¹ Ba hitha mo lethakoreng lengwe la lewate, mo kgaolong ya Gerasenes. ² Ha Jheso e jwa mookorong ,monona wa moya ye e mashwe a jwa mo riphuphung. ³ Iye e rula mo riphuphung, go sina yo gka mo tshjwara, le gka rikeetane tjotja. ⁴ Iye a bohilwe gka rihaka le rikeetane ,e ri kgaola ri be ri phatalala. Go sina nngwe yo o na le tjhatjha ya go mo tsjhwara. ⁵ Bosigo bongwe le bongwe le leatsji lothe a le riphuphung le rithabeng, Iye e lelela gorimo a itsjhega gka majwe uwa a bogale. ⁶ Ha e labela Jheso a sha ikgakadjana ,a ragoshela goye a obama ha pele gagwe. ⁷ A lelela gorimo a re " iye gka go riha eng Jheso ,morwa Morimo yo o igorimo rimo, ke go kopago ,she mpogise." ⁸ Jheso iye e mo raya e re "jwa mo noneng weni moya ye mashwe." ⁹ A mboja a re ,"lebijo la go ke anye?"A mo araba a re, "Lebijo lame ke Legion ,gka he bantsi." ¹⁰ A mo kopa gka tswee-tswee gore a she mo romele gkaite ga lehelo le o mo golo. ¹¹ Ga bo go le shegopa sha rikolobe she hula ha lijweng. ¹² moya ye e mashwe ya mo kopa ya re , "he romele mo rikolobeng je, he tsjene mo gojo. ¹³ A letelela moya ye mashwe go jwa mo goye e tsjena mo rikolobeng, mme shegopa sha rikolobe she gka tsjhwara riketje ri le riberi sha ragoshela mo lewateng sha kgwangwa ke maze. ¹⁴ Barisa ba rikolobe ba ragoshela ritoropong le mezana e hautshwane go ya go beshela bangwe gka tjihagalo e. ¹⁵ Ba da go Jheso ba bona monona yo iye e tsjeninwe ke Legion a le mohong a siame heri mo thaloganyong, mme ba tsjhoga. ¹⁶ Mba iye be bona monona yo iye e tsjeninwe ke matimona, ba kela bangwe gka bodalo, le gka rikolobe. ¹⁷ Ba simolola go mo kopa gka tswee-tswee gore a jwe mo kgaolong yabo. ¹⁸ Ha e tsjena mookorong , monona yo iye e tsjeninwe ke matimona a mo kopa gka tswee-tswee gore a doge naye. ¹⁹ Mme Jheso a shegka a mo letelela, a mo raya a re ,"Doga o ye bagonyeng, o ba kele she Morimo nte a she go rihela le gka gko iye a go uzwejaborogko." ²⁰ Mme a doga ,a simolola go rurihaja bilo je bigolo je Jheso iye a bi mo rihela Decapolis, mongwe le mongwe a hakgamala. ²¹ Jhaanong ha Jheso a la tolela lethakoreng lengwe la lewate a le mookorong ,boiriiri jwa batjo jwa mo rikaganyeja, e nje ha letshitshing la lewate. ²² Mongwe wa baetjapele ba Sinagoge yo o bijwa Jairus a da, a wela mo rinoyong jagwe. ²³ A kopa gka tswee-tswee a re ,"ngwanagke yo monxu wa mosezana o hautshwane le lesho. Ke go kopago, da gkanno o de go mbaya mabogo a de a hole a tsjhele." ²⁴ Mme a doga naye, boiriiri jwa batjo jwa mo sala mojwa be mo kgobokanee. ²⁵ Jhaanong ga bo go le mosari yo iye e na le botjhatja jwa mari ringwaga ri le lesome le metso e meberi. ²⁶ Iye a sokola tjhatja mo ringakeng e rihisa jothe je o na nazo , mme boemong jwa go rula botoka sheemo sha gwe she gagkalela pele. ²⁷ Iye a re e uzwa ripego gka Jheso a mo potjha gka mojwa ha gare ga boiriiri mme a tsjhwara sheaparo shagwe. ²⁸ Gka gore iye a re, "ha ngka tsjhwara sheaparo sha gwe ,ke gka hola." ²⁹ Ha a sina go mo tsjhwara botjhatja jwa gwe jwa mari jwa ema, a bo a ikutsweja pholo mbeleng wagwe. ³⁰ Jheso gka bonako a lemoga ha maata nte a jwa mo go ye, A boja a re "ke anye yo nta kgoma biaparo jame?" ³¹ Barutjwa ba gwe ba mo raya ba re ," e gka re boiriiri bo go kgothaganee jwa,o bo o re, 'ke anye yo nte a go kgoma?" ³² Mme Jheso a laba go bona yo nta riha. ³³ Mosari gka go ze she nte sha mo rihagalela a delwa ke letsjhogo le go roroma. A wela ha pele ga gawe a mo kela boammaruri jothe. ³⁴ A mo raya a re ,"ngwanagka o horisijwe ke tjumelo yago, doga shente o hole." ³⁵ Ha e sanje e logka, ga da batjo ba jwa moetjapeleng wa Sinagoge ba re, "ngwano wa mosezana nte a thogkahala. Ke eng o jwelela o sokorisa morutji?" ³⁶ Mme Jheso a ba uzwa ba nje ba logka, a raya moetjapele wa Sinagoge a re ," she boihe, rumela heri." ³⁷ A she gka a letelela nngwe go doga nabo nteng ga ga Petoro, Jhakoba le Jhohane, leharana la ga Jhakoba. ³⁸ Ha be tjena itung ya moetjapele wa Sinagoge ,a bona batjo bi zosije morumo be lelela gorimo gka kutsoborogko. ³⁹ Ha tjena mo itung ,a ba raya a re ,"ke shing le lela ka kutsoborogko? Motjwana ha a shwile o robeeyo." ⁴⁰ Ba simolola go mo tshega gka shetshego sha tshodo. Mme a ba lelekela bothe gkaite ga sala ise le nnale wa motjwana le mba iye e da nabo, a ba ya gko motjwana o kayo. ⁴¹ A tshola motjwana gka sheata a mo raya a re ,"Talitha ,koum!" yo o ranolwa goruwa ,"mosezana ,ema gka rinoo." ⁴² Gona mohoo motjwana a ema a shekela (iye e na le ringwaga ri le lesome le metso e le meberi). Ba sala be gamareshile tjhatja. ⁴³ A ba laela tjhatja gore ba shegka ba zetsha mongwe gka she. Ba mo nee gojha a jhe.