¹ Pa shirugho shino Hompa Herodes kwahepikire unene mbunga kriste daku kushuva-shuva kumavango ghapeke-peke. ² Ghuye kwadipayire Yakopu munya Yohanesi narufuro. ³ Muruku rwapo avi monine ashi vino vina hafita vaYudasi, atwikiri mukukwata Peturusi mushikwavo. Runya kwakalire ruvede rwamayuva amboroto yakupira vifulito. ⁴ Muruku rwakumukwata, ghamutura mudorongo, ghamutapa kumbunga ne dava ka vita vamukunge; aghaya lire mukumuyita kuvantu muruku yaPaska. ⁵ Mpo ashi Peturusi kwamutulire Mudorongo, ano vanya vakaliro mungereka kava rughana nga ndapero kehe pano kwaKarunga morwa rwendi. ⁶ Kumatiku ngogho kumeho Herodes ayendire mukumuyita arupuke kumpanguro, Peturusi kwaralire pakatji kavakavita vaviri, vana mumanga namaghuketanga maviri, shirugho osho vatakamiti mulivero kuna kukunga kudorongo. ⁷ kenga, muengeli waHompa pakuruwo mpo ghamumonikilire, ntani shite ashi temene munkonda yadorongo. Atoghona Peturusi kuruha rumwe nakumurambwita nakughamba, ''Shapuka wangu-wangu, namaghuketanga aghashutuka kumawoko. ⁸ Muengeli aghamba kwendi, ''Kudwateke naghumoye nakudwata vitcamakaku vyoye.'' Peturusi arugha ngoli. Muengeli aghamba kwendi, ''Dwata lirwakani lyoye lya pantunda nakunkwama.'' ⁹ Peturusi mpo ghakwamine muengeli ghaka rupuke. Kapi ayivire ashi ovyo arughanine muengeli vyaghushiri vyakaliro. Ghuye kwaghayalire ashi kuna kumona limoneko. ¹⁰ Muruku opo vapititire pavatakamiti vakuhova nava vaghuviri, avaya kulivero lyashikugho olyo lyatambo mushitata; aliva gharukiri naghumwalyo. Ghava rupuka vaghurumuke mushitaghura, makura muengeli ghamushuvu paruvede ndoro. ¹¹ Ghopo ghamuyelilire Peturusi, aghamba, ''Weno nayiva ushiri ashi Hompa ghana tumo muengeli wendi naku yamangurura ni tunde mumawoko ghaHerode, ntani nakuvininke navintje ovyo vatatilire vaYuda.'' ¹² Opo ghadimbwilire vino, ghayendi kundyugho yaMariya vawina vaYohanesi, oghu nka kavatwenya nga Markus, oko vavulire kuponga vantu vavangi ntani vavo kwarapilire. ¹³ Opo ghangongolire kulivero lyamangeneno, mukareli wamukadona oghu kava twenya nga ashi Roda ghaya mukulimburura. ¹⁴ Opo ghadimbulire liywi lyaPeturusi kutunda muruhafo kapi avhulire kugharura livero; mulivango lyavyo, ghaya ghuye kuna kudukira munkondwa; ghaya tanta ashi Peturusi ana yimana pamangeneno. ¹⁵ Mpo vaghambire kwendi, ''Ove ghuna purumuka.'' Ene ngoli atininiki ashi mo vene. '' ghava ghamba, ''Muengeli wendi.'' ¹⁶ Ano Peturusi atwikiri kungongora, opo vagharulire livero, avamu mono ntani vatetukire. ¹⁷ Peturusi ghava mwenikida naliwoko, ntani ghava tantere omu ghamughupire Hompa mudorongo, Aghamba, ''Katantenu vininke vino kwaYacobus navaghunyendi.'' mpo atundire po ayende kulivango lyapeke. ¹⁸ Makura opo lya yire liyuva, kapi mwakalire madonganito ghamadidi mukatji kavakavita kovyo vyashorokiro kwaPeturusi. ¹⁹ Muruku rwapo ghamushanine Herodes ngoli kapi ghamuwanine, ghapura vakungi naku varawira vamudipaghe. Makura ghaghurumuka atunde kuYudeya Ghayende kuKayisariya nakukakara nkoko. ²⁰ Herodes kwagarapire unene navantu vakuTayire nakuSidona. avayendi kukwendi nashitambo shimwe, ntani muruku rwakushongaghura Blastus, muvateli waHompa, mukuvatera, avatapa mpora mukonda ashi shirongo shavo kwawanine ndya dasho kutundilira mushirongo shahompa. ²¹ Pakutoka liyuva Herodes adwata mwene muvyuma vyashinaghuhompa ntani ghashungiri pashipuna shaghuHompa; aghamba shighamba kwavo. ²² Vantu avaharuka, Eli ne liywi lyakarunga kapishi lyamuntu!'' ²³ Mpopo tupu muengeli waHompa amutoghona, mukonda ashi kapi ayerepekire Karunga; agha muli mavinyo ntani afire. ²⁴ Ano nkango daKarunga adi kuwederere nakukuvukita. ²⁵ Makura Barnabas naSauru apa vamanine shitambo shavo, avavyuka vatunde kuYerusalema, avapitura Yohanesi, ogho kava twenya nga nka Markus.