¹ Vali vole nile IESU vatava voleo tialeu guligulialeu vesusege Disaibolove voleu loaleu laviai avoe, KOSIVE, guliguli kuva loo haive Dioniu au Disaibolo haiveale kelate ata lo haive. ² Ige IESU abolai loui avoe laa noinoialuaga kolate louve, loi Mama loi olau ata bahata ai iviu tuvu hoeaseavagei ilivelu ivivela ai vatau dogau loi. ³ Isi valiu ni igaligali kele lovi loamege. ⁴ Isi ata volea lolai aveve toela age lo toelaeabe ke huhue solige aule loi toelate ke uliai ke momaeava isi momai lo kalevege lo setene toelale otolovalive. ⁵ IESU guliguli nonake loui lavigeito kalei abolai nona vole loulu, isi loui avoe isoho laa voleu vavile tialeu au kakolo ola velevai laviai avoe dii kakolo aele lovibe abutita igalitau uge vai damu. ⁶ Dii kakolo voleu dae loige dii lovibeu ue solilu. ⁷ Ige isoho eule alu loui koseige dii niu hanita lehosiva kale da anaka bavui dii eseali navalu iale daba lovibe amulivelu bele. ⁸ Ai kakolou koto kateale louge ale vadeuai isito da lalai louge evive au kakolove olialelu loui au ba kaobelai amulivelu bele isito au ba matialivelu bele isito ananka kavai luluai uvagaule ba kobelai lovi amui. ⁹ Iale daa lalai louge evive lale DILAVA laviage aule lai ola ke lamei isi vole kaoaluaga ba vave isi lale ou anaka kavai kelokage aule lalai anaka alavai. ¹⁰ Kosealelu olea DIALVA imiliavage aule kea olale ke vavegabo agisi isi olea anakave kavai kelokage aule abolai alavai. ¹¹ Laa oleu eseveu kualumelu olage au mamaveule valivelu ute kavai vai vavui. ¹² Isi au ugu unilu louge au mamaveule kaeko kavai vai vavui ba lale olaebe ke ai abo louale ke vaveve. ¹³ Laea aveve toela avale ataea isi laea lai ese ke hoeaseavei olaeabe ke vaveveve ke ivalu kelate lai mamau otogoe uvale keule la laviage aule au munana tuvute lamei. ¹⁴ IESU malaha voe uvute ke vilele munana toela lovegelu. Munana toela keu avoele uge keu koto solisi ulu isito munana toela ueseolisege malaha keu kotoai nonage ataea ke ivai tetehamalu. ¹⁵ Isege ata volea ke ivai loui avoe munanau toela kitaeabe Biesabolo ke siauvelegau IESU munana toela ke lovegelu. ¹⁶ Ige ata volea IESU seleavai laviai avoe baito hau melite vole ogogole age loo keivai, koseai mana DILAVAla aa hanavalu. ¹⁷ Kateai lousege IESU huhuiabe ke ivai abolai loui avoe, vata igali kele ataeale vole bemotoai voleali vole kaveluaga abo ba ui egealivelu bele. Ige aia mama igalia vole aliai abo volete kaveluaga abo ba uge egealivelu bele abole vesui. ¹⁸ Iale kelate seteneu atateale vole alia vole kaveluaga abole oleve kateai, keu toelalu. Laa loui kosealu setenela au munana toela damuge da ko ave isito keu kate solilu. ¹⁹ Dale kateai seteneu vuvunele munanau toela lovegeio nunuvei isege lai eseale oleve vuvune kele seteneu munana toela lovegei. Iale lale lai ese belageve abole loui koseai DILAVAu vuvunelega loo ke lovegeva. ²⁰ Ige data DILAVAu vuvunelega munanau toela ke lovegeva. Kateige lale ke ivai huhuige DILAVAu vatava dogave keu vuvuneu laele lolu. ²¹ Ata goadate keule au kuma vai au bii vai au oo nimabisi ugei, ove hauve keale uduai. ²² Isito ata melite keu loluaga loi ovele velevai kavai kumaveta biveta agisi hauve agisita. Donau nonalega daa ke louva. Laa luleleige daa loi setene kavai atave toelata nunuveva. ²³ Iale ata olea daa dulua soliale kea daa vai toelativale, ata voleala kea. Isi olea daa duluai ata agisi loie soliale kea ata ke nunuveva. ²⁴ Daa koto vole louge evive munanau toela keule ata vole kalevai talivelu eu uesoliale vatava kaoai tota huhuai loui koseai dale kuialai talivelu daa ole ulogo loale kele tai ui. ²⁵ Kateai kuialai loi ataleke ivage haube toela uvuvele ue solilu. ²⁶ Ke ivai tai au kakoluvu melite ula seveni ata keu uvue otolovai ulu. Ige ata keu toelau luta esealu isito ave toelaveu kitaealu munana toela eiti avoele uge. ²⁷ IESU kateai louge keate voleu ata moeaga kea uvule lavisi IESUlu loui avoe aa vaeavai aa amu vavuale keate keu alu sisila kitae alu. ²⁸ Ige IESU avolu loui avoe ito o mana, ataeau DILAVAu nona evila ai ba sisila kitaeava. ²⁹ Ige ataea bahata vole bevuai loi IESU vavale ugulelemai vovovai voleta dai lavia avoe IESU ivai teteivale hau ke