¹ VaApostoli nava ghunyavo ovo vakaliro muYudea navo avayuvhu yino mbudi ashi vaHedana navo vana tambura nkango daKarunga. ² Peturusi opo aya tikire muYerusalemu, vantu ovo vahameno kumbunga yava varuwana vyavamba avamu kuyaghuka; ³ vavo avaghamba ashi, ''Ove kwaku kwata ghukwavo navantu ovo vapira kuruwana vyavamba mbyo wayenda mumandi ghavo ghuka lye kumwe navo.'' ⁴ Peturusi makura atameke kuva tantera naku shingonona ashi weni omo vyashorokire, ghuye aghamba ashi, ⁵ "Ame kwakalire mumushitata shaYopa kuna kuraperera, makura Mpepo ayiya papande anu mono limoneko, ame anu mono likwe lyalinene lya makovhu (huka) ma ne, kuna kusheghumuka palivhu. Makura ali sheghumukiri papande. ⁶ Makura anu kengurura mo mposhi nuvhure kudimburura ovyo vyakaliromo mulikwe. Makura anu mono ashi milikwe kwakalire mo vikorama vyamarudi ghamayingi; vikorama vyama ghuru mane vyapalivhu, navikashama vyamuwiya, navikorama vyaku ghovana palivhu, ntani navidira vyakutuka muwiru. ⁷ Makura anu yuvhu liywi kuna kughamba kukwande ashi, 'Peturusi, shapuka; dipaya ghu lye!' ⁸ Ame anu limburura ashi, 'Nampili kuna manga, Hompa; ame kapi nalyanga kehe vino vyaku pira kupongoka ndi vyaku nyata vingene mukanwa kande.' ⁹ Makura liywi ali tundu kuwiru rwauviri alighamba nka ashi, 'Ndya odo akushurura Karunga, ove naku vhurashi kudi twenya ashi danyata.' ¹⁰ Ovino kwashorokire rukando rutatu, makura likwe avalikoko livyuke muliwiru. ¹¹ Kwaku harukako tupu, varume vatatu vana yimana mulivero lya mundi omo twa kalire; kwava tumine vatunde kuKesereya vaye kukwande. ¹² Makura Mpepo ayi tantere ashi nu yende tupu navo, ntani kapishi nukare nashitanga limba. Makura anu yendi kumwe nava unyande vatano na-ghumwe dogoro atu katika mumundi waKoronelius. ¹³ Ghuye kwatu tantelire omo amonine muEngeli kuna yimana mundyugho yendi makura amu tantere ashi, 'Tuma vantu vayende kuYopa vaka shimbe Simon oghu vatwenya nga ashi Peturusi. ¹⁴ Ghuye ngaya kutantera mbudi yaliyoghoro - nove nalipata lyoye nalintje.' ¹⁵ Tupu natamikire kughamba navo, makura Mpepo yaKupongoka ayi sheghumuka yiye papavo, yira momu yasheghumukire papetu paku hoverera. ¹⁶ Ame anu vhuruka nkango daHompa, omu aghambire ashi, 'Yohanesi kamu kushanga namema; anongoli ame nganu mukukusha muMpepo yaKupongoka. ¹⁷ Nkene shi Karunga ndye atapiro ghushwi kukwavo yira ngaghu atapire kukwetu opo twa pulire mwaHompa Yesus Kristus, ame weni, omo nuvhura kushweneka ushwi waKarunga?'' ¹⁸ Opo vayuvire yino mbudi, kwato nka ovi vaghambire ndi valimburure, vavo avatanga Karunga kumwe naKughamba ashi, ''Karunga kuna tapa mpito kuva Hedana navo vaku shighure vawane monyo waliparu lya naruntje." ¹⁹ Vantu ovo vaku hanaukiro kutunda pamahepeko napamfa daStefanus kwaku hana vayende dogoro kuFonisiya, kuKipurusi, ntani naku Antiyokiya, vavo kava yuvitanga tupu nkango kuva Yuda. ²⁰ Makura vantu vamwe, kwatundire kuKipurusi naku Kirene, vayende kuAntiyokiya vaka yuvite Mbudi yaRuhafo kuva Gereka, navo vaka yuvhe mbudi yayiwa yaku hamena Hompa Yesus. ²¹ Nkondo daHompa kwakalire papavo; makura shivaro shavantu vavayingi avakushighura avatambura avapura vakwame Hompa Karunga. ²² Yino mbudi yaku hamena kukwavo ayi katika kumbunga-kriste yamu Yerusalemu, vavo avatumu Barnabas ayende kuAntiyokiya. ²³ Apo aya tikire amono vantu kuna kara naghufenkenda waKarunga, ghuye akara naruhafo unene makura avakorangeda navantje vakare mwaHompa namutjima naghuntje. ²⁴ Barnabas kwakalire murume wamuwa ntani ghuye kwayura Mpepo yaKupongoka nalipuro, makura ayita vantu vavayingi kwaHompa. ²⁵ Barnabas makura ayendi kuTirusi aka shane Saul. ²⁶ Opo aka muwanine, aka muyita kuAntiyokiya. Vavo avakara kumwe ghure wamwaka kumwe nambunga-kriste yayinene avarongo vantu vavayingi. MuAntiyokiya mo vakalire varongwa ovo vahovire kutwenya ashi, vaKriste. ²⁷ Mumayuva ngogho vaporofete vamwe avaghurumuka vatunde kuYerusalemu vayende kuAntiyokiya. ²⁸ Ghumwe mukatji kavo, walidina Agabusi, ashapuka makura Mpepo ayi muneyeda ashi lirumbu lyalinene kuna kuya mughudjuni naghuntje. Ovino kwashorokire mushirugho shauhompa waRoma walidina Claudius. ²⁹ Makura varongwa, avakuyuvhu avatokora ashi, kehe ghuno atape limona kwavyo vaweka tape mbatero kuvantu vamu Yudeya. ³⁰ Vavo avaviruwana ngoli; makura avatumu vimaliva kuva kurona vambunga kriste vatware vaBarnabas naSaulu.