¹ Iauki koba koba iau guragu oḡohe otinu, eduge Iesu ra Oliva Nimuva seni ge auki otinu. ² Vagutu ge auki ḡaitana ḡoiraḡi dubu otinu. Koita iaberaki au ḡasina orogi gurahi au gare ihige. ³ Aena ḡahaia renu Faresia ḡaha iaberaki maḡi be ḡuma daure kiege uhura mi oroḡime iauki koita iau vaḡotoni maemanu. ⁴ Iauki Iesu kironu, “Ni Biage, maḡi ora ni muduka vi ḡuma daure kiare uhura ge iauki behuḡanu. ⁵ Mose Aenave uhura gera noka maḡi onaki kikive iabera muniva ḡami hoekisa. Ama ana otavadoana a roma?” ⁶ Iauki tohoḡi onaki roege gerege au ga nune be roege iauka mi aena moimisa. Iesu raki ḡorumi vata ada au ada kakunehe ga be maemi. ⁷ Iauka daḡe daḡe berabe raḡege, auki urimi ramare kirogevenu, “Ana unuhuna iai vaḡotoni daure veite au uriḡoi muni mi maḡi o ḡama.” ⁸ Auki ḡaitana ḡorumare au adahe vata ada ga maemanu. ⁹ Iau au gare ihine, iau baugetuhe iabeki ḡeahu oti renu avie kobakoba iau itahe ḡeahu otinu; iauki Iesu ḡarehi renu ni muduka maḡi e au vaḡotoni ramirame ḡare gevenu. ¹⁰ Iesu raki urimi ramare auki maḡi e kironu, “Maḡi, ama negu a ḡamisa rone ḡahavaia? Esemena be guramare aki roro veite aka daure maḡi vara?” ¹¹ Maḡi eraki ronu, “Be veitera, di Rohite.” Renu Iesu raki kironu, “Da tage beta ami daure roro vara. Ama otisa, edube a negu daure ki goiragime.” ¹² Iesu raki ḡaitana gaḡagei, roege, “Daka mata o abaga vara. Di itahe oroḡare koita vara beta vadibua oḡiḡi vara, eduge auka maguri abagava mimi vara.” ¹³ Gerege Faresia iaberaki kironu, “Akamu avaḡu ge aki ai gare vima; eige noka beta ai gare riaḡa ḡahiḡa vara.” ¹⁴ Iesu raki ronu, “Eige dana davaḡu gena da di gare vima, di gare ramu riaḡa vara badiva daka dibana dana oreigena da oroḡanu renu dana orei otito vanu, eduge aka dibana veite dana oreigena da oroḡanu se dana orei otito vanu. ¹⁵ Akamu koita uhu ananave ge aki berabe vima; edube daka beta koita be daure damune kiki vara. ¹⁶ Eduge dana berabe vima, di berabe vera riaḡa vara; badiva beta davaḡu ge daki berabe vima, eduge di Mame da besuḡane ruta gera. ¹⁷ Iai aenave uhura maemane tage ramu ronu koita abu ḡainage iau ḡare ramu riaḡa ḡahisa. ¹⁸ Di Mame da besuḡane tage ramu di gare auki riaḡa ḡahima.” ¹⁹ Gerege iauki beraḡanu, “Ama ai Mame?” Iesu raki ronu, “Iaka da se di Mame ni dibane veitera. Iana dibane ḡahanu dana unuhunu, iaka di Mame tage au dibana ḡahanu.” ²⁰ Iesu gure dubu uhura iau moni ḡosiḡare gabuva ḡaika au uguro gare roege, eduge koita bera kamuka veite badiva au nega vera so mimi veitera. ²¹ Iesu raki ḡaitana kirogevenu, “Daka so ḡeahu otito vara, renu iaka da iaḡoia vara, edube iaka iai daureve uhura hoḡe raḡira vara. Dana orei otito vanu, iaka beta ororo vara.” ²² Gerege Iudea ḡaha iaberaki kironu, “Ena auna oti auvaḡu au ḡamiḡa vanu? Au gare makava au roma, ‘Dana orei otito vanu, iaka beta ororo vara.’?” ²³ Iesu raki kiro gevenu, “Iaka derihe vata ada o ḡahava iabara, daka auhe ge daki oroḡanu; iaka vata ada o ḡahava iabera, eduge daka beta vata ada iera. ²⁴ Eige daki ia boriti ḡahi gevenu iaka daure uhura hoḡe raḡira vara, edube ia da riaḡa ḡahiḡa veite da davaḡu roma dakamu aukaki, iaka iai daureve uhura hoḡe raḡohira vara.” ²⁵ Iauki kironu, “Ana unuhunu?” Iesu raki kiro gevenu, “Esemena da ia gaḡa geima? Otavado ana da ḡanai ia boriti ḡahi gevenu. ²⁶ Daka iaḡa dadaḡava dana iai ada rosa mati iai daureve dana rosa; eduge da besuḡane koita vara riaḡa vara, eige dana otavadoana da vata ada oi ronu eramu auge daki ihine ga vara.” ²⁷ Iauka anana veite auka au Mame vava uiare garera auki roma. ²⁸ Gerege Iesu raki ronu, “Ia negu Koita Ḡamika mi iagemare, eige iana anaisa dana unuhunu, mati daka beta iaḡa be davaḡu kiki vara, eduge da ga ro gevare iabara di Mame vava uiare da boriti ḡahare gava iabara. ²⁹ Renu da besuḡane koita vara daḡore gera; auka da ḡareḡa veitera, badivara da kiare meva inuhati auki