1
Vali vole nile IESU au mohoho tuelo ke toiavege avoe loevelu, loi igalile usege IESU au vuvune vavelu. Munanau toela kavei lovegei abo tai isi hatitite kea doadoaveve ke vuvuneta vavelu.
2
Isi hanavei lavigei avoe taevelivelu ataea DILAVAu adau vuvunele uveve dua ke loui haiveve isi hatititi keta hoeaseavege abo doadoai.
3
Isi tota loui avoe laa tiluaga haubeta agisi tievevale bedoeala teve.
4
La ovolele tige ata vadeu laa agisi oe otovege kele uve avoluvita. Iloho la talivelu aluagaba kalevai teve.
5
Isito ata volea la homasiavei la agisi oe otovue solige la tiluaga lai genau gogoea anakaeabele sesiai teve. Ige abole lai aveve ke ivai kele huhuai loui koseai DILAVAule lo agisi toelatigei.
6
Kateai kotoke lougeto ea kalevai tialea oo igaligali kele ata haivei tievelu, isi hatitite moeaga hoeaseavege doadoaevelu.
7
Kateivale vali nila Galileia kosi kitae Heloda keu IESU avale ke evisi malomaloalu, abo loui avoe isoho DIONI ata babatisoivale ata kela keu voeleale kela keu kobelalu.
8
Isege ata volea loui avoe isoho Ilaidiala keu kobelalu isege volea loui avoe isoho memila be lovetavale ke volela keu.
9
Isege Heloda loui avoe daa louge abo Dioni gobe koisi letuliale kela keu kobelalu bela olela ke ava. Ata vadeula keu ui keava, katealelu olai ata ke ivai.
10
IESU abositoloea kuiakavai loi IESU haivuevelu abo hauai ata haivevale nona keneni. Ige IESU ke lohomegei abo ulaea oo vole Betesedae tievelu.
11
Keveo tievesege ata moeagaea ke evisi lovegei aboe tievelu, ige IESU kelai sisilai hoeaseavelu, isi ataea vaoe tai DILAVAu adau valale uveve dua ke loui haivelu isi hatitite ke hoeasevege kenenia doadoa tilu.
12
Ivaga vau gutuage IESU mohoho tuelo kea loi IESU lavia avoe vau gutualu ata ko hanavege abo tai, vatava kou boto la kou, ige ataea tai abo vue lovi kaoai agisi tai abo oe navai.
13
Kateai louge IESU loui avoe la biagea lovi vavege abo isi. Ige ea laviai avoe, loea valava ada vole isi kualume abuti ke ulaeala koui. Iale a huhuage lole oleveo kateai lovi moeaga agisi vavei.
14
Kosealelugau, malaha ula vai taoseni ige IESU lavige avoe louge abo viviti ai ugulelemalu galasi ada kele.
15
Ige mohohole kea louge ata kea, kenenile ugulelemalu.
16
Isege IESU valava vai ta kualume abutita keta vai Otogoe niai hoeaseavalu isi vakoai otovoloho au mohoho vavege abo agisi ata vavei lotilu.
17
Ige ata bahata kea ke ivaga gogoeabe keneniu haniai ulu. Ige IESU louge mohohoea loviu sigu uale agisi basiketile agivaga tuelo basiketiu ililohoi ulu, ige abo ke agisi tai siti uvue uvale ata ke vavege vesulu.
18
Vali voleo IESU au mama lavialive auvu tilu isege mohohoeabea avor loevelu, ige IESU lavigei avoe ataea loui avoe dau ole dalau?.
19
Ige abo loui avoe ata volea loui avoe Ilaidia alau, isege ata volea loui avoe au memila beloveta keu voeleale ke vole munanau kobelalu.
20
Ige IESU loui avoe isege laea huhuige dau ole dalau, ige Bitau loui avoe aa keu KELISO DILAVAu aa hanavale ke alau.
21
Ige IESU isuta lavigei avoe labeu ko loui ata haivelive.
22
Atau eseule ba vateu tuvu kitae vai ou kosivea dubu naliavale kosi kitae isi Diuia basu loui haivevale ata keale ba homasiavai kavage aule voeleai isito valini abutita igalitaule vesusege aule kobelai.
23
IESU lavigei avoe laa oleu dati tilivelu aluaga au huhui keneni kalei au vateu tuvu agiveve ke huhui kalevaito vali bahata daa lovagei.
24
Iale oleu amiga ula huhualuaga au ba ukolikoli mauli valivelu bele. Isito oleu amiga huhue solisito dii ivile vateu tuvu vai voelealuaga aule ukolikoli mauli vai.
25
Isi oleu vata kole hau moeagate olisi uito au mauli vai DILAVA vavue solilogo voeleige aule oleve kateai ukolikoli mauli vai?
26
Isi olea dii koto ko loulivelu matiai ata haive solige daa loivalela dii ataga isi dii Mamau ataga isi ANELUIA atagale loi, ata ke agigei matitigei kea dii ivi loui ata haive solialelu matiaive.
27
Iale leleve ula daa laa lavigelu evive lavolea ba vovolivelu bele isito abole ui DILAVAu adau vuvune ivaevei toba vovoi.
28
IESU katea louito valini eiti vesusege Bita, Dioni isi Dieimisi lohomegei aboili talau visoe guligulilu vaetievelu.
29
IESU au mama laviai usege vavave keneniu ataga kitaeai ulu, ige ogonave kenenia tobai tae voleai ulu.
