¹ Mushitata shaKesareya kwakalire mo murume ghumwe, lidina lyendi Coronelius, ghuye mupititili wambunga yavakavita lifere ovo vatwenyanga ashi vakavita vavaItaliya. ² Naye nalipata lyendi nalintje vantu vavahungami, vavo kwatjira naku fumadeka Hompa, vavo kava kwafanga unene vahepwe vamu Yuda, ntani vavo kava rapereranga kehe pano kwaKarunga. ³ Liyuva limwe paviri yautatu kushitenguko, ghuye kwamonine nawa-nawa limoneko muEngeli waKarunga kuna kuya kukwendi. MuEngeli aghamba ashi, ''Koronelius!" ⁴ Koronelius anwiki akenge kwamu Engeli, akara ghoma waghunene makura ghuye aghamba ashi, ''Vava, vinke muna hepa?'' MuEngeli amu tantere ashi, ''Ndapero doye nambatero navitapa nandjambo doye vina katika ntani Karunga ana vipanda ghuye mbyo ana kuvhuruka. ⁵ Weno tuma varume vamwe vayende kushitata shaYopa vakayite murume walidina Simoni ghuye kwamu twenyanga nka ashi Peturusi. ⁶ Ghuye kuna kara mulipata lya Simon mushunti wavipapa, mundi wendi kwakara pepi nalifuta.'' ⁷ Ghuno muEngeli aghambiro naye tupu atundapo, Koronelius makura ayita vakareli vendi vaviri vamu mundi wendi, kumwe namu kavita ghumwe tupu wamu hungami ogho karuwanango naye kehe pano. ⁸ Koronelius avatantere navintje ovyo vyashorokiro makura avatuma kuYopa. ⁹ Liyuva lyaku kwamako kuruvede rwashitenguko, vavo shimpe muruyendo vana kara pepi naku tika kushitata shaYopa, Peturusi ayendi aronde mundyugho yapawiru aka raperere. ¹⁰ Ndyara ayi mukwata unene makura ashana kulya ndya, vavo vantu shimpe kuna kutereka ndya, Peturusi amono limoneko ashi, ¹¹ ghuye kuna kumona liwiru lina paturuka, ntani likeshe lya linene vana likwata kumakovhu, lino likeshe kwakara nama ruha ma ne, kuna kusheghumuka lighurumuke palivhu. ¹² Munda yalikeshe kwakalire mo vikorama navi kashama vyaku kushuva-shuva vyamaghuru mane navi vyaku kokava palivhu, ntani navidira vyaku tuka muwiru. ¹³ Makura liywi ali ghamba kukwendi ashi: ''Peturusi, shapuka, dipaya vino ghu lye''. ¹⁴ Peturusi alimburura ashi, ''Nampili kuna manga, Hompa; Ame kapi nu lye ndya daku pira kupongoka ntani nandja daku nyata.'' ¹⁵ Liywi ali ghamba nka naye shikando shaghuviri ashi: ''Ndya odo akushurura Karunga, ove naku vhura shi kudi twenya ashi danyata''. ¹⁶ Vino kwashorokire rukando rutatu; makura lino likeshe avalikoko valitware livyuke muliwiru. ¹⁷ Lino limoneko kwayitire shitanga limba naku kupura kwaPeturusi kapi ayivire ashi vinke lina kutanta, ghuye, shimpe kuna kukupura kuhamena lino limoneko ovi lina kutanta, varume ovo atumine Koronelius navo kwashanine mundi waSimon mushunti wavipapa dogoro avaghuwana, navo avayatiki vana yimana mulivero lya mundi. ¹⁸ Vavo avapura vamu mundi nkene shi Simon, oghu vatwenyanga ashi Peturusi, mpwali momuno mumundi. ¹⁹ Peturusi ghuye shimpe kuna kukupura kuhamena lino limoneko, Mpepo yaKarunga ayi mutantere ashi, ''Terera, mpovali varume vatatu ove vana kushana weno.'' ²⁰ Shapuka weno yenda ghu ghurumuke makura kayende kumwe navo, kapishi ghukare naghoma, mukondashi ame navatumo. ²¹ Peturusi aghurumuka aka wane varume ovo atumine Koronelius avapura ashi, ''Muntu ogho muna kushana ame ghuno. Vinke vina muyitoko kuno?'' ²² Vavo makura avaghamba ashi, ''Mupititili wavakavita lifere murume walidina Koronelius, murume wamuhungami ntani murume afumadeko Karunga, ntani ghuye kwafumana mukatji kava Yuda, ghuye kamu monekere muEngeli ghumwe waKarunga mbyo kamu tantere ashi tuye kukoye tuya kushimbe tuku tware kukwendi, ghuye aka yuvhe mbudi oyo ghuna kara nayo yaku kwendi.'' ²³ Makura Peturusi atambura vagenda mumundi avapa mararo. Liyuva lyaku kwamako Peturusi navarume vavagenda avashapuka vayende muruyendo rwavo, makura ghunyendi vamwe vamu Yopa navo avakwama ko vayende naye. ²⁴ Muliyuva lyaku kwamako avayatiki kuKesareya. Koronelius kwaya muwanine ghuye kuna kuva taterera; ghuye kwayita vamu mundi wendi nalikoro lyendi ntani nava ghunyendi avapongo mumundi wendi. ²⁵ Opo angenine Peturusi mulivero lyamu mundi, Koronelius amu kondawiri makura atongamene pangoro akanderere kukwendi. ²⁶ Ano ngoli Peturusi amu kwata kulighoko ashapuke, ghuye amu tantere ashi, "Shapuka! Ame name muntu yira ove.'' ²⁷ Peturusi naKoronelius vavo kuna kuyenda kumwe, vangene mumundi makura avakawana vantu vavayingi vana pongo kumwe. ²⁸ Peturusi avatantere ashi, ''Ovino namu vantje mwaviyiva ashi atwe vaYuda kutwara paveta yetu kapi vatupulitira tuku yendere ndi kuku kwata ghukwavo nava Pagani ndi navantu vadimuhoko dapeke. Ano ngoli Karunga kuna negheda limoneko ashi ame naku vhurashi kutwenya muntu ashi ghuye kwanyata ndi kapishi mupongoki. ²⁹ Opo vana ntantere ashi vavo kunaya kukwande vayantjimbe nuyende navo, mbyo napiri kushwena. Weno name kuna horo kuyiva ashi anwe ne vinke kamu kantjimbira nuye kuno.'' ³⁰ Koronelius ghalimburura ashi, '' Mayuva ma ne ana kapito pashirugho shino, ame kwakalire pandapero yaku dilira, mumundi mundyugho yande; paviri yautatu ame kwakuharukako tupu, mukafumu kuna yimana kumeho yande wavyuma vyaku mpayima vyaku vembera. ³¹ Ghuye aghamba ashi, ''Koronelius, ndapero yoye yina yuviki yina katika kwaKarunga, ntani vitapa vyoye kuva hepwe nandjambo doye Karunga ana vipanda ghuye mbyo ana kuvhuruka. ³² Mpo kantantere ashi tuma vantu kuYopa, ngava kayite murume walidina Simoni ogho vatwenyanga ashi Peturusi. Ghuye kuna kara weno mumundi waSimoni mushunti wavipapa, mundi wendi kwakara kuntere yalifuta.' (Ghuye kuna kara nambudi yakukoye). ³³ Makura, ame mbyo kani tumu vantu ndi ghuvhure kuya kuno. Ove mbyo ghuna wapeke ghuna yatiki kuno. Weno, atwe natuvantje kuna pongo pano kushipara shaKarunga tuyuvhe mbudi yaHompa oyo ghuna kara nayo. (Tuyuvhe mbudi yaHompa kukoye). ³⁴ Makura Peturusi ayashuka aghamba ashi, ''Vya ushili, Ame weno nadimburura ntani nakwata lighano ashi Karunga kwato katongo-tongo ashi kutoghorora tupu muhoko ghumwe tupu. ³⁵ Nane ngoli, mwakehe muhoko kehe ghuno wakufumadeka Hompa ntani ghuye kuruwana uhungami kwaHompa ngamu tambura. ³⁶ Anwe mwayiva mbudi oyo atuma Karunga kuva Israeli, paku yuvita Mbudi yaRuhafo yampora kupitira mwaYesus Kristusa, Hompa wanavantje - ³⁷ anwe mwaviyiva navintje ovyo aruwanine navi vyashorokiro, mushirongo shaYudeya nashintje, ovi vyatamekiro muGalileya, kutunda tupu kumbudi yaYohanesi oyo kayuvitanga; ³⁸ anwe mwayiva ashi, Karunga kwayudire Mpepo yaKupongoka nankondo mwaYesus wamu Nasaret. Ghuye kayendauranga kumwe naku ruwana ghuwa naku verura navantje nakutjida mpepo dadi dona ntani nakuruwana vitetu, mukondashi Karunga kwakalire kumwe naye. ³⁹ Atwe vambangi vendi mukondashi twa mona navintje ovyo aruwana Yesus, mushirongo shava Yuda ntani namuYerusalemu. Makura vavo avamupamparere kushilivindakano avamudipaya, ⁴⁰ anongoli Karunga aka muvhumbura kughufe muliyuva lya utatu ntani navantje avamumono, ⁴¹ kapi shi kuvantu navantje, nane ngoli kuva mbangi vendi tupu ovo atoghorora mwene Karunga pashakare - atwe atu linaye ndja ntani atu nu naye opo aka vhumbukire kughufe. ⁴² Ghuye kwatu pampilikida ashi tuyuvitire vantu yino mbudi naku tapa umbangi ashi ghuye kwamuturapo Karunga mbyo amu toghorora nga kare mupanguli wava namonyo ntani navafe. ⁴³ VaPorofete navantje kwatjanga vatape umbangi kuhamena kukwendi ashi, kehe ghuno wakupura mumwendi ngawana lidongonono po lya ndyo dendi kupitira mulidina lyendi.'' ⁴⁴ Peturusi ghuye shimpe kuna kughamba dino nkango, Mpepo yaKupongoka ayi sheghumukiri papavo navantje ovo vakaliropo ovo vayuviro yino mbudi. ⁴⁵ Vapuli navantje vava Yuda ovo varuwana vyavamba ovo vayiro naPeturusi vatunde kuYopa - vavo avatetuka unene, pakumona ushwi waMpepo yaKupongoka vana ghupoghomona vana ghutapa kuva Hedana. ⁴⁶ Vavo avayuvhu vano vaHedana kuna kughamba mumaraka peke-peke kuna kutanga Hompa Karunga. Makura Peturusia aghamba ashi, ⁴⁷ ''Ovano vantu navo vana tambura Mpepo yaKupongoka yira atwe, mpwali nka ghumwe waku vhura kuva shweneka mema ashi kapi shi vavakushe vapire kuwana liyoyero ndi?'' ⁴⁸ Ghuye makura aghamba ashi navo vavakushire mulidina lya Yesus Kristus. Vavo makura avamushungida akare tanko navo mayuva ghangandi.