¹ Vantu vavayingi kwaghupa shiruwana shaku tura pamwe ghumbangi wavininke ovyo vyatikiliromo mukatji ketu, ² yira momu tupu vavitapa naku vitjanga mumbapira ovo vakaliropo pavishorokwa vyaweno vavimone namantjo ghavo naku vitjanga mumbapira vatape ghumbangi waghushili waku vyukilira waku yulilira waku hamena kuMbudi yaRuhafo. ³ Name mbyo nawana mpito yaku kuronga dino nkango naMbudi yaRuhafo oyo vatjanga varongi vankango, name mbyo naku kutjangera yino Mbudi yaRuhafo yira momu vayitjanga vambangi vaku hova, mposhi nove mukalikuto Teofilusi ghuyive Mbudi yaRuhafo yaghushili yaghumbangi waku tikiliramo, ⁴ mpo ngoli ashi nove nga ghukare nandunge naghukonentu waku yiva Mbudi yaRuhafo yaghushili oyo vatapa oyo vana kuronga ntani nayo twa pura. ⁵ Pa ruvede rwalipangero lya Hompa Herodesi, Hompa wavaYuda pakalire mukurona wamu mbunga yava Pirisiteli walidina Sakariya waku tunda mulira lya Abiya; ghuye kwakalire namukamali wendi Elisabeti waku tunda mulira lya Aroni. ⁶ Vavo navantje kwakalire vahungami kushipara shaKarunga, vavo kukwama naku limburuka naku tikitamo nkango navipango naveta daHompa nadintje. ⁷ Ntani nka vavo kapi vayitire mwanuke mukondashi Elisabeti kwakalire ngandye kwato kuyita, ntani vavo nka navantje kwakalire vana kurupa paruvede runo. ⁸ Liyuva limwe paruvede rwaSakariya ghuye kuna ngene muntembeli kuna kupititira shiruwana shaghukareli Karunga, yira momu tupu aruwananga pa virugho navintje paruvede rwendi. ⁹ Kutwara mumpo yaghupirisiteli namu ndyira yaghuhunga vakona kuruwana fungu-fungu vatoghorore mupirisiteli, waku ngena muntembeli aka ruwane ghukareli Karunga naku shora mundiro waku tutumukita muti walidumba lyaku nuka rupekwa. ¹⁰ Pa ruvede runo mbunga yayinene yavantu kwapongire pandye yantembeli kuna kuraperera ntani ghuye munda kuna kushora mundiro naku tutumukita muti walidumba lyaku nuka rupekwa pashirugho ntjosho. ¹¹ Makura muEngeli waHompa amu monekere ghuye kuna yimana kurulyo rwashidyambero shalidumba lyaku nuka rupekwa. ¹² Sakariya opo amonine muEngeli, akara naghoma waghunene, makura aku gandere kumeho yendi. ¹³ Makura muEngeli aghamba kukwendi ashi, ''Sakariya, kapishi ghukare naghoma, mukondashi ndapero nalishungido lyoye vina katika kwaHompa. Mukamali ghoye Elisabeti ngayita mwanuke wamumati. Makura ngaghu muruke lidina lyendi Yohanesi. ¹⁴ Ove ngaghu kara naruhafo ghunene rwaku mushamberera, ntani navantu vavayingi navo ngava kara naruhafo rwaku shamberera lishampuruko lyendi. ¹⁵ Ghuye nga kara mwanuke wamunene kushipara shaHompa. Ghuye nakadidishi kunwa vinyu ndi vikorwita vyaghururu, ntani ghuye nga kara kuna yura Mpepo yaKupongoka kumeho yaku tunda mulira lya vawina. ¹⁶ Ghuye nga shighura naku tjindja ghukaro waruvharo rwava Isirayeli ngava shayeke karuwana ghudona ngava vyuke kwaHompa Karunga wavo. ¹⁷ Ghuye nga pita kumeho mwaHompa nga kara nampepo yankondo ntani nankondo dadinene daku fana yira damuporofete Eliya, ntani ghuye nga shighura naku tjindja dimutjima davasha ngava hore vana vavo ntani ghuye nga tjindja dimutjima naghukaro wavantu vaku pira kulimburuka ngava kare vaku limburuka vaghukonetu vakuhungama - ghuye nga ruwana vyaweno nga wapayike ndyira yavantu vavayingi ngava taterere Hompa kuna