¹ Mojwa ga mohoo gabo gole moketye wa Bajuta , mme Jheso aya Jherusalema . ² Ena mo Jherusalema ha kgorong ya riku gabo gole lekariba , le le bijwa Betheseda gka shearabia, le na le riobo rile ritlhano. ³ Bathyo ba le bantsi mba iye be khama ,behohu, begole kana mba iye be kwakwane ba be be leleane mohoo. ^{4 5} Gabo gole monona nngwe mo hooyo iye esale e khama rijhara rile mashome a mane le metso yee hera bobedi. ⁶ Ha Jheso e mbona e kgophalee mohoo, ala lemogaa gore sale a rula mohoo lobagka le le tyelele, amo raya are, "Ao bata go horiswa?" ⁷ Monona yoo khama are, "Rra, hakena nngwe yo o ere lekariba lela huruega abo e ntsjenya mo golo. Hake dah nngwe o tsjena pele game". ⁸ Jheso amo raya are, "emelela, tshola moalo wago, o doge". ⁹ Gka boshogkgo monona a horisiwa , abe a tshola moalo wagwe a doga. Mme yabo ele gka leatsji la sabata. ¹⁰ Mme Bajuta ba raya ena yo labe e horisiwa, "Go leatsji la sabata hao letelelwe go tshola moalo wago." ¹¹ A hetyola are, " yoo nta a mphorisa a nthaya are, 'tshola moalo wago o doge." ¹² Ba mboja gore, Ke anye monona yoong yo nte ego raya jwalong, "o tshole o eme o doge'?" ¹³ Le ha go ntse jwalong ,yo nte e horisiwa abo a sha moze gore ke anye, gka gore Jheso iye nta a ngwangwaela gka shephiri ,gka gko iye gole boiriiri jwa batyho mo lehelong la teng. ¹⁴ Mojwanyana, Jheso a mbona ale mo tempeleng mme amo raya are, "Bona , iye wa hola! O shegka wa thola o leoha gatshi, gore e shegka shengwe she she bosula go hetya sha go rihagalela." ¹⁵ Mme monona a doga aya go kela bajuta gore Jheso ko ke yena yo iye emo horisa. ¹⁶ Jhanong gka zona bilo ze Bajuta ba simolola go bogisa Jheso, Gka gore ko iye e riha bilo ze gka sabata. ¹⁷ Jheso aba hetyola, "Tate o bereka mo gono le hombe jwa , le nna ,heri jwalong, ke berekago. ¹⁸ Gka shona she , Bajuta ba bata le go mbolaya gka gore iye a sha bute molao wa sabata, mme ebile gatshi e bija Morimo ere ke Ise, e ikaya e legkana le Morimo. ¹⁹ Jheo aba araba, "Ammaruri, ammaruri, morwa ha gkagke a riha shengwe gka boena, ha ese heri she o bona Ise e she riha , shengwe le shengwe she Rara oshe riha, morwa le ena oshe riha heri jwalong. ²⁰ Gobe Rara e ratyile morwa a mo supeje shenngwe le shengweshe o he rihayo, mme ebile oda go mo supeja rityiho ze betyona go hetya ze gore lede le kgakgamale, ²¹ Heri jwaagka Rara e zosha bashwi a ba neye bochelo, heri jwalong Morwa le ena o naya bochelo go nngwe le nngwe yo o batayo. ²² Heri jwaagka Rara asha athole nngwe, mme iye a naya morwa tshekiso yothe. ²³ Gore nngwe le nngwe ade a tote Rara yo o mo romileyo. ²⁴ Ammaruri, ammaruri ,yo o uzwa lentswe lame e be e rumela ena yo o nthyumileyo ona le bochelo jo bo sha khuthego mme ebile ha kita a bona tshekiso, mme iye a jwa mo leshong a tsjena bochelong. ²⁵ Ammaruri, ammaruri ke le raya kere nako e dayo, mme ebile iye yada, bashwi ba dile go uzwa lentswe la Morwa Morimo, mme ba ba da go uzwa ba a go chela. ²⁶ Heri jwaagka Rara ana le bochelo mo goye, iye abo naya le Morwa gore le ena ade a rihe le bochelo mo goye. ²⁷ Mme Rara iye a naya Morwa thyaolo yago rihagaja tshekiso gka gore ke Morwa Mothyo. ²⁸ Le shegka la hagkamajwa ke she, goda go da nako ye nngwe le nngwe yo o mabiteng ada go uzwa lentswe ²⁹ mme a shwele gkaite: mba iye be riha molemo bada go zoshela bochelong, le mba iye ba riha bosula bado go zoshela tshekisong. ^{30 31 32} Ha ngkagke gka riha shengwe gka bonna. Heri jwaagka ke uzwa , ke atholago, mme katholo yame e siameyo gka gore hake senke go ratya game ha ese ga yo o nthyumileyo. Haele gore ke paka gka game, bopaki jwame dabe ese boammaruri. ³³ Te ke romile Johane , mme iye a supa boammaruri. ³⁴ Le ha bopaki jo ke bo amoshelago bosha jwe bathyong. Ke logka bilo ze gore lede le bologkwe. ³⁵ Jhohane iye ele lebone le iye le tyutya le phatsima , mme iye le eletsa go ityumela mo lesering lagwe lobagkanyana. ³⁶ Leha kena le bopaki jo botyona go hetya jwaga Johane ,gore rityiho je Rara ore nneile gore kere rihagaje, jona rityiho je ke re rihago, re paka gka game gore Rara o nthyumileyo. ³⁷ Le ene Rara yo o nthyumileyo o paka gka game. Haise le uswe lentswe lagwe le eseng go bona chwano ha gongwe. ³⁸ Ha lena lehaele lehogko lengwe lagwe le le see mo gonye ,gka gore hale rumele mo go ena yo o mo romileyo. ^{39 40} Le puruputsha rikwalo gka gore le akanya gore mo gojo lena le bochelo jo bo sha khuthego, mme ebile hale bate goda gono gore lede le rule le bochelo. ⁴¹ Hake amoshele kgalalejo gojwa batjhong, ⁴² gka keze gore halena leratyo la Morimo mo gonye. ⁴³ Ke dile gka lebijo laga Rara, mme hale nkamoshele. Mme ha nngwe eda gka lebijo lagwe , le dile go mo amoshela. ⁴⁴ Le gka rumela jwang, le le mba le amogana kgalalejo mme le sha bate kgalalejo e e jwa ena Morimong e nanongwe? ⁴⁵ Ha le akanye gore nna gka shebele keda gole athola ha pele ga ga Rara. Yo o le athola ke moshe, ena yo iye le beile cholohelo mo goye. ⁴⁶ Ha iye le rumela moshe ,gkane le ntyumela gka gore iye e kwala gkano. ⁴⁷ Haiye le sha rumele rikwalo jwagwe ,legka rumela jwang mahogkgo ame?