¹ Yaka yavahu dibanara, ogo nana ya, so gasina ororovara beta ahakera. ² Eduge, yaka dibanara, yau no daure gahigevene renu no variva ragohane Philippi seni, Ni herovera Dirava senigera, eige noki ga berebe rutagera noki Dirava gare roege isuke uhura. ³ Ni herovera beta no kerere kine eigera, se ni miro ve dainehe gera, se ni daureve dainehe gera. ⁴ Eduge, Dirava no riaga gahigevenei au gare dainehe, eige noki ga ragoha, eige noki ga ragoha beta koita yabara no motea gahi gahisa eduge Dirava dainehe. Yauki ni uhura erageima. ⁵ Badivara noka beta avanage gavara noki oroga, yaka dibanara, se ga nune yau-Dirava ra ni dibanera. ⁶ Noka beta koita yau mageve misa rome noki, yau seni se be yau seni. ⁷ Eramu noka mage misa Keriso gamituhe yau dainehe. Eduge, noka hegiri ruta gera noki oroganu eduge magi be au gamuhe mage gahigevare nagate oroga. ⁸ Guma oige noki yai gahara ragoha, beta Dirava hari mageve uhuragu eduge novahu ni magurive ruta gera. ⁹ Yaka dibanara, ni ogo nanuhe ya, ni meve isuke uhura. Vahimi renu vani noki me kiege, eige noka beta isuke be ya mohigeisa, no Dirava hari mageve mi ioa ragohare uhurahe. ¹⁰ Yama dibanara, renu Dirava tagera, aena uhura, riaga va, daure bera veitera ni meve uhura koita yau. ¹¹ Guma kobuga ei, yaka dibanara no kobakoba ya ruta uiegei, atabe au gamuhe mage gahigevare nagate, ¹² beta ya daure gahigei eduge ya mage gahigei, ya ruta ogigi kobuga ei, Dirava haire uhurahe, aukena ya ihiro geisa au basileia mageve ve uhurahe. ¹³ E dainehe, noki Dirava mage gahi behibehi, ya Dirava gare no ya mohi gevenei, yaki manu beta koita be gare nagate, eduge riaga va uhura, era yai uhurehe gera ya riagane dainehe. ¹⁴ Ya, ni ogo nanuhe ya, yama Dirava dubu koitatuhe gahisa Judea uhura Keriso Iesu dainehe. Badivara yakamu huhu nagohanu, yai ogo nanuhe nagate, Jew yau huhu nagohane nagate. ¹⁵ Yaukaki Iesu renu au gamituhe gahi gevenu, renu no oiagei hakira gohanu. Yauki Dirava hegiri gamiva veitera. Eduge, yauka koita aubougi yau daure gaha. ¹⁶ Yauka besibe ragohime yauki, yauka ura veite noka, itahe gaha ruta ga ragohege yauka maguri misa. Makavara yau daure ve yauki bouga. Eduge isukevara idi geige vara ihie. ¹⁷ Eduge, no yai ogo nanuhe ya, beta tinakibe noki yai veite, beta uhu daure va. Noka ni uhure aubougi, renu hegiri ketake ruta, noka ya erageisa. ¹⁸ Badivara noka ura riaga noka yai gasina orogisa-riaga da, Paul -eduge Diabolo raki da kouvanu. ¹⁹ No gahara raho harera, hegiri, se mage crown va Iesu orogare gahi vahe? ²⁰ Ena beta ai enu? Badivara aka ni haire renu ni hegirivera.