kuya.'' ¹⁸ Makura Sakariya apura muEngeli ashi, ''Weni omo nganu yiva ashi vyaweno ngavi shoroka? Mukondashi name namuholikadi wande tuvakondi ntani tuna kurupa.'' ¹⁹ MuEngeli amu limburura naku mutantera ashi, ''Ame Gaburiyeli, ame kwayimana ntani kwakara mwaHompa Karunga. Ame kuna ntumu nuyite Mbudi yaRuhafo kukoye, kuhamena kwavi ngavi shoroko kukoye. ²⁰ Terera! Ame kuna yita Mbudi yaRuhafo kukoye, odino nkango ngadi tikamo opo nga shitikamo shirugho. Ano ngoli ove kapi ghuna pura naku tambura yino mbudi, weno kuna kuku mwenikida ghupire kughamba, dogoro mpopo ngavi shoroka navintje ngadi tikemo dino nkango dande. ²¹ Ruvede runo Sakariya ghuye muntembeli kuna kughamba namu Engeli vavo vantu kuna kumu taterera pandye. Vantu kwatetukire mukondashi kwakalire shirugo shashire muntembeli. ²² Opo arupukire muntembeli, kapi aghambire navantu. Mpopo vantu avadimburura ashi ghuye kuna mono limoneko opo ana kara munda yantembeli. Ghuye kapi avhulire kughamba naliywi makura aghamba muru puru-puru aghambe namaghoko. ²³ Opo amanine kuruwana viruwana vyaghupirisiteli naghukareli Karunga muntembeli, makura atundu palivhango ayende kumundi wendi. ²⁴ Kutunda pamayuva ngogho, Elisabeti mukamali waSakariya akara namarutu maviri ntani ghuye akara mamwedi matano mumundi wendi kwato kurupuka kumbunga muku vandeka lira lyendi. Ghuye aghamba, ²⁵ ''Ovino mbyo ana ruwana Hompa kukwande ntani Ghuye kuna mfere nkenda nukare namarutu maviri mbyo ana ghupu ntjoni kumeho yavantu ditunde papande.'' ²⁶ Elisabeti opo akalire mulira ghure wamakwedi matano nalimwe, Hompa atumu muEngeli Gaburiyeli ayende kushitata shamu Galileya osho vatwenyanga ashi Nasareti, ²⁷ ayende kwamu kadona ogho apiro kukara kumwe namukafu ogho avandekera murume walidina Yosefu, wakutunda mulira lya Dafiti, ntani ghuye kwavandikilire mukadona walidina Mariya. ²⁸ MuEngeli kwayenda kwaMariya aka ghamba ashi, ''Morokenu, Hompa Karunga kwakuhora ghunene! Ntani Hompa nove ana kara.'' ²⁹ Ano ngoli Mariya kapi akalire nambili mukonda yadino nkango damu Engeli ntani ghuye kapi ayivire naku kwata lighano ashi vinke dina kutanta nkango narumorolito rwaweno. ³⁰ MuEngeli amu tantere ashi, ''Mariya, Washa tjira, ove wahungama ntani kuna wana ghushwi kwaKarunga ntani Karunga kwakuhora. ³¹ Terera, ove ngaghu kara nalira ntani ngaghu shampuruka mwanuke wamumati, makura ngaghu muruke lidina 'Yesus.' ³² Ghuye nga kara mwanuke wamunene ntani ngava mutwenya ashi Mona Hompa Karunga waku wiru-wiru. Hompa Karunga nga tapa kukwendi lipuna lya ghuHompa lyamu lira lya Hompa Dafiti. ³³ Ghuye nga pangera muhoko waYakopu dogoro naruntje naku naruntje, ntani lipangero lya ghuntungi wendi kapi ngali kara naghuhura.'' ³⁴ Makura Mariya apura muEngeli ashi, ''Weni omu ngavi shoroka vino vyaweno, nkene shi ame shimpe kapi nagwanekera rumwe namukafumu?'' ³⁵ MuEngeli amu limburura naku mutantera ashi, ''Mpepo yaKupongoka ngayi sheghumuka ngayi kara papoye, ntani nkondo daHompa Karunga waku liwiru ngadi kara papoye. Mwanuke wamumati ogho ngaghu shampuruka kwapongoka ntani Ghuye ngava mutwenya ashi Mona Karunga. ³⁶ Terera, ghuno Elisabeti walikoro lyoye naye kuna kara namarutu maviri ghamwanuke wamumati, ghuye kuna kara nalira lyamu