¹ Pa shirugho shino muIkoniya Paulus naBarnabas avayendi kumwe vaka ngene muSinagoge yava Yuda vavo avayuvita mbudi nankondo kumbunga yayinene yava Yuda nava Gereka dogoro avayitambura avapura. ² VaYuda ovo vapiliro kupura yino mbudi avashongaura vaHedana vadi kuvyuke navarongwa. ³ VaApostoli avakaramo shiruwo shashire, vavo avayuvita mbudi nankondo daHompa vahana ghutjirwe, vavo avatapa umbangi vakoreke mbudi yaufenkenda wendi. Ghuye kwatapire ghuna nkondo kwaPaulus naBarnabas varuwane viruwana vyankondo navitetu ntani naviyivito. ⁴ Ano ngoli vantu vamu shitata avakughangura, vano vamwe avakara kuruha rwava Yuda ntani vamwe kuva Apositoli. ⁵ Makura vaHedana nava Yuda (kumwe nava mpititi vavo) avashana kuva hepeka naku vadipaya namawe, ⁶ anongoli vaApostoli avavidimburura vino; makura avatjwayukiri kuvitata vyaku Likadoniya naku Lisitira naku Derube ntani namavango ogho akundurukido dino dimukunda, ⁷ vavo avakatwikira kuyuvita Mbudi yaRuhafo. ⁸ MuLisitira kwakaliremo murume washirema shamu ndambo, ghuye ka shungiranga tupu kwato nkondo mumaghuru daku yimana, kutunda kulishampuruko lyendi. ⁹ Ghuye kwayuvire Paulus omo ana kuyuvita Mbudi yaRuhafo. Paulus anwiki mantjo ghendi papendi amu mono ashi ghuye kuna kara nalipuro lyendi lyaku veruka. ¹⁰ Paulus aghamba kukwendi naliywi lya linene ashi, ''Shapuka yimana pamaghuru ghoye.'' Makura murume avatuka atameke kuyendaura naku dukaghana. ¹¹ Mbunga opo yamonine ovi aruwanine Paulus; vavo avaghamba naliywi lyaku yiyuka unene, muliraka lya Likayoniya ashi, ''Va Karunga kuna kushintumuka vakare yira vantu mbyo vana ghurumuka vaye kukwetu.'' ¹² Barnabas avamuruku ashi, ''Seusi'' ntani Paulus ashi ndye, ''Heremesi'' mukondashi ghuye ndye muyuviti wadino nkango. ¹³ Muprisiteli waSeusi, nambunga oyo yakaliro pandye yashitata shantembeli omo kava rapereranga vantu, vavo avayita Hove oyo vatulire dimucuko muntingo kulivero lya shitata; vaPristeli nambunga kwashanine vadipaye hove varuwane ndjambo kwaPaulus naBarnabas. ¹⁴ VaApositoli, vaBarnabas naPaulus, opo vayuvire vino, avataghura vyuma vyavo avarupuka mo wangu-wangu vadukire pandye mumbunga, kumwe naku lira ashi, ¹⁵ ''Vinke muna kuruwana anwe, varume? Atwe natwe tu vantu, vaku fana yira anwe. Atwe kuna kumu yuvitira Mbudi yaRuhafo, mposhi mutunde kuvininke vyahana mutompo, muvyuke kwaKarunga wamonyo, mushiti waliwiru, nalivhu, nalifuta, ntani nanavintje ovyo vyakaro. ¹⁶ Virugho vina kapito, ghuye kwapulitilire dimuhoko nadintje diruwane momu dina shana diku yendere. ¹⁷ Nampili ngoli, ghuye kapi ashayikire kuneyeda ufenkenda ghukare ghumbangi kuviruwana vyendi vyaviwa, ghuye karokitanga mvhura yitunde kuliwiru ntani katapanga nyango virugho navintje vawane ndya dadiyingi, mposhi dimutjima davo dikare naruhafo rwarunene." ¹⁸ Nampili ngoli vaghambire dino nkango, vaPaulus naBarnabas kwakalirepo kukava mbunga ashi kapi shi vadyambe yino ndjambo kukwavo. ¹⁹ Makura avaya vaYuda vamwe vatunde kuAntiyokiya naku Ikoniya, vaya shongaure mbunga. Vavo avatoghona Paulus namawe avamukoko vamu tware pandye yashitata, vavo kwaghayalire ashi ghuye ana fu. ²⁰ Makura varongwa avaya avamukundurukida, ghuye ashapuka mpopo angene mushitata. Liyuva lyaku kwamako, ayendi kuDerube naBarnabas. ²¹ Opo vamanine kuyuvita Mbudi yaRuhafo mushitata shaDerbe vantu vavayingi avatambura yino mbudi avakara varongwa, makura Paulus ana Barnabas avavyuka nka kuLisitera, naku Ikoniya, ntani naku Antiyokiya. ²² Vavo avakoreke naku nkondopeka dimutjima naku korangeda varongwa vatwikire kukara nalipuro, avaghamba ashi, ''Nkene kuna kungena mughuntungi waKarunga tuna hepa kupita muma ghupyakadi namumahepeko ghama yingi.'' ²³ Vavo avatoghorora vampititi vava ture mushiruwana mwakehe lino lipongero, opo vamanine kuraperera ndapero yaku dililira, makura avavatura naku vakundika kushipara shaHompa, wavo ogho vapura. ²⁴ Makura avayendi avapiti muPasidiya vaye kuPamafiliya. ²⁵ Opo vamanine kuyuvita mbudi muPergia, vavo avaghurumuka vapite muAtaliya. ²⁶ Opo vatundire mo avarondo shikepa vayende mumema dogoro avakasheyeka kuAntiyokiya, Oku vava rekilire mughufenkenda waKarunga vaka tikitemo viruwana vyavo. ²⁷ Opo vaka tikire kuAntiyokiya makura avapongo vakriste kumwe, makura avavatantere navintje ovyo aruwanine Karunga mumwavo, ntani nomu atapire mpito kuva Hedana vayuvhe mbudi vapure mwaHompa Yesus. ²⁸ Vava avakara shirugho shashire kumwe navarongwa.