¹ Ano ngoli Saul, ghuye shimpe kuna kughamba vyaku tjilita nakudipaya varongwa vaHompa, makura ayendi kwamu pristeli wamunene ² aka shungida vamu tjangere mbapira ayende nayo kuSinagoge namu Damaskus, mposhi nkene ngaka wana vantu vaku hamena kumbunga yino yaHompa, akare murume ndi mukadi, ghuye ngaka mukwate naku mumanga ngaka muyete kuYerusalem. ³ Ghuye shimpe kuna kuyenda mundyira yendi, pepi naku kutika muDamaskus, kwaku harukako tupu shite kwatunda kuliwiru kuna kutemena papendi shina mukundurukita; ⁴ mpopo ghuye aku gandere palivhu makura ayuvhu liywi kuna kughamba kukwendi ashi, ''Saulu, Saulu, mukonda munke ghuna kuhepekera ame?" ⁵ Saul amu limburura ashi, ''Ove re lidina lyoye, Hompa?'' Hompa aghamba ashi, ''Ame Yesus, oghu ghuna kuhepeka; ⁶ ghuye shimpe kuna kukankama kwavi vyashorokiro ayuvhu liywi kuna kughamba ashi, weno shapuka, yenda ghungene mushitata, kuva kaku tantera ashi vinke ovyo ghuvhura kuruwana.'' ⁷ Varume ovo vayendiro naSaulu avafu shitukutjima avatetuka, vavo kwakuyuvha liywi kuna kughamba, anongoli kwato muntu oghu vana kumona. ⁸ Makura Saul ashapuka palivhu, apahuka mantjo ghendi, anongoli kwato kumona; makura avamu kwata kuliwoko vamu koke vamu tware muDamaskus. ⁹ Ghuye kwakalire ghure wamayuva matatu kwato kumona, kwato kulya ntani kwato kunwa mema. ¹⁰ MuDamaskus kwakaliremo murongwa walidina Ananias. Hompa kwaghambire naye mulimoneko ashi, "Ananias! Ghuye alimburura ashi, ''Ame ghuno, Hompa, kuna kuterera.'' ¹¹ Hompa amu tantere ashi, ''Shapuka, yenda kundyira oyo vatwenya nga ashi ndyira-yaku-vyukilira, ghuka shane mundi waYudas, makura ghuka pure ashi kuni ana kara murume ogho katundo kuTarususi walidina Saulu, ghuye kuna kuna kara mundapero weno. ¹² Saulu kwamonine limoneko ashi murume walidina Ananias kuna kuya kukwendi angene mumundi amu kambeka mawoko papendi, makura apahuka atameke kumona nka.'' ¹³ Ananias alimburura ashi, ''Hompa ame nayuvha kuvantu vavayingi kuhamena ghuno murume, ghuye kuhepeka naku toghona mwamudona vantu voye vakupongoka vamu Yerusalema. ¹⁴ Nampili weno ghuye kawana mbapira nalipulitiro nankondo kuva pristeli vavanene daku kwata naku tura mudorongo kehe ghuno waku fumadeka lidina lyoye. ¹⁵ Nampili ngoli Hompa amu tantere ashi, ''Yenda, ghuye weno kuna kara ntumi yande ogho natoghorora, nga tware lidina lyande kuva Pagani naku vaHompa ntani naku muhoko wava Israeli; ¹⁶ mbyovyoshi ame kuna shana kumu neyeda ruhepo rwarunene oro nga hepa mukonda yalidina lyande.'' ¹⁷ Ananias makura ayendi, opo aka wanine ghuno mundi makura aka ngena mo. Ghuye makura akambeke mawoko papendi, aghamba ashi, ''Ghunyande Saulu, ame Hompa Yesus ana ntumo, oghu kaku monekero mundyira yoye opo kaghuya, kuna ntumu nuya kukambeke maghoko mposhi ghupahuke ghutameke kumona ntani ove ghuwane Mpepo yaKupongoka yiyure mumoye.'' ¹⁸ Mpopo tupu mumantjo ghaSaulu amu tunde vininke vyaku fana yira ngandi dandywi, makura apahuka atameke kumona; ghuye ashapuka mpopo avamukushu awane liyoyero; ¹⁹ makura ali ndya awana nkondo. Ghuye akara mayuva ghangandi kumwe navarongwa muDamaskus. ²⁰ Mpopo tupu Saulu atameke kuyuvita Mbudi yaRuhafo yaku hamena Yesus muSinagoge, ashi ghuye Mona Karunga. ²¹ Navantje ovo vamu yuviro kuna kughamba vino kwatetukire makura avaghamba ashi, ''Nane kapishi ndyeghuno murume ndye amano vantu navantje muYerusamu ovo vafumadeko lidina lyendi ndi? Ghuye kwaya nashitambo aya shane naku pandeka vantu avatware kuva Pristeli vavanene. ²² Ano ngoli Saulu ayuvita naghupampi nankondo, makura vaYuda ovo vakaliro muDamaskus opo