¹ Abo kateisege ata moeaga moeagaea vole lavuvei volele bakutoai loevelu, isege IESU memila au Disaibolo lavigei avoe Balisese atake maligeve dua ave. Kea vavaeabe keu duave isito uvuiabe keu toelalu, ialelu ke maligeve dua ave. ² Abo aveve toela ai mahogovale keale daiai vatavae ui ige abo kotou toela loui mahogovale ketaeale daiai vatavae ui. ³ Iale laa vavile vadeu mahogovai louvale ke ataeale ba valile evisi isi laa vavile sekia ou uvue mugumuguai louvale ke vaitai ou benola lavisi ke loui toige ata keneniale ke evisi loui koseai, kolabo loui mugumuguava vavila ataea navisege. ⁴ Dii kakoluvuia daa lalai louge evive momai ata kavevale ke vabuiavalive, keale vavaula laa kavaevelu isito lailoi munana tuvu lai loili uale ke abo ba kavalivelu bele. ⁵ Isito daa laa haivei, DILAVA igali vabuiavave aule au vuvunele loi ata kaveatiatisi agigei veneu nai hodovue site kele katuge abole navai vesuiavei. ⁶ Isito au ba laele katealivelu bele laea nivele ata kitae. Abo ugu vole eseve kamomo ke abuti vailoi voiage tu beni igali, isito DILAVAu ke nimabigei uva. ⁷ Isito keu lailoi kineu numu keneni dibalela kelu momai vabuagelive laea lai davana keu kitaebaua, kamomo ea davana tu beni ke leivialu. ⁸ Isito daa laa lavigelu olea dii ivi loui ata haiveale ke dale ibilalu ata ke iviloui DILAVAu Anelu haivei. ⁹ Isito oleu da vovohoi dii iviloui ata haive solige dale ata ke ivi loui DILAVAu Anelu haivelivelu bele. ¹⁰ Ige ata koea oleu kotou toela atau eselu louge abole toelave vesuiavai. Isito oleu DILAVAu Munana tuvulu louge aboba vogivilu bele, vato ula kealu voelelu. ¹¹ Ivalivelu abola agigei Dubue kotalivelu tige momai uvualive. Dale vadeu loui lavigei dubu kosiabe ko ke huhualive. ¹² DILAVAu Lauma Helaga Munanau tuvule ba koto aa haivuge ele nonai ke lavige kelu bavualive. ¹³ Kateisege ata moeaga kea uvule ata voleu loui avoe Tisa, louge, dii kakau loi mamau hau vole aliai daelete damu. Loi mamau voeleai au hau kalevai tiale ke. ¹⁴ Ige IESU laviai avoe daba avoti lai aveve ke kaoai lai mamau hau ke aliai lamelivelu bele. ¹⁵ Ige IESU kateai louito lavigei avoe seleivale ata kele lamiga naliave momai hau ke huhu moeagalive. Lake huhu moeagaluaga lai mauli lale vai lehosivai o isu kitaele teve. ¹⁶ IESU ke loui lavigeito donau nona vole lou lavigei avoe hau moeagate ata keu au vule haba kavaga habave keu bai kitae moeaga otovege eu ke ivai lovoi valahue otovevaga valahuveu ililohoi ulu. ¹⁷ Ige loui avoe dale oleve kateai dii lovi otovei isi huhuai avoe. ¹⁸ Daa di valahu lehosivai kitae ula kougei avoele di lovi otovei dii hauta otovegei aule dua ui. ¹⁹ Dale kateale aluaga damiga laviai koseai di vava sisila ulale uso, alu hau moeagau uale ale lahani moeagale tegeve ula isi, sisilai uge. ²⁰ Malaha keu aveve kateale huhuai usege DILAVAu avolu loui avoe aa keu lulele solilu ialelu ale ave vavi kole voelea. Isege ataeale ai lovi ke lehosivai vole vavei amuai isi aa vai abavui taevei abo oteo. ²¹ IESU koto kateale louito loui avoe olea DILAVAu haute kole hauai Taiti ta Obeleni otove solisito loui avoe dii moni moeagala da ko