¹ Opo akavyukire muKaperinaghumu mumayuva ghamashesha, kwayuvikire ashi pamundi akalire. ² Mbunga yayyinene kwapongire livhango kwa yulire, Napalivero mpopanoshi, makura Yesusa mpo aghambire nkango kukwavo. ³ Varume vamwe kwayire kukwendi vayite shirema wamundambo, vantu vane vamudamunino. ⁴ Opo vapilire kuvhura kumu shweghenena mora mbunga, avaghupupo mbando yandjugho omo akalire Yesusa Opo vatominine limpe, ava sheghumuna mbete oyo varangekire muveli. ⁵ Amone lipuro lyavo, Yesusa aghamba kwamuveli, ''Monande wamu mati, ndjo doye vana dikughupirepo.'' Pashirugho osho, ⁶ Makura vamwe valirongi matjangwa mpo vashungilire, ava ghayara munda yadi mutjima davo, ⁷ ''Weni avhura kughamba ngolighuno murume?'' Muvikupaki! Are wakuvhura kughupirapo ndjo, nkwandi Karunga pentjendi?'' ⁸ Mpopo tupu Yesusa aviyivire mumpepo yendi ashi vinke vana kughayara munda yadi mutjima davo. aghamba kukawavo, ''Mukonda munke muna kughayarera vyaweno munda yadimutjima denu?'' ⁹ Vinke po vya ureru, mukutantera mukafumu washirema ''ndjo doye vanadikughupirepo,'' ndi kughamba, shapuka, damuna ghuro ghoye, yenda? ¹⁰ Mposhi muvure kuyuvha ashi, mona muntu akara naghuna nkondo kuntunda ya livhu, mukughupirapo ndjo. ''Kwa ghambire atantere shirema wamundambo. ¹¹ ''Ame kuna kukutantera, '' Shapuka, damuna ghuro ghoye, yenda kumundi ghoye.'' ¹² Ashapuka mpopo, waro adamuna ghuro wendi, arupuke mundjugho kumeho yakeheghuno, navantje vyava pire shitetu, Ava tanga unene waHompa Karunga ntani ava ghamba, ''Ndatwakara tumone vishoroke vinke vya kufana ngoli? ¹³ Mpo ashapukire ayende kulidiva, waro mbunga nayintje kwayire kukwendi ghuye atapa marongo kukwavo. ¹⁴ Opo ayapitire, amono Levi monarume wa Alufeghusi anashungiri kutende yavafutiti mutero, makura amutantere, ''Nkwame'' Ashapuka amukwama. ¹⁵ Yesusa kwalire ndya mulipata lya Levi, vafutiti mutero vavangi kumwe navaka ndjo kwalire kutafura kumwe naye ntani navarongwa vendi, vavangi ava mukwama. ¹⁶ Opo vamonine varongi matjangwa vaFariseyi, vamone Yesusa kuna kulya kumwe nava kandjo ntani nava futiti mutero, avaghamba navarongwa vendi, ''Mukonda munke alyera kumwe nava futiti mutero navakandjo?'' ¹⁷ Yesusa opo aviyuvire agahamba kukwavo, ''vantu va murutu andjewa-ndjewa kapi vapumbwa mupangi, nkwandi vaveli mbo vahepa ghumwe. Kapi nayera kwava pongoki, ano ngoli kuva nandjo.'' ¹⁸ Makura varongwa va Yohanesa mukushi nava Fariseyi ava kara mulidiliro. Vantu vamwe avaya nakughamba kukwendi, '' Mukonda munke varongwa va Yohanesa nava rongwa va Fariseyi vadiliranga, ano ngoli varongwa voye kapi vadiliranga. ¹⁹ Yesusa ava tantere, ''Ngoli shiri kuvhura vakalipo pa nkwara vakere na lidiliro ntjene ashi mukwali mpwalipo? Ntjene tupushi mukwali naye vana kara, kwato kudilira. ²⁰ Ano ngoli mayuva ngaghaya opo ngava mughupamo mukwali mumwavo, mumayuva ogho, mpo ngava dilira. ²¹ Kwato ghumwe wa kuvhura kuhondjera shivando shashipe pashidwata shashikuru-kuru kuvhura shitundepo nangeshi shitundepo ghupe ghutundepo kughukuru-kuru kutaghuka ghunene. ²² Kwato ghumwe wakuvhura kutura marovhu ghamape mushipapa shamarovhu ghamakuru-kuru. Nange ngoli marovhu kuvhura atughure shipapa makura kukombanita marovhu ghamape kughutura mushipapa shashipe.'' ²³ Muliyuva lyaSabata, Yesusa kwayendire vapite mumafuva gha mbuto makura varongwa vendi ava vareki kutjora dimutwe da mbuto. ²⁴ Vafariseyi ava ghamba kukwendi, ''Komonenu mukonda munke vana kuruwanena vininke ovyo vapira kupulitira muliyuvha lya Sabata?'' ²⁵ Ghuye avatantere, ''Nda mwakara kuvarura ashi vinke aruwaghanine Ndafiti, kovyo ashanine nampopo ghayuvire ndjara naye navakafumu ovo vakaliro naye. ²⁶ Weni omo ayendire mundjugho ya Karunga pashirugho sha Abiyatara ndje mupristeli, ntani alire mboroto ya kukarapo ntani apireko dimwe kovo aka lire navo?'' ²⁷ Yesusa aghamba, ''Sabata kwaliruwanena vantu kapishi vantu yakarerapo Sabata. ²⁸ Mpongoli ashi, Mona muntu hompa, nampili mu Sabata.