vole age loo ivai. IESU abolai loui avoe ave esete koea laea eseu toela ula lalaea, daba laa louai ke alive bele isito Beloveta Dionau ale kelate data ai. ³⁰ Memila Beloveta Dionau vali abutita igalita nile kualume vole bosiu uvue uge Ninive ataea ke ivai DILAVA vai lelevetievelu. Iale ave valiko nile atau eseule ataele aveve kelate ai. ³¹ Iale DILAVAu kotau vali kela vata vole kuini Siba keule kobelai lai aveve toela ke laele lou. Keate ke oge volela Solomoniu luleleai ata haivevale ke evisi ivalivelu lolu. Isito daa louge evive, ata voleu Solomoni leiviale kela keu lai minale uva isito laa kotove evie solilu. ³² Iale vali kela Ninive ata keale ba kobekavai lai aveve toela ke laele loui kosealelu Dionau ata ke haivege ea evisi abo avale toela ke kalevalu. Isito da koto ko louge evive ata voleu Diona ke leiviale kela kou lai louge evive. Ata voleu Diona ke leiviale kela kou lai minale uva isito laea kotove evie solilu IESU amigalau ke louva. ³³ Atabeu lameba vaui vai betiu valae vaeavalivelu bele. Isito aule vaui vai vakovale lovovele vaeavage ou uvu atagage ataea ele uevei. ³⁴ Lai nii keu lai vavale lameba late lai niu duage lai uvule atagai isito lai niale toelage lai uvule gusuai ui. ³⁵ Ialelu loui huhui dua ave oloivaga lai uvu atagale keu gusuava. ³⁶ Isito lai uvu bahatale atagau uge beu ba loai ulivelu bele isito aule atagale keu atagai ula ke alu. ³⁷ IESU koto kateale louge vesusege Balisese ata voleu laviai avoe daa olai ati lovi isi, ige IESU ove uvue tai avoti lovi ilu. ³⁸ IESU au ada toto solisi avoti lovi ilu ige Balisese keu ke ivai tetealu. ³⁹ Ige IESU avolu loui avoe Balisese ata laea lai aveve keu abo melegita kabusita vava totoai to uvuve ke toto soliale kelate ataea lai vava ivage keu duave. Isito lai uvu kele huhui huhui toela moeaga ulu atau haute agilivelu. ⁴⁰ Laa kea DILAVAu avale kele lulele solilu DILAVAu olale lalai uvuta lai vavata hoeaseavave. ⁴¹ Iale lai uvu keu duaveage lale hauveu ue solivale ata ke dulugeve ige lai vavaule duave olisi sisila kitaele ui. ⁴² Isito laea kate solige Balisese ataea laa nohovu, laea lai vule lovi agisi taiti otoveito ata hoeaseava solisi DILAVAta huhue solige keu toelalu. ⁴³ Iale Balisese ataea laa nohovu. Laa kea olavale dubu uvue talivelu voumu duale ugulelemagei isi talivelu ata moeagaea uale kela oagei ige abo laa ivei laa hoeaseavei. ⁴⁴ Iale laa nohovu laa kea alu vuta late ataea tatave laa dai tai, dai loito diba solilu. Ataea vovige abo kele abavugelu ige kea keveo sakavai ulu. ⁴⁵ Katea louge Diuia basu loui haivevale ata volea lavisi avolu loui avoe kosive aa koto kateale louale keu lotaga aa ke loulu. ⁴⁶ Ige IESU lavigei avoe ata haivevale laa nohovu. Laealai basuale nona keula eula nonai belalai oivale laa nohovu, laa haiveito haule duluge solige keu toelalu.` ⁴⁷ Iale laa nohovu, memila lai vavivuia DILAVAu Beloveta kavege vovoale kea vutala kaeavai valavasi kai loui koseava, lo Beloveta hoeaseavaeviva. ⁴⁸ Laa aveve katealeluga lai vavivuiali volelate kosealelu lai vavivuia Beloveta ke kavege vovolu. Ige laa kea vutaeabe kaeavai hoeaseavale kele lalai vavivuiali huhui igalialu. ⁴⁹ Katealelu DILAVAu memila au lulele nona vole loulu isi loui avoe dale Beloveta isi di koto loui ata haivevale vole hanavege tige ataeale vole kavesege vovosege voleale vateu tuvu agisi ui. ⁵⁰ DILAVAu koto kateale loualelu ave atateale vateutuvu agisi. Kosealelu DILAVAu vata asege ke iae lai vavivuia Beloveta moeaga moeaga kavelu ige laea lai vavivuiali aveve igalialu. ⁵¹ Abo iviavai Eibolo kavaeavelu isi kele lavisi Beloveta kavei loilogo ivivela Sekalaia ta kavaevelu, kavale keu dubuta vuleta vitale mina kele kavage voelealu. Ialelu dala lavigei kosealelu DILAVAule vateu tuvu kitae ave atatela kolai hanavai. ⁵² Ialelu talavatu avale atala nohovu. La lulele umuka mahogovai ataele koto leleve vovoholu katealeluga laa olae solilu DILAVAu koto evilivelu. Isi ata bavugeva DILAVAu koto evilivelu asege. ⁵³ IESU abolai kateai loito kalei tilu isege Diuia talavatu avalea keake evisi Baliseseali avolu tuvualu. ⁵⁴ Isi nimabisi olale aivele nonave volea toelaga abo vai kavage voeleai.