¹ Apa aku gaghunukire navo, nakupapwira, avaghupu ndyira yakuvyukilira kushitata shaKosi, muliyuva lyakukwama ko kushitata shaRodeshi, ntani kutunda po kushitata shaPatara. ² Apa twa wanine shikepa shakuruta shiyende kuFenisiya, mo twa rundurukire tuka yende nasho. ³ muruku rwakumona Saiprusi, kuyishuva kuruha rumontjo rwashikepa, ghatu yendi kuSiriya nakutulira paTiyira, oko shaka dumpwitilire shikepa dimurongero. ⁴ Kunyima atu kawana varongwa, atu kakara nkoko mayuva matano namaviri. Kupitira mumpepo yakupongoka avapampirikida Paulus ashi kapishi ayende kuYerusalem. ⁵ Opo ghapwire mayuva ghetu ghakunya, atu ka tundako nakutwikira naruyendo rwetu, ntani navantje, navakamali vavo navana, ghavatu tindikida mukurupu ka mushitata. Makura ghatu tu ngoro tutongamene kuntere yalifuta, ghaturaperere, ⁶ naku kurekera nawa nakehe ghuno. Makura atu perama mushikepa, ntani vavo avakavyuka kumundi. ⁷ Atwe makura atutwikiri ruyendo rwetu rwakutunda kuTirus, tuyende kuPutoremaisi. Makura atukukundu nava ghunyetu atukara navo liyuva limwe tupu. ⁸ Liyuva lya kukwamako makura atu twikiri tuyende kuKesareya. Atu yendi mumundi waFilipusi, muyuviti wambudi yaruhafo, ghumwe wambunga Kriste mwavanya vatano-nava viri, atukara kumwe naye. ⁹ Ghuye kwakalire navana vava kadona vane vavadike ovo vakaliro nampepo yaghuporofete. ¹⁰ Apa twa kaliremo mayuva ghangandi shimpe, amuya muPorofete wakukukarera walidina Agabusi. ¹¹ aya kwetu makura aghupu ruvwa rwaPaulus. Makura akumanga kumaghoko nakumaghuru ghendi makura aghamba ashi, ''Mpepo yakupongoka kuna kutanta ashi, Mwenya ruvwa runo mongava kamuruwana ngoli vaYuda muYerusalema, Makura ngava kamutape mumaghoko ghavahedana.'' ¹² Opo twaviyuva vino, Kumwe naVantu ovo vatungo po palivega linya atukukwambere nakumukava Paulus ashi kapishi ngayende dogoro kuYerusalem. ¹³ Makura Paulus ghalimburura ashi, ''Vinke muna kuruwana, kulira nakudompita mutjima wande? Ame nakuwapiyikiri, kapishi kunkwata mpentjako, enengoli nakufera muYerusalem mulidina lya Hompa Yesus;'' ¹⁴ Opo twamonine ashi Paulus ana shena kutambura maghano ghavo, atu mwena nakughamba ashi, ''Vipango vyaHompa vitikemo' ¹⁵ muku pita kwama yuvha ghanya, atu damuna ndjato detu tuyende kuYerusalemu. ¹⁶ Atu yendi kumwe navarongwa vamu Kesareya. Vavo avashimbiko mukafumu walidina Munasoni, mukafumu wakutunda kukipurusi, murongwa ghumwe wakuhova, ndi nko tuka vhura kukara. ¹⁷ Opo twayatikire muYerusalem, vaghunyetu avatutambura naruhafo. ¹⁸ Liyuva lya kukwamako Paurusi ayendi natwe kwaYakopu, ghatukawana vakurona navantje vambunga Kriste vanapongo. ¹⁹ Opo ghamanine kuva kunda, makura avatantere navantje ovyo aruwana Karunga muvahedana, muviruwana vyendi. ²⁰ Opo vayuvire vino, avapandura nakufumadeka Karunga, nakughamba kwendi ashi, '' kengenushi, vakuruvande, mayovi mangashi ghavo vapuro muva Yuda. Navantje kuna kundjambera valimburuke muVeta. ²¹ Vavo kwavatantera kuhamena ve, ashi ove kuna kuronga vaYuda ovo vatungo navahedana ashi vashuve veta daMoses nakuvatantera ashi kapishi varuwane vana vavo vavamati vyavamba, ntani kapishi vakwame nka vyampo davaYuda. ²² Nke tuvhura kuruwana? Mbunga yavo yayinene kuyiya ponga opo vayuvha ashi kaghuya tiki. ²³ Ruwana ngoli vino yira momu tunakukutantera. Omuno munkara pamwe