¹ Paurusi, mukandorongo wa Yesusa Kristusa, namunyendi Timotheusi, kwa Filemoni, muholi wande wakuhora namuruwani unyetu, ² ntani kwa Apiya mughunyetu wamukadi nakwa Arukipusa mukavita ghunyetu ntani nka kuNkirishe oyo ya yapongango mumundi ghoye. ³ Nkenda yikare nanwe ntani mpora yakutunda kwa Karunga Shetu ntani Hompa wetu Yesusa Kristusa. ⁴ Ame kehepano kupandura Karunga opo ani mutwenya mundaperero dande, ⁵ mukonda ashi ame nayuva vyakuhamena kilipuro olyo mwakara nalyo mwa Hompa Yesusa na shihoro osho mwakaro nasho ku vantu navantje vakupongoka. ⁶ Ame kuna raperera ashi likugaununo lya mapuro ghenu litike mo, mposhi ngamu kwate lighano lyakuyulilira kuna vintje vya viwa ovyo twakara navyo mwa Kristusa. ⁷ Nakara naruhafo rwarunene na lishengawido mukonda yashihoro shenu, mukonda ya dimutjima da Karunga vapongoki dina vakoreke murwenu vaunyande. ⁸ Makura na mpindi nakara nankondo dadinene da kumurawira anwe muruwane ovyo muvhura kuruwana. ⁹ Mukonda ya shihoro mbyo nakumupura ame, Paulusi, mukurupe wamukafumu weno mudorongo kwa Yesusa Kristusa. ¹⁰ Ame kuna kumuromba aanwe kuhamena monande Onesimusa, ogho narukita vava muma ghuketanga ghande. ¹¹ Akaliro kundereko mulyo kwenu, kondashi weno anakara mulyo kwana tuvantjeya, kwenu na kwande. ¹² Ame nakumutuma avyuke ku kwenu, ogho akaro mwakehe mutjima. ¹³ Nashanine kumu pangure ghuye mwande ambatere opo nakalire mumauketanga mukonda ya Mbudi yaruhafo. ¹⁴ Ano ngoli kapi nashanine kuruwana kehevino vininke pahana likuyuvho lyenu. Kapi nashanine viruwana vyenu vyaviwa vitunde mumulyo, ano ngoli kulikuyuvo lya liwa. ¹⁵ Pamwe, kwevino mbyo vamuhangwilire kwenu pakarugho-ghona. Makura, ngamukare naye nanaruntjeya. ¹⁶ Kapi nka nga kara ghuye shipika, ano ngoli hasha kupitakana shipika, mughunyande waku hora. Ghuye wakuhora, shinenepo kwande, ntani nka nakonka koye, namuntjeya pa nyama ntani mwa Hompa. ¹⁷ Nange munantura ame yira muholi wenu, mutamburenu yira ndje ame. ¹⁸ Nangeshi amu djona ndi amukorota kehe vino, ngamuvipure kwande. ¹⁹ Ame, Paulusi, nakuvitjango namaghoko ghande. Ame naghumwande nganivivyuta muku vifuta, kapishi ngamu twenye ashi anwe mwankorota ame, anwe naghumwenu! ²⁰ Nhii, vaunyande ndenkenu niwanenemo mauwa mumwenu mwa Hompa; hafutenu mutjima wande mwa Kristusa. ²¹ Neghedenu vya kuhamena likuturomo lyenu, Ame kuna kuvi tjangera kwenu, ame nayiva ashi anwe ngamu viruwana kupitakana omo namu pura. ²² Pashi rugho ntjosho, wapa yikenu ndjugho yava genda vande, ame nakara nalihuguvaro kupitira mundaperero denu ame ngani vi muvyutira ku kwenu. ²³ Epafurasi, muna dorongo unyande mwa Kristusa Yesusa, nakumu mororapo. ²⁴ Va Marukusi, Aristarchus, Demasi, ntani na Lukasi, varuwani vaghunyande. ²⁵ Nkenda ya Hompa wetu Yesusa Kristusa yikare na mpepo denu. Amen.