¹ IESU au aveve kateale age vesusege ke iae au mohoho seveniti agisi olale abuti butiai hanavege ea unie tievelu, tai ata haivei tisege IESU ba lovegei tai. ² Isi lavigei avoe lovi moeagaea vovoai baeai ulu isito lovi agisi valahu uvue otoveve ataea ue solilu ialelu vu viage kelu guliguliage au lovi ke agisi vavalahue otoveve atate hanavege abo lolivelu bahata agisi oe otovei. ³ Isitota loui avoe lakea mamoe ese late to tobaluia uvule daa laa hanavelu. ⁴ Laa talivelu aluaga moni moeaga isi tamakata vategei talive. Isi kuvau tavae ataele daiai aboili nona kalevave. ⁵ Talivelu laa oo vadeule kadivai tai uluaga oo ke biage hoeaseavege. ⁶ Ige abo lai koto evige lake hoeaseavegeve lai koto keule aboele siauai oo vuvuneai isito abo lai nona ke evie solige lake hoeaseavege keu aboele vuvunealivelu bele. ⁷ Abolai koto evige momai ba oo voleo talive isito oke igalile uve isi abo lovi vadeu lamege ive. Kosealelu laa dii lovi ale ke ibilavela abo lovi lamelu. ⁸ Laa oo oleveo keveo tige ataeau laa hoeaseavei lovi lamege keive. ⁹ Isi oo kele ata haluluvitea uge ke hoeaseaveve isi lavigei kkosea, ataea DILAVAu adau vuvunele uveve valiu aike vuguvugualu. ¹⁰ Isito laa ooo olevekeve tige abo laa hoeaseave solige kalevei talivelu oo ke ivila lavisi ba abola louve. ¹¹ Lavigei loui kosea lai ou gogoea loi genau votole uale kela lole tota lai ole sesiai iale ko ivai huhuave ataea DILAVAu adau vuvunele uveve nona ko loo vai loige laa avolu homasialu. ¹² Iale kelu daa laa lavigei DILAVAu kotau vali niu loiva ige aule vata vai kotole vaeavai vateu tuvu vavei memila Sodoma Gomola ataeau agiale ke eseve isito keale ba vateu tuvu kitae agisi. ¹³ Kolaseni ataea laa nonovu isi Beteseda ataea laa nohovu, vateutuvu kitaeule ba lalai loi kosealelu daa lalai teteu hau moeaga lalai alu ivaga laa toela moeaga huhuai kuiakavai toelale tilu memila Taea ta Saidoni ta keve da hau kolete age abo evisi ogona bukate katui uti boisi abo kinele katui uvuai uevelu isito laea kate solilu. ¹⁴ Ialelu DILAVAu koto valiu niu loige lale ba vatgeu tuvu kitae agive isege Taea isi Saidoni keale vateu tuvu eseve agisi. ¹⁵ Isi Kabenamu ataea da lalai louge evive laa kea lamiga letatavage eula otogola otovei isito daa laa lavigei laa keale veneu nai hodovue soliale keveo teve tai nanave. ¹⁶ IESU kateai au hau mohoho lavigei avoe abo lai koto eviluaga di kototagabo ke evilu, isi oleu lai koto kavage dii kototagau ke kavalu isi daa hanavale ke kotove tagabo ke kavalu. ¹⁷ Iale vali voleo ata bahata seveniti kea kuiakavai sisila kitaeata loevealea IESUlu loui avoe loi kaka, loo ai ivile munana toelaea loi koto evievelu. ¹⁸ Koto kateale louge IESU lavigei avoe laa aveve kateale age da ivage vaelau leale kelate seteneu vuvune keu solekata vesulu. ¹⁹ Dii nona evive daa meli lameale ke ba lai vaoe setene keu vuvuneu bae laele melialivelu bele ialelu, laa uteu toela isi kaeko kele dage au ba laa uagelivelu bele ige aveve toela ba la lehosivalivelu bele. ²⁰ Momai munana toelau lai koto eviale kelu sisilagelive isito lai iviu otogoe uale kelu