otovege ulu dale kola sitoa vole bosi koui avoele valevile otovui isi ui koseai loui, daa ave nenive lalani moeagale dale di sitoa kole lovi isi sisilai ugei. Ke lousege DILAVAu loui avoe malomalo ata ale vavile voelea ige ataea loi avai abavui ai lovi ke lehosivai isi taevei abo oteo. IESU ke louito lavigei avoe olea abo haute ula huhuai, ogona, lovi, keale malaha kelate ai ata duluge solialelu. ²² IESU kateai louito au mohoho lavigei avoe katealelu daa laa lavigelu aa DILAVAu koto ko loui ata haivei tiluaga ogona, lovi, ee iveve ke huhu moeagalive. ²³ Kosealelu lailoi uveve keu lovi iveve ke leivialu isi lailoi ogona katuveve keta leivialu. ²⁴ Ugu maligeve, ugu kea loviai valahu koui loviu ii, baive lovoi otovue solilu, lai avale kelate aive. Isito DILAVAu ke nimabigei ea lovite ke vaveva vali bahata vavita gututa iale lakea ugu leivigeale kelu DILAVAule lailo duluge dua ke agei. ²⁵ Lailoi uvule ata vadeu au uveve dua huhu moeagaluaga aule oleve kateai au mauli lahani, vagala vai egetisi, keu malomaloalu. ²⁶ Hau eseieve keu laele isuai usege la vadeuluga hau kitae ke huhu moeagava. Kitae keule laele isuai ui. ²⁷ Isi botoe valavasia lalavivale ke ivave, kea loviai ogona kao soliva. Isito daa lalai louge evive, Solomoni keu hau moeagate isi ogona dua aule kolovugei isito ogonave dua kea valavasi siu dua ke leivie solilu. DILAVAla valavasi ke kaeavai agisi otovuge keu duai ulu biage nile, kelate laea nivele duai uge eule vali vavi kele la nimabigei ugei laa toela be ava. ²⁸ Valavasi sii kea ave uito livu tutukai giliai lavi ige ataea bevuai venele vaui. Isito DILAVAu valavasi niale kelate aule laa naligei lovi, ee, isi ogona lamei isito lai evievi keu esealu. ²⁹ Ialelu momai ee ta lovita huhu moeagalive. ³⁰ Eviesite keala vatau hau huhu moeagava isito lai Mamau Otogoe uale keu laele hauia ue soliale ke ivalela, aule ke lamei. ³¹ Isito lale luta lai Mamau Otogoe uale ke kuvave kaoai ivaito laviage aule vale vile keneni lamei. ³² Ialelu dii esea momai vabu kalevave, laea moeaga olie solilu. Isito DILAVAu au isivile laa hoeaseavale kele laeale adave vuvune kele uve. ³³ Kateale lale lai hauke agisi ataele voiai moni agisi ata haue site ke vaveve, lale kateale age Otogoe ai moni boseave keule vuluai ui alu. Ige keveo lai haule moeaga moeagaeale ililohoi ui ige atau ba vavoloalivelu bele, ige segeleu ba boilivelu bele. ³⁴ Iale vali bahata lai hauia uale keveo lai lutiu baile ke huhuai ugei. ³⁵ Daa nona vole louge evive mohoea lai ogona egete ke vukai lai beletita bisi, lai lameba vaui agisi tai lai kosive inohole uve. ³⁶ Kosiveu abo vole lohomegeale ke ivalivelu tialeu ai ke kuialai loiva aule loi anaka kavai kelokage soleka avolu anaka alavalu. ³⁷ Mohohoeabe kea aveve dua ai abo kosive inohole ualelu loui kosiabeu loige ea ivai sisila kitae avolu aevelu. Ige kosiabeu louge ea ugulelemai usege eu au ogona vukai tai abolai vasiai vavege eale e isi. ³⁸ Isoho aule vaviu minale mohohoeabea nita uluaga abole ivai sisilai. ³⁹ Katealelu ko huhuave isoho ou biage keu vavoloea atau loiveve keu ke huhuai aule nita