¹ Mata o so horiho veite Ga ramu subuta ge auki uiege, mati Ga eramu Dirava ḡorehege auki uiege, renu Ga eramu Dirava ra. ² Ga oramu ḡanai Dirava ḡorehege auki uiege. ³ Iaḡa inuhati ge ramu au seni ge iauki hori raḡanu, renu iaḡa bera horiho kava veite, edube au seni ge iauki hori raḡanu. ⁴ Auka maḡuri umuka vara, mati au maḡurive ramu koita iau bouge iau abagera. ⁵ Abaga ora vadibu uhura ge auki abaga ḡoima, mati vadibu vara beta ḡodo ḡahiḡa vara. ⁶ Ata bera Dirava raki besuḡanu au ihera Ioane. ⁷ Au besuḡi oroḡane ra auka abaga riaḡa ḡahisa, gerege koita iau bouge gera ihare mati riaḡa ḡahisa. ⁸ Auka beta abaga eraki, eduge auka abaga e riaḡa ḡahiḡava auki oroḡanu. ⁹ Ora abaga riaḡa vara, koita iau bouḡi abaga ḡahigei gevara, e raki vata ada oi oroḡima. ¹⁰ Ga ora vata ketane oige auki uiege, mati au seni ge vata ketane o raki horivanu, eduge vata o ḡahava iabara au dibane veitera. ¹¹ Auki ḡoiraḡi au koitatuhe iau oroḡanu, eduge au koitatuhe iabaraki besibe ḡahege. ¹² Eduge oḡoreana iau bouge riaḡa ḡahanu, au ihe riaḡa ḡahanu, auki hedo mohi gevenu iauka Dirava ḡamuhe ḡahisa, ¹³ orenaki gena au o roḡonu, beta ahata maka se ahata maka augera, eduge Dirava au gera. ¹⁴ Gerege Ga eraki oroḡime auki ahata maka ḡoiare renu koita iau vaḡotoni uiege, gerege nokamu au maḡeve eraḡanu, maḡe eramu au Mame raki au Moe kobuḡava riaḡa ḡahi renu maḡe ḡahi moimanu. ¹⁵ (Ioane raki koita gavi barai roege, “Oramu da gavi roege koita vara, Di itahe oroḡare koita vara di variada koita vara, badivara daka so veite auka subuta ge auki horivanu. ”) ¹⁶ Au maḡeve uhuḡatu ge auki ni bouge adahe adahe no mohi gevenu. ¹⁷ Mose raki Dirava Aenave mi no mohi gevenu, maka maḡeva mati riaḡava ra Iesu Keriso raki mi oroḡanu. ¹⁸ Bera Dirava erara veitera. Ora Dirava au Moe kobuḡava unuhuna au Mame sorukehe uiare, eraki mi noi ḡaḡae kinu. ¹⁹ Iudea baugeva iaberaki aena ḡaha mati Ierusalema seni Levi ḡaha be besugei Ioane ḡasina iauka beraḡisa, “Ana unuhunu?” ²⁰ Ioane raki ga riaḡa kirogevenu, “Daka beta Keriso ra.” ²¹ Gerege iauki beraḡanu, “Gerege ana unuhunu? Ana Elia se?” Auki ronu, “Veitera daka beta aukaki.” “Ana Peroveta koita vanu?” Auki kiro gevenu, “Veitera.” ²² Gerege iauki mati beraḡanu, “Erege ana bina unuhunu? Ama ga be roege noka mi oti no besu gevene ḡahava vasiba ḡahigei gevara. No kirogeve ana unuhunu?” ²³ Auki ronu, “Daka koita be mata ḡaḡaeva gure toma, au enoḡe ra, Rohi Bauge ḡumaḡe ki maḡe ḡahi iahe, ”Isaia peroveta koita eraki ronu. ²⁴ Iauka negu Faresia ḡahava iaberaki besugei otinu. ²⁵ Iauki beraḡanu, “Gerege otavado dainehe ge a babatiso me kima, aka roma aka beta Keriso, se Elia, se peroveta koita?” ²⁶ Iauka negu Faresia ḡahava iaberaki besugei otinu. ²⁷ Iauki beraḡanu, “Gerege otavado dainehe ge a babatiso me kima, aka roma aka beta ²⁸ Keriso, se Elia, se peroveta koita?” ²⁹ Va tahege Ioane raki Iesu eraḡege auki oḡi