaki Iesu ḡasina oti iauki tohoḡi beraḡanu auka vava hedo ḡuma be iau vaḡotoni ḡaḡae kisa. ² Eduge Iesu raki kiro gevenu, “Ana eraḡege va kerekare ḡoiare aka roro vara, ‘Vahiḡu vaniva ramu maḡe ḡoiḡoara eige va ramu kerekare ra.’ ³ Mati va tahi vagutu ḡoiege, ‘Negu vani oramu veni raki ḡoromisa vima, badiva va ramu kerekare mati girigire ra.’ Iaka riaḡahe va toaḡava kiare roro vara, eduge iaka beta riaḡahe negubutu iaḡa eragevare toaḡava kiki vara. ⁴ Dirava riaḡa ḡahiḡa veite taua raki toa berabe raḡa, edube toa bera veitera eduge peroveta Iona au ḡaḡae ḡoine eḡugera.” Gerege auki ei rahirahe gare gevare ḡeahu otinu. ⁵ Iesu ḡamituhe oti gohu hakirahe hakiraḡi, iauka vagua raḡanu iauka demaka be mimi veitera. ⁶ Iesu raki kiro gevenu, “Iama Farisea mati Sadukea ḡaha uaḡatu geisa, iau gare mati iau ḡumaḡe erageisa. ⁷ Iauki bebe kiro gevege, “Era noki demaka be mi ororo veite eige auki enaki roma.” ⁸ Renu iau gava raḡege uhura Iesu raki ronu, “Iakamu iai ihihive ramu raho veitera, esemena ia demaka be mi ororo veite gava raḡoha? ⁹ Iana iai uhure so bao raḡohira veitenu? Iana anana veitenu ia parao adakasiva koita daha adakasiva vasi gevenu, renu boteka esebu gena ia makava kiogevenu? ¹⁰ Se ia parao tina iatiriḡava ata daha ababu vasi gevenu, renu boteka esebu gena ia maka kiogevenu? ¹¹ Esemena iai uhure bao raḡohira veite daka beta demaka gava daki roege? Edube da rone iama Farisea mati Sadukea uaḡatu geisa, iau gare mati ḡumaḡe erageisa!” ¹² Gerege iau uhure raki bao raḡanu auka beta parao muraka gava ge auki uaḡatu gevenu, eduge Farisea mati Sadukea ḡaha ia uguro raḡare gava. ¹³ Iesu raki Kaisara Filipi oḡo hakivi, auki au ḡamituhe bera gevenu, “Koita iana esegena iau roia Koita Ḡamika vana unu hunu?” ¹⁴ Renu iauki ronu, Be iabera roia Ioane Babatiso, edube be iabera roia Elia, be iabera roia Ieremia se peroveta koita bera. ¹⁵ Iesu raki bera gevenu, “Eduge dana unuhuna ia roia dana unuhunu?” ¹⁶ Simona Petero raki ronu, “Aka Keriso ra, maḡuri Dirava Moera.” ¹⁷ Gerege Iesu raki kironu, au maḡeve ra aigera, Iona moe Simona! Beta ahata maka auge auki ai ḡaḡae kinu, eduge di Mame vava uiare eraki a moimanu. ¹⁸ Renu akera daki aki roma, aka Petero, renu aka muni ora, au ada ge daki di dubuve ḡoḡo vara, renu hoḡe iaḡa bera beta vaḡava ḡahiḡa vara. ¹⁹ Dakena va basileia kiva mi a moimisa, gerege otavado a vata ada oi bodibo vanu vava tage auki bodibo vara, mati otavado a vata ada oi baovare vava tage auka bao raḡira vara.” ²⁰ Gerege auki au ḡamituhe ḡanito ḡahigei ronu ia negu koita be boriti ḡahime auka Keriso. ²¹ Gerege Iesu raki au ḡamituhe kiro gevege auka Dirava rone eige auka so Ierusalema otito vara. Eigera dubu bauge ia mati dubu biava ia, renu aena kiare ḡahava iabera so mi iaḡa be iau dainehe da huhu ḡahi mati daka hoḡe raḡira vara. Eduge daka vani abigaḡa itaharahe daka urimi ḡoiraḡira vara. ²² Gerege Petero raki Iesu nisiḡami ḡeahu otime auki namiḡi, roege, “Dirava vaḡahu ḡaha, di Rohite! Ḡuma roiare o negu riaḡa ḡoime.” ²³ Eduge Iesu raki aniḡoiare Petero kironu, “Oi ḡeahu ote, Diabolo! Akamu di oḡiḡi ḡumaḡe aki daure ḡahima, ai uhu ananave iabera ahata maka iaḡa iauge aki anana vima, beta Dirava au gera.” ²⁴ Gerege Iesu raki au ḡamituhe kirogei, “Ana unuhuna di ḡahara vi di itahe oroḡisa, ama avaḡu ai sataurove agohare renu ana di itahe oḡisa. ²⁵ Mati oḡoreana iau maḡurive biava raḡisa iauka ḡatugeige vara, mati oḡoreana iau maḡurive di dainehe ḡatua iauka mi ḡoiraḡohira vara. ²⁶ Koita be vata ketake o uhuḡatu ḡahuare auna otavado maḡe be mimi vanu, edube iau maḡurive ḡatuisa? Se iauna otavado iaḡa be mi mohigei iau maḡuri riaḡa mi ḡoiraḡohisa? ²⁷ “Eige Koita Ḡamika ramu vava seni au aneruve ruḡa au Mame maḡeve mi oroḡisa, gerege auna koita koba koba iau me mane damuna mohigeisa. ²⁸ Riaḡa vara daki roma, ia be ia rahirahe iabera so beta hoḡe raḡohira vara ate Koita Ḡamika vara vava seni uguhi ororo vara.”