¹ Vakwetu, shihoro shamumutjima wande shino ashi vaIsrael ndi ngava yoghoke, yino ndjo ndapero yande kwaKarunga. ² Ame kuna kutapa ghumbangi wakuhamena kukwavo ashi vavo kukondjera Karunga, ngoli vavo kapi vakara naghukonentu. ³ Mukondashi vavo kapi vayiva ghuhungami waKarunga, mbyo vatura po wavo vavene, mbyo vapira kuku tapa kughuhungami waKarunga. ⁴ Mukondashi Kristus ndje ghatikitiliromo veta nadintje mposhi kehe ghuno wakupura mumwendi ngawane ghuhungami. ⁵ Moses kwatjanga vyakuhamena ghuhungami waveta ashi: ''Muntu wakutikitamo veta yaghuhungami momo mu veta mo ngaparukira.'' ⁶ Ngoli ghuhungami wakutunda kulipuro kwatanta ashi: ''Kapishi ngaghu kupure mumutjima ghoye ashi, 'Áre ogho ngarondo ngayendemo muliwiru?' (ntani ashi, are ogho ngakayito Kristus ngakaghurumuke); ⁷ ndi kapishi ghughambe ashi, 'Are ogho ngayendo ghaghurumuke muShirongo shavafe?''' (kutanta ashi, ngakavhumbure Kristus mughufe). ⁸ Nani weni omo ana kutanta matjangwa, ashi? ''Nkango pepi nove dakara, mukanwa koye ntani namumutjima ghoye.'' Yayo ndjo nkango yalipuro oyo tuna kuyuvita. ⁹ Nkene aghu tongonona ghughambe ashi Jesus ndje Hompa, ove ghupure namutjima ghoye ashi Karunga kwamuvhumbura kughufe, ove ngaghu kaparuka. ¹⁰ Mbyovyoshi muntu kupura na mutjima wendi mpo ashi awane ghuhungami, ntani ghuye atongonone na kanwa kendi makura ngaka paruke. ¹¹ Matjangwa kuna kutanta ashi, ''Kehe ghuno wakupura mumwendi kapi ngavamufita ntjoni. ¹² Kapinka ngapakara makushuvo pakatji kava Juda na vaGereka. Mukondashi navantje Hompa wavo ghumwetupu, ghuye kutungika na ghuntungi wendi waghunene na vantje vakukuwa lidina lyendi. ¹³ Matjangwa kwatanta ashi, kehe ghuno wakukuwa mulidina lya Hompa ngaka paruka. ¹⁴ Vavo ne, weni omo ngavavhura kukugha kukwendi nkene kapi vapura mumwendi? Weni omo ngavapura mumwendi nkene shi kapi vayuvha mbudi yendi nampili rumwe tupu? Weni omo ngavapura nkeneshi kwato ogho ana kuyuvito mbudi yendi? ¹⁵ Weni omo vayuvita mbudi, nkeneshi kwato wakuvatuma?- Yira momu atanta matjangwa ashi, ''Vyawapa ghunene nkeneshi ava mudingura vakuyuvita mbudi yaRuhafo!'' ¹⁶ Ene ngoli kapishi navantje valimburuko ku mbudi yaruhafo. Isaya kwatanta ashi, ''Hompa, are ogho apuro mumbudi yetu oyo twayuvitanga?'' ¹⁷ Lipuro kuliwana nkene aghuyuvhu mbudi, ntani mbudi kutunda mukuyuvita Kristus. ¹⁸ Ame anipura ashi, ''Vyaghushili kapi vayuvha mbudi ndi?'' vayuvha, matjangwa kwatanta ashi, ''Liywi lyavo kwayenda mwayendo ghudjuni mudima, ntani nkango davo kwakatika nkoku wakatwa ghudjuni.'' ¹⁹ Ame, ani pura nka, ashi ''Muhoko wavaIsrael kapi wakwatire lighano ndi?'' pamuhovo Moses atanta ashi, ''Ame nganirwa lifupa kukwenu omo ngani ruwanita dimuhoko dahana mulyo. Ame ngani ruwanita dimuhoko dakupira ndunge, mbo nganiruwanita ngava ngarapite.'' ²⁰ Isaya kwaghambire ahana ghutjirwe ashi, ''Ame vangwana ovo vapiliro kuntjana-ntjana. Ame kwamonekera ovo vapiliro kushana kuya kukwande.'' ²¹ Kuhamena vaIsrael ghuye kwatanta ashi, ''Mayuva naghantje ame kwatapa maghoko ghande kumuhoko wapiro kulimburuka wakaro naghurunde.''