ghukurupe. Ghuye kuna kara nalira lya makwedi matano naghumwe, ghuye kwakara mukadi wangandye, ndi kwato kuyita. ³⁷ Mukondashi kwato shashidito shaku pira kuvhura kuruwana Hompa Karunga." ³⁸ Makura Mariya aghamba ashi, ''Terera, nawa tupu ame mukareli wamukamali waHompa. Viruwane vikare ngoli yira momu ghuna ghamba mposhi dino nkango ditikemo.'' Makura muEngeli atundupo aka yenda. ³⁹ Mumayuva ngagho Mariya aku wapayikiri muku yenda ghugenda wankwangu kushirongo shaku ndundu, kushitata shaYudeya. ⁴⁰ Makura ayendi mumundi waSakariya aka morora Elisabeti mukamali wendi. ⁴¹ Vino kwashoroka weno, Elisabeti tupu ayuvha liywi lya Mariya kuna kumorora, makura mukeke wamulira lyendi atukuka ntani avatuka, mpopo tupu Elisabeti ayura Mpepo yaKupongoka atameke kutanga Hompa. ⁴² Ghuye aghamba naliywi lyaku dameka ashi, ''Hompa kwakutungika mukatji ka vakamali navantje, ntani Ghuye kwapongora lira lyoye ntani kwatungika mbuto oyo yina karo mulira lyoye. ⁴³ Mukonda munke vina shorokere weno ashi vawina vaMuyogholi wande kunaya kukwande? ⁴⁴ Terera, opo nayuvhu liywi lyoye mulitwi lyande kuna kumorora, mukeke wamu lira lyande kuna tukuka mbyo ana vatuka, akare naruhafo rwarunene. ⁴⁵ Muntu walirago naghu waku pongoka ndyeghu wakupura naku huguvara nkango daHompa ashi daghushili ntani ovyo daghamba navintje ngavi shoroka ntani ngavi tikiliramo.'' ⁴⁶ Makura Mariya alimburura naku ghamba ashi, ''Monyo wande kuna kutanga naku shamberera Hompa wande, ⁴⁷ ntani mpepo yande kuna kara naruhafo muku tanga Karunga Muyowoli wande. ⁴⁸ Ame mukareli waHompa wamukadona wamudidi waku pira likuto ano ngoli ghuye kapi amvhurama. Kenga, kutunda pano weno vantu vaku dimuhoko nadintje damu ghudyuni ngava ghamba ashi ame kwantungika ntani kwapongoka. ⁴⁹ Kwaghuno waku ruwana viruwana vyankondo vyavinene ovyo ana ruwana kukwande, lidina lyendi kwapongoka. ⁵⁰ Ghuye kwakara naghufe-nkenda waku karererapo kutunda kuruvharo yenda ruvharo kwava vaku tjira naku fumadeka Hompa Karunga. ⁵¹ Ghuye kwaneyeda nkondo daku tunda kulighoko lyendi; Ghuye kwahanaghurapo vantu vaku kunenepita vaku ghayara maghano ghamadona munda yadimutjima davo. ⁵² Ghuye kuvhukuma vana vavahompa vapalivhu vatunde kumapuna ghavo ghaghuhompa ntani ghuye kutapa mfumwa naku yerura vantu vaku kudidipita. ⁵³ Ghuye kutapa ndya dakulya dadiwa kuvantu vendi vakufa ndjara, ntani Ghuye kutjida vantu vavangagho vatunde mushirongo maghoko-ghoko. ⁵⁴ Ghuye kwapopera naku vatera muhoko wava Isirayeli vaku mukarera naku limburuka kukwendi, ntani Ghuye kuneyada nkenda kuruvharo namuhoko wendi ⁵⁵ (Yira momu tupu atwenyedera vanyakulya vetu) kwaAburahamu kumwe naruvharo rwendi dogoro naruntje naku naruntje.'' ⁵⁶ Makura Mariya akara ghure wamakwedi matatu kumwe naElisabeti ntani avyukire kumundi wendi. ⁵⁷ Opo rwatikiremo ruvede rwaElisabeti rwaku shampuruka, ghuye kwashampuruka mukeke wamumati. ⁵⁸ Valikoro lyendi navantu vamaparambo vendi opo vayuvire yino mbudi ashi Hompa kuna fere nkenda Elisabeti, avakupakerere kumwe vahafe kumwe. ⁵⁹ Kuruku rwamayuva matano-na-matatu makura vantu avapongo kumwe varuwane ghuno mwanuke wamumati vyavamba. Vantu kwashanine kumuta ghuno mwanuke lidina "Sakariya," lidina lya vashe. ⁶⁰ Makura vawina vamwanuke