¹ Vakwetu, Karunga kwatu fera nkenda, mbyo nakumukorangeda ashi mutape marutu ghenu, akare ndjambo yayidjuni yakupongoka, yakuyenda Karunga kumutjima. Lino ndyo liruwaneno Karunga lyenu lyakutikiliramo. ² Kapishi mukufane na ghuno Udjuni, ngoli pulitirenu Karunga gharundurure maghayaro ghenu. Ruwanenu vino mukoneke veta daKarunga ghuwa wendi, ghuhungami wendi mposhi ngaghutikiliremo. ³ Kutwara munkenda oyo ghampa Karunga ame kuna kumukorangeda ashi: Walye mwapitakananga muku kughayara na naghumwenu, nani ngoli, muna hepa kughayara nawa, Kehe ghuno kutwara mughunene walipuro lyendi olyo atapa kukwendi Karunga. ⁴ Atwe namaruha ghamangi murutu rumwe tupu, ngoli maruha ghano kapi gharuwananga shirughana shimwe trupu. ⁵ Natwe mo ngoli tupu, nampili momu twakara tuvangi, ngoli rutu rumwe tupu mwaKristus, mughukaro atwe kwakukwatakana yira momu ghakukwatakana maruha gharutu. ⁶ Atwe kwakara namaushwi ghankenda ghakukushuva-shuva kutwara mughufe nkenda ogho aghutapo kukwetu. Ogho akaro naushwi waghuporofete, ayuvite mbudi yaKarunga mukukuyenda nalipuro lyendi. ⁷ Ogho akaro naushwi wakuruwana, akona kuruwana mwamuwa. Ogho akaro naushwi wakuronga, aronge. ⁸ Ogho akaro naushwi wakutapa makorangedo, atape makorangedo. Ogho akaro naushwi wakutapa, atape namutjima waghuwa. Ogho akaro naushwi wakupititira, apititire naghupampi. Ogho akaro naushwi wankenda, akwafe munkenda yendi naruhafo. ⁹ Tukarenu nashihoro shaghushili kapishi shaghuvikupaki tupu. Nyengenu ghudona; muhamene kughuwa. ¹⁰ Karenu nashihoro kuvaghunyenu vamwa Kristus, kuhora-horenu. Tapenu shihonena shalifumadeko, kufumadekenu ghumwenu na naghumwenu. ¹¹ Ruwanenu naghupampi, kapishi mukare naghudwa. Hwamenu mumpepo, muruwanene Vyakuhamena Hompa, karenu vakareli vendi. ¹² Karenu naruhafo mulihuguvaro, karenu nalididimiko mumaghudito ntani, karenu mundapero naruntje mwasha dwapa. ¹³ Kwafenu vapongoki mumaghudito ghavo. Tamburenu vagenda vagenda mumandi ghenu, nakuva tekura nawa. ¹⁴ Shwerenu lirago vakumuhepeka; vapenu lirago kapishi muvape lifingo. ¹⁵ Hafenu kumwe novo vana karo naruhafo; Lirenu kumwe novo vanakaro naliguvo. ¹⁶ Karenu kumwe tupu mudimutjima. Kapishi kukondjera vyavinene, ngoli hamenenu kughusheshu. Kapishi muku mone ghuna ndunge. ¹⁷ Kapishi mukukwatere-kwatere nkoko. Ruwanenu ovyo vyawapero kughuto wavantu navantje. ¹⁸ Ntjeneshi kuvhura, kuruha rwenu, anwe karenu nambili kuvantu navantje. ¹⁹ Vakwetu, walye mwakuvyutira-vyutira nga ghudona-na ghudona, anwe vitapenu livhango ngavikare lishandu lyaKarunga. Matjangwa kwatanta ashi,''' Ame navyutango rughoko nalishandu; ame kuvyutira mfuto; mo ana kutanta Hompa.'' ²⁰ Ntani nka, ntjeneshi muna nkore woye ana fu ndjara, mupe ndya alye. Ntjene linota, mupe mema anwe. Ntjene ngaghuruwana vino, ngaghumufita ntjoni, ngaghumughupa likara lyamundiro pamutwe.'' ²¹ Mwasha kengerera ghudona ghumufunde, ngoli anwe fundenu ghudona na ghuwa.