yetu munakara vakafumu vane ovo vaghano mughano. ²⁴ Yenda kumwe navakafumu vano mukakukushe mukare munakushuka, kavafutire vaka vakurure huki davo damumutwe. Mposhi navantje opo vakamona vino kuva kaghamba ashi nane navintje ovyo vayuva vyakuhamena kukoye kapishi vyaushili. Mposhi navo vakamone ashi nani nove kutikitamo nawa-nawa veta. ²⁵ Ano ngoli vyakuhamena kuva pagani ovo vatabmuro lipuro, twava tjangera ntjangwatumwa ashi vana hepa kutunda kwavino vina kukwamoko, nakulyashi ndya dakudyambera kuva Karunga peke, nakulyashi nyama yina karo nahonde, nakulyashi kehe shino shakukufera ntani vatunde kurushonda naruntjo.'' ²⁶ Makura Paulus mpo ayendire kumwe navakafumu, liyuva lyakukwamako avakukushu navantje vakare vanakushuka. avayendi muntembeli, vakapure ashi liyuva munke ngashi vhura kushaya shilika shavo shaghukushuki mposhi kehe ghuno ngavhure kuyita ndyambo yendi ghagho mayuva shimpe nakupwashi. ²⁷ Pepi nakupwa ghano mayuva matano-namaviri, makura vaYuda vamumukunda waAsiya, avamono Paulus muntembeli, makura avaturapo lipiro kukukyuvha mposhi mbunga yavantu vamuhomokere vamukwate. ²⁸ Vavo avaghamba naliywi lyakudameka ghunene ashi,''Anwe vakafumu vava Israeli, tuvaterenu. Ghuno mukafumu ndye anakutapo kumavango naghantje kuvantu navantje vakulimbe namuhoko wetu, naveta ntani nalino livhango. Shimpe nka, ghuye kuyita vaGereka muno muntembeli aya nyateke lino livango lyakupongoka. ²⁹ ''Pamuhovo vavo kwamonine Torofimus waku Efeso kumwe naye mushitata, makura avaghayara ashi ndye amuyitiro vaye kumwe muntembeli. ³⁰ Shitata mudima amukara ndyorongani, vantu avaduka kumwe vakwate Paulus. Makura avamukokere pandye yantembeli kumwe nakughara mavero. ³¹ Tupu vahomoka ashi ndi vamudipaghe, nane mbudi yina katika kare kwamukurona wava kavita liyovi wava Roma ashi Yerusalemu mudima mundyorongani yinakara ³² Ghuye akwangura kutantera vakavita nava pititi vava kavita lifere vaduke ko oko vapongire. Opo vamonine mukurona kumwe navakavita vendi, makura avashagheke kutoghona Paulus. ³³ Mukurona wava kavita makura aya amukwata Paulus, aghamba ashi vamumange namauketanga maviri. Makura amupura ashi overe ntani vinke wadyona. ³⁴ Makura mbunga ayivareke kuyiyira vano mwapeke ntani ovanya mwapeke. Mukurona wava kavita kapi avhulire kuwana ushili mukonda yamuyoyo waghunene, makura aghamba ashi Paulus vamutware mukamba. ³⁵ Opo vayatika pashirondero, makura ghuye avamudamuna vakavita mukonda yandyorongani yaVantu. ³⁶ Mbunga yavantu ayiva kwama kumwe nakughamba naliywi lya kudameka ashi atundemo,''kamutwarewnu!'' ³⁷ Tupu varenka ngoli ashi ndi vangene mukamba, ghuye apura mukurona wakavita liyovi ashi, ''Kuvhura ghuvi mpulitire nighambe nove nd?'' Mukurona wavakavita amupura ashi,'' wayiva kughamba ruGereka ndi?'' ³⁸ Nane kapishi ove ghunya muEgipite aka yitiro ndyorongani mbyo atwalire vakorokotji mayovi mane vavakafumu varudipayi mumburundu?'' ³⁹ Paulus alimburura ashi,'' Ame nimuYuda, kwatunda kutaruso shitata shamukilikiya. Ame wamvharerwa yashitata osho shafumano ghunene. Nakukanderere, mpeko mpito nighambe kwavano Vantu.'' ⁴⁰ Makura mukurona wavakavita amupa lipulitiro, Paulus akayimana pashirondero akava vantu nalivoko. Opo vamwenine teyete, makura aghamba navo muliraka lya ruHebeli. Aghamba ashi,