avalimburura naku ghamba ashi, "Hawe.'' Lidina lyendi Yohanesi.'' ⁶¹ Vantu avamupura Elisabeti naku ghamba ashi, ''Mulira namu likoro lyenu kwato muntu walidina lino Yohanesi.'' ⁶² Makura vantu avapura vashe vamwanuke muliraka lya rupuru-puru ashi lidina munke varuka ghuno mukeke. ⁶³ Vashe avashungida vantu vayiteko lipepa lyaku tjanga makura avatjanga po ashi, ''Lidina lyendi Yohanesi.'' Vantu navantje ovo vakaliropo avatetuka ghunene. ⁶⁴ Mpopo tupu ayashuka kanwa kendi ntani ruraka rwendi naro arushutuka atameke kughamba. Mpopo tupu Sakariya atameke kutanga naku fumadeka Hompa Karunga. ⁶⁵ Vantu ovo vatungo kumwe navo avakara naghoma waghunene. Vavo avatwara yino mbudi yikuhanene kuvirongo vyaku ndundu navintje vyamu Yudeya. ⁶⁶ Vantu navantje ovo vayuviro yino mbudi avakupura munda yadimutjima davo kumwe naku ghamba ashi, "Viruwana munke nga ruwana ghuno mwanuke?'' Mukondashi nkondo daHompa Karunga mpodili papendi. ⁶⁷ Vashe vamwanuke Sakariya mpopo kwayura Mpepo yaKupongoka atameka kupumba naku porofeta nkando dino, ashi, ⁶⁸ ''Fumadekenu naku pandura Hompa Karunga, wava Isirayeli, Ghuye kunaya ashuture naku mangurura vantu vendi vawane liyoghoro kundyo davo. ⁶⁹ Ghuye kuna tumu ruvinga rwankondo rwaku yita liyoghoro lya ndyo ntani Ghuye kwatunda mulira lya mukareli wendi Dafiti, ⁷⁰ (Yira momu tupu vaghamba vaporofete vendi vakupongoka virugho vina kapito ashi), ⁷¹ Ghuye kwatuma muyogholi nga mangurure vantu vendi ngava tunde mumaghoko ghava nankore davo ntani ngava tunde mumango davantu vaku vanyenga. ⁷² Ghuye kuna ruwana vino muku yita naku neyeda nkenda kuva kurona vetu mposhi nga vhuruke liku kwatakano naligwanekero lyendi lya kupongoka, ⁷³ ntani namughano wendi ogho atwenyedera kwashetu Aburahamu. ⁷⁴ Hompa Karunga kwatu twenyedera ashi, Ghuye ngatu shutura ngatu manguruke ngatu tunde mumaghoko ghava nankore vetu, mposhi ngatu ruwane viruwana vyendi twa hana kukara naghoma, ⁷⁵ mposhi atwe ngatu kare vapongoki nava hungami kushipara shaHompa mumayuva ghaliparu lyetu naghantje. ⁷⁶ Makura Sakariya atantere monendi wamumati ashi, monande, ove ngava kutwenya ashi ove muporofete waHompa Karunga wakuwiru-wiru, ntani ove nga ghupita kumeho yaHompa ngaghu kawapeke naku kenita ndyira yendi, ntani nga ghutantere vantu vaku wapayike mukondashi ghuye kuna kuya papepi ana kara, ⁷⁷ ntani ove ghuna hepa kuronga vantu vendi vayive ntani vakare nandunge daku hamena kuliyoghoko nalidongononopo lya ndyo davo ngava pire kuwana matengeko ghandyo davo. ⁷⁸ Ovino ngavishoroka ntani ngavitikamo mukondashi Hompa Karunga kwakara nankenda kukwetu, mukonda yaweno ghuye mbyo atuma Muyogholi kukwetu, nga kare yira liyuva lyaku tapa shite naghukenu kukwetu, ntani ghuye nga tunda muliwiru ngaye kukwetu ngatu yoghore, ⁷⁹ ntani nka ghuye nga tapa shite naghukenu kuvantu ovo vashungiro navo vatungo mumundema ntani navo vakaro mumundunduma wamfa ntani navo vakaro naghoma wamfa. Ghuye nga ruwana vyaweno mposhi atwe ngatu yende mundyira yendi yampora.'' ⁸⁰ Makura ghuno mwanuke akuru parutu ntani akara nankondo pampepo, ntani ghuye kwatungire mumburundu dogoro mpopo lya tikiremo liyuva lyendi lyaku tameka kuyuvita Mbudi yaKarunga ntani ashorokire kumbunga yava Isirayeli.