¹ Agripa kwaghambire kwaPaurusa, ''Ghuna hepa kughamba panaumoye.'' Makura Paurusa ahonyonona lighoko lyendi nakukupopera mwene. ² "Kuna kukumona naumwande ruhafo, Hompa Agripa, mukutura maudito ghande kumeho yoye namuntji mukukakananita marundiro naghantje ghava Yuda, ³ Shinenepo mukonda ove mukonentu mumpo yavaYuda nayintje ntani mapuro. Mpo ngoli nakukushenga undyuve nawa-nawa. ⁴ Ghushili, vaYuda navantje vayiva omo natungire kughudinkatu wande mumuhoko wana ghumwande ntani kuYerusalema. ⁵ Vayivire kuhamena kwande kutunda kuntamekero, ntjene vana vipanda kuvatanta, ashi natungire yira muFalisayi, ruha rwakudira ghufeke kughu kareli wetu. ⁶ Weno nayimana pano muku mpangura mukonda yalihuguvaro lyande mulitwenyidiro arughana Karunga kuva shetu. ⁷ Lino litwenyidiro ashi marudi ghetu ronambiri ghahuguvara mukuwana paku mukarera Karunga mughushiri matiku namwi, ntani mulihuguvaro lino, hompa, ashi vaYuda kuna kundundira. ⁸ Vinke vina kumuditoperera anwe vahapuli ashi Karunga ngarambwita vafe? ⁹ Weno mughushili, Ame naghumwande naghayara ashi nakona kurughana vininke vyavingi muku kananita lidina lyaYesusa waku Nasareta. ¹⁰ Narughanine vino muYerusalema. Natapitilire mudorongo vantu vakupongoka vaKarunga kunkondo nawanine kutunda kuvaPristelki vavanene; ntani apa vava dipaghire, Ame naku vakwatitako shi muku vakanana vavo. ¹¹ Navapire shitarafa rukando rwarungi mushinagoge nayintje ntani nashetikire kuvatininika vavo vakufinge. Nagarapire unene muku vakananita vavo ntani nava hepekire nampiri kuvitata vyantunda virongo. ¹² Apa narughanine vino, nayendire kuDamascusi nankondo ntani naveta dakutunda kuvaPristeli vavanene; ¹³ Ntani mundyira yande yakuyenda ko, metaha, hompa, namonine shite muliwiru osho shatemino kupitakana liyuva, shateminine natuvantje name ntani vakafumu ovo vayendiro name. ¹⁴ Apa twawelilire natuvantje palivhu, Nayuvire liywi lina kughambo kwande olyo lyaghambiro muliraka lyaRhebeli, Sauru, Sauru, vinke una kuhepekera? udito shiri ove mukutanga Karunga wavipempa.' ¹⁵ Makura mpo naghambire, ' Ove re, Hompa?' Hompa ghalimburura, ' Ame Yesusa ogho ghuna kuhepeka. ¹⁶ Weno shapuka nakuyimana pamauru ghoye, mukonda yashitambo shino namoneke koye, muku kuhoroghora ove ghukare mukareli ntani mbangi kutwara kuvininke ovyo nikunegheda kunyima yashirugho; ¹⁷ ntani kuni kupopera kuvantu ntani kuvapagani oko naku kutuma, ¹⁸ Ghuka mahure mantjo ghavo ngani naku vatjindja vatunde mumundema vayende mughukenu ntani kutunda mumpangera yaSatana vayende kwaKarunga, mposhi vana kona kuwana kwaKarunga lighupiropo lya ndyo ntani lipingo olyo nivapa vakupongore nalipuro mumwande.' ¹⁹ Mposhi, Hompa Agripa, kapi nadili kulimburukwa kulimoneko lya muwiru; ²⁰ Ano ngoli, pamuhovo kovano muDamascusi, ntani kuYerusalema, ntani kupitira mushirongo shava Yuda, ntani nka kuvapagani, navapire mbudi ashi vakushighure nakukutjindyira kwaKarunga, kuruwana viruwana vyaviwa vyaku kushighura. ²¹ Evino vayititirepo vaYuda avankwata muntembeli nakusheteka kundipagha ame. ²² Mpo ngoli nawana livatero lya kutunda kwaKarunga dogoro namuntji, ntani nayimana nakutapa ghumbangi kovi vyavisheshu ntani vyavinene kuhamena navimweshi vyavingi vyakupitakana vaporofete ntani Mosesa ovyo vaghambire ashi kuvishoroka- ²³ Ashi Kristusa kwahepa, ntani nakukara wakutanga kurambuka mumfa, ghuye kwayuvita ghukenu kuvantu vana ghumwetu ntani kuvapagani.' ²⁴ Paurusa apa amanine kukupopera, Festus aghamba naliywi lya kuyeruka, '' Paurusa, ghuna piyagana; makushongo ghoye ghamanene ghana kupiyaganeke.'' ²⁵ Ano ngoli Paurusa aghamba, '' Kapi napiyagana, muntu wamuwa Festus, ame kuna kughamba nkango daghushiri ntani kuyuvika mumpanguro. ²⁶ Hompa ayiva kuhamena vininke vino; ntani ame kughamba naye nahana ghutjirwe, ame kuna kungambipara ashi navimweshi evi vyahoramo kwendi; ovino kapi vavirughana muhuka. ²⁷ Mwapura vaporofete ndi, Hompa Agripa? Naviyiva ashi wapura.'' ²⁸ Agripa aghamba kwaPaurusa, '' Mushirugho shashifupi kughu ngambipara ame ntani nakuntura ame muKriste?'' ²⁹ Paurusa aghamba, '' Ame kuraperera kwaKarunga, ashi nampili mushirugho shashifupi ndi shashire, kapishi ove tupu, anongoli navantje ovo vana kundyuvo namuntji, kuvakara yira ame, vahana maghuketanga ghano ghamudorongo.'' ³⁰ Makura hompa ayimana, Ngughuru, naBerenike naye, ntani novo vashingiliro navo, ³¹ Apa vatundire mundyugho-pongero, vaghambire kwana ghumwavo, '' Mukafumu ghuno kwato vyakumutwalidira kumfa ndi vyakumupandita.'' ³² Agripa aghamba kwaFestus, '' Mukafumu ghuno ndi vamu mangwilire ayende nange kapi atongonona kwaCaesar.''