ui tigei au ba nalivelu bele, ige vavolo atau loi ove vusai vavoloalivelu bele. ⁴⁰ Ialelu lata nita uve atau eseu loiveve valike nii lai diba solisege aule ba loi. Kelu vali bahata guliguliai, noinoiai ugeve, IESU loiva. ⁴¹ IESU kateai louge Bitau laviai avoe au lo ulalaiga aa ke louva, bela ata bahata kelaiga ake louva. ⁴² Ige IESU avolu loui avoe la olea evievi ata olisi kele luleleale kelaiga daa ke loulu. Iale kosiabele abolai louge abole ove ke naliai ba ese voleta naligei lovi vavei. ⁴³ Isege kosiveu tiale keule tota kuialai loluaga mohohoeabea hau dua ale ke ivai abolai sisila kitae ai. ⁴⁴ Iale leleve ula da la lavigeva kosiveule au mohoho ke letatavege abole hauve keneni naliai. ⁴⁵ Isito kosiabe keu oge voleo tige mohohoea loui koseai keu oge voleogau keu tilu. Keu ba solekai lolivelu bele isi ke loui au kosive hau mohoho keali vole kavei lovi kitae isi eeu toela keta ige kineabeu toelalu. ⁴⁶ Ivaga vali voleo kosiveu loiveve ke huhue solisege aule loi vole ke ivai. Au ale ke evisi kavai hauvele kokiage aule talivelu mulimuli ata keali ui. ⁴⁷ Keu kosi ke isivive dibalu isito alivelu homasialu katealelu aule vatetuvu kitae vai. ⁴⁸ Isito hauve avale vove voleu diba solisito toela vole aluaga aule vateutuvu eseve vai. Kosealelu DILAVAu lulele isi vuvune kitae ata ole igaligalia vavei olale ea lulele kitae kele hau kitae ai. Isi ata olea au lulele isi vuvune vaveale keale kele avolu hau eseieve aevei. ⁴⁹ IESU tota loui avoe dale loluaga vata ko vaui vai toelatisi isito daa ola aike vene ke beige au nai. ⁵⁰ Dale vaoe babataisu nii vole ai, iale daa olai vaeu tuvu ke solekata vage vesui, IESU au voelelau ke louva. ⁵¹ Iale la huhuige ataea voleali udualuga da vatae lolu, be daa kateale loie solilu. Isito ataea vole alialiveluga da koveo lolu. ⁵² Iale ave vali kole ese ada igali keale vole aliagei ese abutita igalita keale ivi voleo isege ese abuti keale ivi voleo, voleale dii ata olisege voleale daa vai toelatisi. ⁵³ Iale Mamaule au eseali vole kavesege eseale abo mama luvita vole kavei. Aiale au esealive vole kavei ige aiale au vaeati vole kavege vaeaveule au aia vaeati vole kavei. ⁵⁴ IESU kateai au mohoho kela louito ata bahata lavigei avoe lai aveve keu kosealu lale valiu dobavale keveo ivage goea daiage lale loui koseai veniule loi, ige aule veniu loi. ⁵⁵ Isi lale ivage hebulu lohoe loige lale koseai valiule kalui tuvuai ige aule tuvuai o vuvuneai. ⁵⁶ Isito laea seleavale ataea la vata ivai Otogo ivai lulelealu isito laea aike laele loivale kela huhue solilu. ⁵⁷ Vadeuluga laea lamiga hoeaseavai aveve dua kaoai lamiga hoeaseava solilu. Oleve keu duave isege oleve keu toelave amigalu duavelu niai va, toelave vai toelava. ⁵⁸ Iale isoho malaha voleu olai la agigei kota=lu tige memila oe lavia avo ugulumai nona ke loui vai lilikative. Lale kate solige lai bahoe vole keule la lohomegei agisi kotau ataea tige ata keule la agisi bulisi vavege ogona bukatea la agigei dibulae hanavei. ⁵⁹ Iale da la lavigei laeale dibulae uluaga lale hauivaga abo bata lameale keu vesuge dogoai lai oe teve toela ibilave avalu.