¹ Ghunyande waku hora Teofelius, mumbapira yande yaku hova oyo natjangire kukoye, ame kwatjangire mo vyaviyingi vyaku hamena viruwana vyaYesus navintje kumwe marongo ghendi, ² dogoro kuliyuva olyo vamu twalire muliwiru, ghuye shimpe pano palivhu atapa nkondo yaku tunda kuMpepo yaKupongoka kuva Apostoli ovo atoghorolire. ³ Kunyima yarunyando rwendi avamupampara pashilivindakano makura afu, ghuye aka vhumbuka kughufe akara namonyo, ghuye amonoke kuvantu vavayingi ashi ana kara namonyo. Ghuye akara navarongwa vendi ghure wamayuva dimurongo-ne avaronge matjangwa navi vyaku hamena untungi waKarunga. ⁴ Kehe pano ka ponganga kumwe navo, ghuye kava tanteranga ashi kapishi ngava tundemo muYerusalemu, vana hepa kutaterera matwenyidiro ghaVashe, omo vaghamba ashi, ''Anwe mwayuva omo naghamba ⁵ ashi Yohanesi ghuye kakushanga namema, anongoli ame nganu mukusha muMpepo yaKupongoka mumayuva ghama sheshu tupu ana karo kumeho.'' ⁶ Liyuva limwe opo vapongire kumwe vaApostoli avapura Yesus ashi, ''Hompa, shino ntjo shirugho ghuna kutapa ghuna nkondo kuva Israel vapangere shirongo shavo vavene ndi?'' ⁷ Ghuye avalimburura ashi, ''Ovino kapishi vyaku yiva anwe kuhamena ruvede navirugho navinema ovo vaturapo Vavava kutwara muvipanga vyavo. ⁸ Ene ngoli anwe ngamu wana nkondo opo ngayiya Mpepo yaKupongoka papenu, makura anwe ngamu kara vambangi vande kehe kuno muYerusalem naku Yudea naku Samaria, dogoro kughuhura waudyuni.'' ⁹ Tupu amana kughamba Hompa Yesus dino nkango, avamudamunapo, avamutwara muliwiru, vavo kuna kumumono, dogoro aka ngena mumaremo aka dongonoka mumantjo ghavo. ¹⁰ Ndava hokwera kunwika vakenge kuwiru omo ana kadongonoka, avakuharukako tupu, varume vaviri vana yimana kuntere yavo vana dwata vyuma vyavikenu vyaku vembera. ¹¹ Vavo avaghamba ashi, ''Anwe varume vamu Galileya, vinke muna yimana weno navi muna kukenga weno kuliwiru? Ghuno Yesus vana ghupu mukatji kenu vamu tware muliwiru, ghuye ngaka vyuka nka shimpe yira momu muna mumono omo ana rondo muliwiru.'' ¹² Vaapostoli makura avavyuka kuYerusalemu vatunde kuNdundu, shinema shaku tika kukilometa yimwe kutunda kuYerusalemu, muliyuva lya Sabata. ¹³ Opo vaka tikire, makura avarondo mundyugho yakuwiru, oko vaka pongire. Ovo vapongiro mbovano Peturus, Yohanesi, Yakopu, Andrias, Filepus, Tomas, Bartolomew, Mateusi, Yakopu mona Alfeus, Simon wamupampi namunyendi Yudas vana vaYakopu. ¹⁴ Vavo avakupakerere vakare namutjima ghumwe tupu waku raperera, Kumwe nava kamali Mariya vawina vaYesus ntani vaghuni vendi vava kafumu. ¹⁵ Kwapita mayuva ghangandi makura apa kara lipongo lya vapuli, omo vapongire vantu vakutika kulifere nadimurongo mbiri, makura Peturus ashapuka aghamba ashi, ¹⁶ "Vakwetu, ovyo vatjanga mumatjangwa vina tikilirimo, ovi yapumba Mpepo yaKupongoka kutunda mukanwa ka David vyaku hamena Yudas, ogho akaliro mpititi wavo vayendiro vaka kwate Yesus. ¹⁷ Yudas ghumwe wamu mbunga yetu akaliro makura mbyo awana upingwa wendi.'' ¹⁸ (Kwa ghulire lifuva navimaliva vyaghurunde wendi, makura awere palivhu akatwa mutwe mulivhu, abwafuka lipumba maghura agha tjapurukamo munda. ¹⁹ Navantje vakaliro muYerusalemu avayuvhu yino mbudi, lino lifuva avaliruku ashi ''Akalidama,'' kutanta ashi, "Lifuva lya Mponde.") ²⁰ ''Matjangwa ghamu mbapira yaMapisalome kwatanta ashi, 'Shuvenu lino lifuva likare mumpuku, ntani kwato ogho ngakaromo; shanenu wapeke mumuture mulivango lyendi lya ghumpititi.' ²¹ Tuna hepa, kushana, muntu aye mumbunga yetu, akare wamu mbunga yetu kare mposhi akare mbangi waviruwana vyaHompa Yesus, ²² kutamekera kuliyoyero lya Yesus lya kutunda kwaYohanesi dogoro kuliyuva opo vamu upiremo mukatji ketu, ghuye ngakare mbangi walivumbuko lyendi.'' ²³ Makura avatapa madina ghavantu vaviri, Yosef oghu vatwenya ashi Barasabasi, lidina lyendi lyaku murundumwina ashi Yustus, ntani naMatias. ²⁴ Vavo avaraperere ashi, ''Hompa, Ove, wayivo navintje ovyo vyakaro munda yadimutjima davantu, shorora ghutuneyede pavano vantu vaviri, are ghuna tughororapo ²⁵ ogho ghavhuro kughupa lino livango lya shiruwana shaghu Apostoli oli ashuva Yudas ayende kulivango olyo lyamu tumbukiro.'' ²⁶ Makura avatoghorora pafungu-fungu, makura ali kwateke lidina lya Matias, vavo avamuwederere kwavano Apostoli murongo naghumwe.