¹ Jute, mothanka wa ga Keresete ,le leharana la ga Jakobe, go mba ba birijwego, ba rakiwa mo go Morimo Rara , be bewee Jeso Keresete. ² A bouzwejoborogko , le kagiso le leratjo be le ntshihalele. ³ baratjwa ,iya a re nje ke riha matsapa a go le kwalela gka pologko gka patjeleshega go le kgothaja go kgarathela gka thwahalo tjumelo ye e neilwe baitshepi ba Morimo mo lebagkeng le le lengwe heri. ⁴ Go na le batjho bangwe mbaiya ba itshukulela gka sephiring mo gonye. Batjho mbong sale be chwaelwa tsheko. Ke batjho mba ba sena bomorimo mba iya ba hetjolela mohau wa morimo mokgweng wa maikutso. ⁵ Jhaanong ke elatsa go le gagkolola , le maroro le kile laze gore Morimo, iya golola batho bangwe go jwa Egepeto, mme mojwa a nyeleja mba iye ba shab rumele. ⁶ Le bona bangele mba iye be palelwa ke go tshegetsa maemo abo a tjaolo, mme ba helela be sutja ho iye be beilwe hoho, Morimo iya ba gogela gka rikeetane ja shakhutheng, mo lehihing le lentshontsho, Morimo o ba goleshile gka rikeetane ja boshakhuteng go lekela leatji le le tjona la katholo. ⁷ Le ena Sodomo le Gomora le ritoropo mo kikologong ya jo iye ri inaakanje le bogogkagari le thakanelo rigkobo e e bothaswa.She ke ke shekai sha mba e leng gore ba e emee go boga borogko jwa khatholo ya molelo wa boshakhutheng. ⁸ Gka jwalo gka tsela e e chwanayo balori mba le bona ba itshegkolola mebele yabo. Ba nyatsa tjaolo, e bile ba kgala batoteshi. ⁹ Le ena mongele yo motjona Mikhele ha e gagautana le Riaboloso gka ga ga Moshe,iya a shegka a mo kgoboteja gka mahogko mme a mo raya heri a re" Morimo a go kgalemele." ¹⁰ Mme batjo ba teng ba rogagkaka shengwe le shengwe she ba sha she thaloganyego; ba sha she thaloganye gka ha tholegong, jwagka ripholoholo je ri sina rikakanyo, bolo ze ko ke zona ze bi ba shenago. ¹¹ Go lathega bona! Gka go bane tsela e ba e tsamayago ke ya ga Kaina. Iya ba wela mphosong ya ga Balame ya papari. Iya ba nyelejwa ke bothgkatsjebe jwa mohuata wa Kora. ¹² Batjho mbong ke bilabe ze bi kotsi merihong yeno ya leratjo, bejwa e bile ba sha boihe- barisa mba, go ijhesa bona heri. Ke maru uwa a kgokgoetswa ke pheho a sena pula; bithare za lathabula ze bi sina maungo - be swile go menaganye, be kumurilwe gka meri. ¹³ Ke makhubu uwa a rikgoka a lewatle , be phuka lechulo la go icha; rinyeleri je ri latheshilego je ri engwee ke go apeswa thathego ya lehihi le lentsho gka boshakhuthego. ¹⁴ E noke motjho wa bosupa go jwa go Adamo , iya porofita gka gabo a re "Bona! Morena udago gka bekekekeke za baengele mba ba boitshepi. ¹⁵ O dile go rihagaja katholo mo go mongwe le mongwe. O dile go supeja bothe molatjo wa tshiamololo baa siamoloring mba ba riha ritjiho ja tshiamolo gka tsela ya tshiamololo, le baleohi mba ba nje be logka bosula gka gagwe." ¹⁶ Bona mbong ke baikgagapeleri ,bangongoregi mba ba see rikeletso jabo mojwa. Molemo ya bo e lotjela gorimo boikgantsho jwabo, be tiribola bangwe gka matshotsho go bapala. ¹⁷ Lona baratjwa, gagkoloshelwa mahogko uwa iye e logkwa ke baaposetolo ba ga Jheso Keresete. ¹⁸ Iya ba raya ba re" malatji a bohelo go da go riha le basadi mba ba do go gogwa ke rikeletso jabo ja tshiamololo." ¹⁹ Koo ke bona mba ba baka kgaogano; ba shelehatshi ,ha ba na moya wa Morimo. ²⁰ Mme lona baratjwa ,ikage motjumelong e e boitshepo, le be le rapele mmoyeng o o boitshepo. ²¹ Le ipee moleratjong la Morimo, le emele bouzwejoborogko jwa ga Morena Jheso Keresete jo bo le dela gka bochelo jo bo sha khuthego. ²² Le supe Kutswejoborogkgo go mba ba na le pelaelo. ²³ Bologka bangwe gka go ba ogola molelong; mo go bangwe le suoe kutswejoborogko gka poiho , le ile sheaparo she she kgotheleshegilego sha shenama. ²⁴ Jhaanong mo goe yo a gka kgona go le shireleja mo go kgopegeng le go le kgonisa go ema ha pele ga Kgalalelo ya bolenteng jwagwe gka boitjumelo le siana shelabe, ²⁵ mo goe heri Morimo Mbologki gka Jheso Keresete Morena wecho, go rihe le kgalalelo ,bogolo , puso le tjaolo, pele ga nako yothe, bohombeng le boshakhutheng. Amen.