vayuvire ghuno umbangi wendi waku ghamba naku vaneyeda ashi Yesus ndye Kristus, aghu yita shitanga limba kukwavo. ²³ Opo papita mayuva ghamayingi, vaYuda avapongo kumwe tupu avakuyuvhu ashi vamu dipaye Saulu. ²⁴ Makura Saulu ayuvhu naku yiva yino mbudi. Vavo kava kunganga naku takamita mavero ghaku ngenena naku rupuka mushitata nashintje matiku namwi ashi ndi ngava mudipayere mpopano. ²⁵ Kuruvede rwamatiku varongwa vendi avamutura pashikumba, vamu pititire palikende aghurumukire kulikuma. ²⁶ Opo aya tikire muYerusalemu, Saulu ayendi aka kupakerere kumwe navarongwa vaghunyendi, anongoli varongwa vaghunyendi navantje avakara naghoma naye, mukondashi vavo kapi vapulire ashi ghuye naye murongwa ana karo ntantani. ²⁷ Makura Barnabas ndye amu kwafiro amu tware kuva Apostoli, aka vatantere kuhamena ruyendo rwaSaulu omo amu monikilire Hompa mundyira yendi ntani nomu aghambire Hompa naye, ntani nomu aka yuvitire Saulu naghupampi mulidina lya Yesus. ²⁸ Saulu akara kumwe navo, avayendaura kumwe muYerusalema nayintje. Ghuye ayuvita naghupambi mulidina lya Hompa Yesus ²⁹ makura ghuye aku kanana navaYuda vaku ghamba ruGereka; makura vavo avashana kumu dipaya. ³⁰ Vaghunyendi opo vayuvire vino, makura avamutwara aghurumuke kuKesareya vaka mutume aka yende nakuTarusi. ³¹ Makura, mapongo ghamu Yudeya nayintje, namu Galileya ntani namu Samaria amu kara nampora nankondo; vavo, avakoro pampepo avakara naghoma waku fumadeka Hompa makura shivaro shava puli avavhuka unene, muli kwafo lya Mpepo yaKupongoka. ³² Peturusi kwayendire adingure mapongo naghantje, ghuye agwanekere navapongoki navantje ovo vatungo mo, dogoro aka wana vapuli vamu doropa yaLida. ³³ Makura aka wana mo murume ghumwe walidina Ayineyasi, ghuye kwaralire tupu mughuro wendi ghure wamwaka ntano-na-ntatu, mukondashi ghuye kwakalire shirema shamu ndambo. ³⁴ Makura Peturusi amu tantere ashi, ''Ayineyasi, Yesus Kristus kuna kuku verura. Rambuka yarura ghuro ghoye,'' ghuye mpopo tupu arambuka. ³⁵ Vantu navantje ovo vatungo muLida namu Sharoni opo vamonine Ayineyasi ana veruka makura avakushighura vapure naku kwama Hompa. ³⁶ MuYopa kwakalire mo murongwa ghumwe wamukamali walidina Tabita (Mu Rugereka ashi ''Dorokasi,'' kutanta ashi Menye). Ghuno mugholikadi karuwananga viruwana vyavi yingi vyaviwa ntani ghuye kwakalire naghufenkenda waunene, ka kwafanga unene vahepwe. ³⁷ Mumayuva ngogho tupu aghu muwana ghuvera makura adohoroka; vova avakushu rutu rwashimpu shendi, makura avakamu rangeka mundyugho yapawiru. ³⁸ Lida kwakalire pepi naYopa, varongwa avayuvhu ashi Peturusi mpwali muLida, vavo avatumu ko varume vaviri, vaka mushungide ashi, ''Tuyende ko kukwetu kapi shi ghukare maranga.'' ³⁹ Peturusi ashapuka mpopo ayendi navo. Opo aya tikire, makura avamu twara mundyugho yapawiru, vafita vavyavo navantje vana pongo kuna yimana kukwendi vavo kuna kulira, makura avamu neyeda vyuma namarwakani ogho karuwananga Dorokasi opo akalire navo ghuye shimpe muyumi. ⁴⁰ Peturusi avatantere navantje varupuke pandye yandyugho, makura atongamene pangoro, araperera; makura apiruka akenge kurutu rwashimpu, aghamba ashi, ''Tabita, rambuka.'' Makura apahuka mantjo, tupu amona Peturusi makura ashungiri. ⁴¹ Peturusi atambeke liwoko lyendi amu kwata ashapuka; ghuye ayita vantu vakupongoka vaKarunga navafita vavyavo, makura amu tapa kukwavo ghuye muyumi. ⁴² Yino mbudi kwakuhana kwayuvikire mushirongo shaYopa nashintje, makura vantu vavayingi avapura mwaHompa. ⁴³ Peturusi akara muYopa mayuva ghamayingi mumundi wamurume walidina Simon, mushunti wavipapa.