sisilave. ²¹ Kateivale valike nila munana tuvuteu IESU vai sisilatige IESU sisila kitae ai au mama hoeaseavai loui avoe au otogota vata kota kosive kitae, aa ai lulele site ke vavelu isito vatau ataea abo lulele ke agisi letatavai abobiga agisi eula otovege aa ke lulele vave solilu, dii mama aa kateale ale keu ai ola ula kelu da aa hoeaseavalu. ²² IESU kateai louito ata lavigei avoe dii mamau hau moeaga damulu ige ataeau voveta mamaveta huhue savalu isito mamave igaliu au voo ivai huhualu iale voveule lulele ata vole vavege avole mamave ivai. ²³ Koto kateale louge vesusege au mohoholai loui avoe laea duave laa bahata daa vadeu avaleke laa ivalu. ²⁴ Isito daa laa lavigei evive, memila belovetaea isi vatau kosive moeagaea olale la ivale ko ivai isito iva savalu isi abo olai la eviale ko evisi isito evie solilu. ²⁵ Kateisege basuale nona loui haivei oivale malaha ke voleu IESU seleavai isi kobelai lavisi loui avoe Tisa, dale vadeu ai valivelu ukolikoli mauli vai. ²⁶ Ige IESU laviai avoe bukau uvue abo kisaiale ke aa oleve kateai dodavalu. ²⁷ Ige malaha keu laviai avoe ai uvu bahata ai ola bahata ai meli bahata isi ai lulele bahata agisi ai kosive kitae DILAVA vavui hoeaseava isi aa biageu amiga hoeaseavale kelate ai kakoluvu keta isi abolai olai hoeaseaveve. ²⁸ Ige IESU avolu loui avoe ai koto keu leleve ula ale ke ai ba ukolikoli mauli vaso. ²⁹ Ige malaha keu ata duluge solivale atalu loui IESU belai loui avoe dii kakolola ole. ³⁰ Ige IESU malaha ke laviai avoe malaha voleu Dielusalema kalei Dielikoe tisege lasikoloea kuvau tavae bavui kavai ogonave davuai vai vaeavage nibedai nai ulu. ³¹ Nai usege Diuia dubu naliavale ata kitae voleu kuva ke igalila loaleu ke ivai gogoniai tilu. ³² Livai ata vole kuva kela loaleu ke ivai kalei tilu. ³³ Isege Samalia ata voleu kuva ke igalila loaleu ke ivalu isi uvualu. ³⁴ Isi tialeu abo kavale okeve ke hoeaseavalu isi mulamula vavui vai au donikile vaeavai vai loaleu ovolele vaeavai hoeaseavai avoti navalu. ³⁵ Vavita talivelu moni vole bosi oo ke biage vavui laviai avoe moni kola duluai tige, moniu vesuge aele ta dulua ige da kuialai loi ba ai moni davana amui. ³⁶ Nona kateale louito malahale ke lavia avoe aa huhuige malaha abutita igalita kele oleu ata keti kakoalu. ³⁷ Ige malaha le keu IESU laviai avoe ata keu avolu uvuai hoeaseavale ata keu, ige IESU laviai avoe keu leleve, iale ata talivelu au ale kelate ata aso. ³⁸ IESU nona kateale louge vesusege au mohoho ke lohomegei tievelu keate vole ivive Mata keu oe tige eu agigei au oe otovelu. ³⁹ Isege kove Meli keu oo kele ulu iale IESU koto louge eu genave vavale ugulumai ui IESU nona evisi uva. ⁴⁰ Isege Matau auvu lovi vaulogo Melilu tuvuai ulu, isi loi IESU laviai avoe kosive au a huhuige dii kou daa dulua solisito keve ugulumai uu ulage au keu duave, au ale hanavage loi da duluai. ⁴¹ Kateai louge IESU laviai avoe Mata aa keu gogou haniale ke huhui moeaga alu, isi kele huhui huhui moeaga alu. ⁴² Isito dii kotou dua evive keu kitae iale Meliu kelu olai valu iale ata beu ba avoele valivelu bele.