heḡiriva vima.” ³⁰ Auki gavi iaḡa o ro gevege, koita dadaḡa iaberaki riaḡa ḡahanu. ³¹ Gerege Iesu raki Iudea ḡahaia riaḡa ḡahane kiro gevenu, “Ia di gare riaḡa ḡahi rahare, iaka di gamituhea iabara; ³² renu iana ga o riaḡa ḡaha, renu ga riaḡa oramu a maḡe ḡahiḡa vara.” ³³ Iauki kironu, “Nokamu Aberahamo vahiruhe iabara renu nokamu beta koita be iau besubesu ḡahatuhe ḡahanu. Ana otavadoana a roma, ‘Aka maḡe mi ororo’?” ³⁴ Iesu raki kiro gevenu, “Riaḡa vara, daki roma, unuhuna ḡuma daure kima auka ahata maka mi otare auge auki otima. ³⁵ Besubesu koita vara guragu iaga veitera; au moe raki ei guragu behi behive oḡova. ³⁶ Eigera Dirava Moe a maḡe ḡahege, iaka maḡe riaḡa mimi vara. ³⁷ Daka dibanara iaka Aberahamo vahiruhe iabara; eduge iaka da ḡamiḡa ḡumava iaki gure kia, badivara di gare iai uhurehe gera guragu gabu veitera. ³⁸ Daka otavadoana da di Mame vaḡotoni eraḡanu era daki gava vanu; eduge iakamu otavadoana ia di Mame au ihine kiki vara. ³⁹ Iauki kironu, “Noka Aberahamo vahiruhe iabara.” Iesu raki kiro gevenu, “Ia Aberahamo vahiruhe ḡahanu, iaka au ḡumaḡe kiogevenu, ⁴⁰ eduge iaka da ḡamiḡa ḡumava iaki kia, da ga ro oroḡane ramu Dirava ga riaḡave ihine era daki ia boriti ḡahi gevege. Aberahamo ramu beta ḡuma ona kikive kinu. ⁴¹ Iaka riaḡa iai vahiruhe kiege naḡate iaki kia.” Iauki kironu, “Noka beta mamaka veite iabara; noka ni mame ramu kobabe, Dirava au avaḡu geraki ni Mame.” ⁴² Iesu raki kiro gevenu, “Gerege Dirava mi iai Mame ḡoiare, iakamu di ḡahara raḡira vara, badivara daka Dirava auge daki oroḡanu renu da ona. Daka beta davaḡu ge daki oroḡanu, eduge auki da besuḡanu. ⁴³ Esemena ia da ga roiare o ihihi veite? Badivara iaka di gare riaḡa ḡahiḡa veite dainehe. ⁴⁴ Iakamu iai mame satani naḡatera, eige iaki au ḡumaḡe kia. Auka ḡanai koita ḡami hoekanu mati auka maḡuri riaḡava guragu veite, badiva auka avaunaḡe maḡuriva ge auki guramima. Au avaunaḡe viare auka avaḡu au uhure anavare eḡu auna gava visa, badiva auka avaunaḡe inuhati iau mamera. ⁴⁵ Badiva daka ga riaḡa vara daki ia boriti ḡahigeima, edube iaka da riaḡa ḡahiḡa veitera. ⁴⁶ Dana unuhuna da boriti ḡahisa daka daure kinu? Da ga riaḡa roiare, esemena ia da riaḡa ḡahiḡa veite? ⁴⁷ Ana unuhuna Dirava gare ihima aka Dirava iera. Ana au gare ihihi veitenu makava ramu aka beta Dirava auge aki oroḡanu.” ⁴⁸ Iudea ḡaha iaberaki beraḡanu, “Nona riaḡa vara no roia a tage Samaria koitavara eige aka sua daure vara ai uhura gera?” ⁴⁹ Iesu raki ronu, “Daka sua daure veitera; eduge daka di Mame daki maḡe ḡahima, edube iaka da maḡe ḡahiḡa veitera. ⁵⁰ Eduge daka beta davaḡu di maḡeva daki iaḡoima; edube koita beḡuge raki auvaḡu maḡe renu auka maḡe biavara. ⁵¹ Riaḡa vara, daki roma, ana unuhuna di gare kamui riaḡa ḡahima auka beta hoḡe erara vara.” ⁵² Iudea ḡaha iaberaki kironu, “Nokamu dibana ḡahanu aka sua daure ai uhura. Aberahamo hoḡe raḡi, renu peroveta ḡaheva ḡainage; edube aka roma, ‘Ana unuhuna di gare kamuima auka beta hoḡe erara vara.’ ⁵³ Ana ni mame Aberahamo aukamu hoḡe raḡanu, au naḡatenu? Peroveta ḡaha ḡainage hoḡe raḡanu. Ana roma ana unuhuna?” ⁵⁴ Iesu raki ronu, “Da davaḡu da maḡe ḡahare negahe, di maḡeve ra maka veitera. Ora di Mame vava uiare eraki da maḡe ḡahima, auka iamu roia, ‘Auka ni Diravate,’ ⁵⁵ iana au dibane veitenu. Eduge daka au dibanera; gerege da negu rosa daka au dibane veite, dakamu a naḡate avaunaḡe koita ḡoiḡo vara. Edube daka au dibane renu au gare daki riaḡa ḡahi kamuima. ⁵⁶ Iai baugete Aberahamo tage di ororove heḡiriva vanu; aukaki uriḡoi eraḡare renu heḡiri viege.” ⁵⁷ Gerege Iudea ḡaha iabaraki kironu, “Aka so tau utu adakasiva mimi veite, aka roma aka Aberahamo eraḡanu?” ⁵⁸ Iesu raki kiro gevenu, “Riaḡa vara, daki roma, Aberahamo so ḡuruḡu veite, daki ḡuruanu.” ⁵⁹ Gerege iauki muni idiḡi au ḡamisa, eduge Iesu raki iau vaḡotoni dubu seni oḡi hakivanu.