au ḡasina otare renu kironu, “Eraḡa! Oramu Mamoe Ḡamika auge Dirava raki vata o daureva keto gevenu! ³⁰ Oramu da roege koitava aukamu onu, Di itahe oroḡare koita vara di vari adahe gera badivara daka so horiho veite auki uriḡoi horivanu. ³¹ Da davaḡu tage au dibane veitera; eige daki oroḡime daki eiava babatiso viege, badiva auka Isaraela ḡaha iau ḡaḡae ḡoisa.” ³² Gerege Ioane raki ḡaḡae kiro gevenu, “Daka niḡahege Horu Aenava raki vava seni uḡuhime erehuta uguha naḡate auki oroḡi au ada guramanu. ³³ Daka au dibane veite, eduge da besuḡi daka eiava babatiso visa aukaki daki ronu, Ana negu Horu Aena eraḡane au uguhi oroḡi atabe ada guramane eramu da rone koitava aukena Horu Aenava babatiso visa. ³⁴ Renu dakamu davaḡu eraḡanu eige daki ḡaḡae roma, oramu Dirava Moera.” ³⁵ Va tahege Ioane raki ḡaitana Iesu ḡamituhe abu ruḡa ramirame, ³⁶ iauki Iesu eraḡege auki oḡi oroḡime auki ronu, Eraḡiahe, oramu Dirava Mamoe ḡamika aukamu enu!” ³⁷ Au ḡamituhe abu ruḡa ge raki au ga vane ihare, iauki Iesu itahe otinu. ³⁸ Iesu raki aniḡoi era gevege iauki au itahe oroḡoge, auki bera gevenu, “Iana otavado ia iaḡova?” Iauki kironu, “Rabi” (Ga o makava ramu 'di Biage'), “ana oreigena a guramima?” ³⁹ Auki kiro gevenu, “Orogi eraḡiahe.” Vani iaḡa ababu naḡate iauki Iesu ruta oti au uiare gabuva eraḡi, renu iauki vahiḡeta ei au ruta gurahege. ⁴⁰ Iau abu Ioane gare ihare Iesu itahe otine koitava be ramu Simona Petero ḡoḡe, Anderea. ⁴¹ Anderea raki oti au nane Simona ḡanai behuḡare kironu, “Nokamu Mesia behuḡanu” (Mesia makava ramu “Keriso”). ⁴² Gerege Anderea raki Simona nisiḡami Iesu ḡasina otinu, Iesu raki eraḡare kironu, “Ai ihera Simona, aka Ioane moe, eduge negubutu ai ihe ra Kepa iauna rosa” (“Kepa makava ramu “Petero”.) ⁴³ Va tahege Iesu raki Galileia otito ratava vanu. Auki Filipo behuḡare kironu, “Di itahe oroḡo.” ⁴⁴ Filipo ra Betesaida atavara, Anderea mati Petero iau oḡo koitave ra. ⁴⁵ Filipo raki Nataniela behuḡi kironu, “Nokamu Mose aenave mati Peroveta ḡahaia ga ro maemane koitava nokamu behuḡanu. Auka Iesu ra, auka Iosepa Nasareta ata e moera.” ⁴⁶ Nataniela raki kironu, “Nasareta seni iaḡa maḡe bena ororo vanu?” Filipo raki kironu, “Oroḡi eraḡa.” ⁴⁷ Iesu raki Nataniela au ḡasina oroḡege auki eraḡare au gare vi ronu, “Oramu Isaraela koita riaḡa vara, auka avaunaḡe bera au veitera.” ⁴⁸ Nataniela raki beraḡanu, “Orenaki gena a di dibane ḡoinu?” Iesu raki ronu, “Daka idi derikahu ge daki a eraḡanu ihiege Filipo raki a ihiromonu.” ⁴⁹ Nataniela raki ronu, “Di Biage, aka Dirava Moera! renu aka Isaraela Rohivara.” ⁵⁰ Iesu raki kironu, “Ana dakena a da riaḡa ḡahima, badiva da rone daka idi derikahu a eraḡane dainehe? Aka negu iaḡa bauge be eragei gevara ora aviera.” ⁵¹ Auki vasiba ḡahi ronu, “Riaḡa vara daki aki roma, iaka negu va bao raḡare eraḡege Dirava aneruve iabera negu ḡadihi otare mati uguraḡi oroḡi Koita Ḡamika ada.”