¹ Ame kuna kumutantera ghushili mwaKristus. Liywi lyande lyamumutjima kuna kara ghumbangi wande mumpepo yakupongoka, ashi vino nakughamba kapishi vipempa, ² Mushima wande ghuna kara naliguvo ntani rutu rwande kuna kukora unene. ³ Ame ko naghumwande kuna shana nikare mulifingo lyaKarunga nitunde mwaKristus, ntjeneshi mbyo vyakuvhura kukwafa muhoko wetu. ⁴ Vavo mbo vaIsraeli. Vavo mbo ghatoghorora Karunga vakare vana vendi, mbyo avapa ghuyerere wendi, mbyo avapa likukwatakano kumwe naye, mbyo avapa veta naghukareli Karunga, ntani mbyo avapa matumbwidiro ghendi. ⁵ Vavo mbo ruvharo atoghorora Karunga omo ghatundilira Kristus parutu-ghuye ndje mupangeli wanavintje. Ghuye vamutange naruntje nanaruntje. Amen. ⁶ Ene ngoli kapi tuna kutanta ashi nkango da Karunga kapi datikiliramo. Mbyovyo shi kapishi vantu navantje ovo ghatoghorora Karunga kwatunda muva Israeli. ⁷ Ndi kapishi navantje vatundo ovo vatundo muruvharo rwaAbrahamu ngava kara vana vendi. Nani ngoli,'' Mbovo tupu vatundiliro muruvharo rwaIsaki tupu mbo vatumbwidira ruvharo rwendi.'' ⁸ Kutanta shi, Ovo vashampuruka parutu vavo kapishi mbo vana vaKarunga. Nani ngoli mbovo vashampurukira mumatumbwidiro ghaKarunga mbo vavarura ashi varuvharo rwendi. ⁹ Nkango damatumbwidiro ndodino ashi: '' Pashirugho shaweno kumwaka ghuna kuyoko nganika vyuka, nganiya wana Sara ana wana mukeke wamumati.'' ¹⁰ Kapishi mbyovino tupu, Rebeka naye kwashampurukire vana vamukafumu ghumwe tupu, Mukurona wetu Isaki- ¹¹ Vavo vanuke shimpe nakuva shampurukashi vahana kuruwana vyaviwa ndi vyavidona, vino kwavirughanine mposhi shihoro shaKarunga shakutoghororapo ghumwe shitikemo, kapishi mukonda yavirughana, nani mbovo atoghororamo mwene- ¹² ghuye kwatantilire Rebeka ashi,'' Mukurwa muntu ndje ngarughaneno munyendi.'' ¹³ Yira momu tupu vatjanga ashi: '' Ame kwahora Jacob, Esau kwamunyenga.'' ¹⁴ Weni omo tuvhura kughamba? MwaKarunga mwato ghuhungami ndi? Hawe, kapishi mo ngoli. ¹⁵ Ghuye kwatantelire Moses ashi, ''Ame kufera nkenda ogho nahoro kufera nkenda, ntani ame kupakera shinka ogho nahoro kupakera shinka.'' ¹⁶ Mposhi vino kapishi kutwara mushihoro shamuntu, ndi kuviruwana vyamuntu, nani ngoli kutwara mughufe nkenda, waKarunga mwene. ¹⁷ Yira momu atanta matjangwa kwaFarao ashi, ''Ame kwakupa ghunene na mfumwa, na lighano ashi nkondo dande ngadi monekere mumoye, na lidina lyande ngali yuvikirepo mughudjuni naghuntje.'' ¹⁸ Mposhi, Karunga kufera nkenda wo anahoro. ntani owo anapanga ntani kuyita po ghudinakaro. ¹⁹ Ove ngaghu ghamba name ashi, ''Karunga ne vinke ana kushanena mapuko muvantu?'' ²⁰ Are ghumwe ogho ashweno rumwe dimuragho dendi?'' Ove muntu, munke, wakuvhura kutomonona Karunga? shishitwa na kuvhurashi kupura mushiti washo ashi, ''Vinke wantulira nifane weno?'' ²¹ Mushongi lirova nani kapi akara na nkondo kulirova, ashonge vininke viviri kulirova limwe tupu, shimwe shakufumana. ²² Nangeshi Karunga, ndje oghu anahoro kushorora ugara ntani ghunankondo wendi ghuyivikwe, kukara mulididimiko mukuwapayika ugara walidjonaghuko? ²³ Ghuye kwaruwana vino ayite ghuyerere wendi waghunene mumwetu atwe vamumarutu ogho apakeranga mbili, ghuye kwatu wapayika ngatu tambure ghuyerere wendi? ²⁴ Ghuye kwaruwana vino kukwetu, ovo ayita, muva Juda, ntani na vapagani? ²⁵ Yira momu vatanta mumbapira yaHoseya ashi: ''Vantu ovo vapiliro kukara muhoko wande ngani vatambura vakare muhoko wande, ntani ovo napilire kuhora ngani vatambura nashihoro. ²⁶ Palivhango opo vatwenyanga ashi, 'Anwe kapishi muhoko wande, mpo ngava kamutwenya ashi 'Vana vaKarunga wamonyo.''' ²⁷ Isaya kwakalire nakughamba vyakuhamena Israel ashi, ''Nampili ngoli shavuka shivaro shavaIsrael yira musheke walifuta, vangapi tupu ngava paruko mo, ²⁸ mbyovoshi Hompa kapi ngakukata-kata kutikitamo nkango dendi muno mughudjuni.'' ²⁹ Yira momu tupu apumbire pamuhovo Isaya ashi, ''Hompa wambunga davakavita rwetu, ndi tuna kara yira varuvharo rwetu, ndi tuna kara yira Sodomu, ntani tufane yira Gomora.'' ³⁰ Weni omo tuvhura kutanta? Nkwandi weno ashi vapagani, ovo vapiliro kukondjera ghuhungami, vawana ghuhungami, ghuhungami wakutunda mulipuro. ³¹ Ngoli muhoko wava Israel, ogho wakondjeliro ghuhungami wakutikita mo veta, kapi vayitikitilira mo. ³² Mukonda munke? mukondashi likondjero lyavo kapi valitamikire nalipuro, kwalitamikire naviruwana. Vavo ava punduka muliwe lya kupunduka, ³³ yira momu vatjanga ashi, ''Ame ngani tura liwe mu Siyoni liwe lya kupundukita liwe olyo ngali yapuro vantu. Ngoli ogho ngapuro kapi ngava mufita ntjoni.''