30
Isege ata vole abutiu avoluvita nonave ata kea Mouseseu, ILaidiati.
31
Kea ataga kitaeta leleisi avoluvita nonai haivuva, aule au hauivale ke Dielusalemae vesuiavaito kuialai otogoe tai, kelabo ke loui laviava.
32
Ige Bitau voo abutiu keali navai uloho kobekavai atagave kitae ke ivai ata abutiu avoluvita lelesi uale ke ivaevelu.
33
Ke iae ata abuti kea IESU kalei tisege Bitau IESU laviai avoe Kosive, Tisa keule duave baua lai kove uge keu duave lailole dubu atutita igalita koui, aele igali, Mousese vile igali, isege Ilaidia vile igali, Bitau huhue solilu au vadeulau ke louva teteaive.
34
Au ke loui usege goe kitaeu dobai bavugelu ige ea vabu kitae aevelu abo goe ke uvue ueveive.
35
Isege koto voleu goe ke uvue loui avoe, keu di vola keu kotove evive ata ke makalela keu.
36
Nona ke loige vesusege IESU igaliu auvu ulu, ea tetehamai sekiai uge isi ata vole lavige savalu abo ivai eviale ke louive.
37
Keu vesusege vavita ea kuiakavai talala kevaloevesege ata moeaga moeagaea avoe loevelu.
38
Isege mineabe kele malaha voleu ata kea uvule toai avoe Tisa da alaviage dii voo iva, di ese igaliave.
39
Munanau toelau avoele dobage aule kekoai teteisege aiveu sabau lavusege aule kekoagei vali moeaga aule ke agei.
40
Ige daa dai mohoho lavigelu ige ea munana toela lova solilu.
41
Ige IESU lavigei avoe laea koto evie site isi homasiai oivale laa laea, dale valivelu vali bahata laili ui, lalai hauai kateai abolai louto malahale ke laviai avoe ai vo vai koveo lo.
42
Ige voo lekeu loisege munanau toela keu laluvai ela vudiavele vata kavage nive kea vaetilu gobigobiage IESU munanau toela ke lovage tisege voo leke hoeaseavai vai mamave vavulu.
43
Ige ata bahata ke ivai tetehamai DILAVA hoeaseavalu IESU, DILAVA ivile hau moeaga ale ke ivaive.
44
IESU tota au mohoholai loui avoe, daa aike koto ko louge evive ataeale atau ese vai ata vole vavege abole vai kavage aule voeleai.
45
Kateigeto IESU mohohoea koto ke evisito DILAVAu huhuiabe keneni bavuge ea nona kele lulele solilu abo olai IESU belai isito IESU vabuiavale kelu loui belaeve savalu.
46
Isi abo volete belagei loui avoe IESUle lailoi uvule ole igali aule letatavage lailoi kosi kitae olisi.
47
Kateisege IESU huhuiabe ke ivai tai eseu ese vole vai loi au vavale vaeavalu.
48
Isi lavigei avoe oleule dii ivile eseu ese ko vai oe vaeavai hoeaseavage dalau ke hoeaseavalu, isi DILAVAu daa hanavale ketagau ke hoeaseavalu iale la oleu amiga letolevai eseu esea avale kelate aluaga keule ba kosi kitae olisi.
49
Ige Dioniu loui avoe loi kosive loo malaha vole ivage ai ivile munana toela ke nunuveva ige lo laviai kosealu ke kaleva aba IESU voo bele ke ai.
50
Ige IESU abolai loui avoe keluavale ata vadeu kateale age keu lailo agisi toelatie solilu isito lailolau ke dulugeva.
51
IESU eue otogoe tiveve vali loi vuguvugualu ige au tiveve ke huhuaito kalei Dielusalemae tilu.
52
Isi au mohoho vole hanavege unila tiale Samalia ata lavigei ige ea IESU inohole ui IESU loige abo hoeaseavai.
53
Ige oo ke biagea olae solilu IESU loi aboili ulivelu kosealelu ea dibage IESU Dielusalemaegau ke tiva.
54
Kateige Dieimisi isi Dioni kea ke evisi IESU laviai avoe kosive ale olage lai DILAVA laviage au vene hanavage Otogole dobai loi ke vaugei.
55
Kateai louge IESU kelugei lavigei avoe momai aveve katea aevigei.
56
Katea louito kalevai ovoleo tievelu.
57
Abo tievealea kuvau tavae tisege malaha voleu loaleu IESU laviai avoe dale ati tai aa olevetige.
58
Ige IESU avolu loui avoe leleve ula da alavialu aa olai dati tai ovoeale tai abo aeamale navagei, isege uguiale tai abo kanadale navagei isito atau eseu naveve keu ou ue solilu.
59
Kateai louito malaha vole laviai avoe daa lova, ige malaha keu loui avoe kosive usege daa tai dii mama vai abavuito baloi aa lovai.
60
Ige IESU laviai avoe kalege lai tisege vovivovi ataea ba abo voele vai abavui. sito loige lai talivelu ataea DILAVAu adau vuvunevele uveve kotoke loui haivegei.
61
Isege ata voleu IESU laviai avoe Kosive dale ati tai iale da olai luta tai dii ese ivegei toba loige lai tai.
62
Ige IESU avolu loui avoe olea dii haukala kole isuta tiesolisito kuialai au iae niale keu bae ataea DILAVAu adau vuvunele uveve koto ke loui ata haiveve kele ba melialivelu bele, aule homasiagei.