¹ Vaunyande, kuna kumuvhurukita mbudi yaruhafo oyo namuyuvitira mbyo mwayitambura, mbyo nka mwakara mumwayo, ² Mumwayo mongamu kaparukira, nkene muvhura kukara mumbudi yaruhafo oyo namuyuvitira, mposhi lipuro lyenu kapishi ngalikare lya mawoko-woko. ³ Ame kwamuronga vyamulyo ovyo nakuronga name, ashi Kristusi kwafera ndyo detu yira momu aghamba matjangwa, ⁴ Avamuvhumbiki, ntani akavhumbuka muliyuva lya utatu yira momu aghamba matjangwa. ⁵ Kristusi pamuhovo kwamonikilire Peturusi, ntani aya monekere kwavo murongonava vili; ⁶ ntani ana kuya monekera pashiruwo shimwe tupu kwavo vakupitakana mafere matano. Shingi shavo shimpe mpovali vana kuparuko, ngoli vamwe vafa. ⁷ Mpo aya monekelire Yakopu, ntani nakuvaPostoli navantje. ⁸ Opo amonekilire kuna vantje ntani ngoli ana kuya monekera name, ogho afano yira ndyeghu vashampuruka ghawo mayuva shimpe kapi atikamo. ⁹ Momushi ame walikuto lyalididi unene muva Apostoli navantje. Ame kapi nawapera nukare muApostoli mukondashi ame kanu hepekanga mbunga kriste yaKarunga. ¹⁰ Ngoli mukonda yaufe nkenda waKarunga ame ghuno momunakara, anongoli nkenda yendi kapishi yamawoko-woko. Mukushetakanita, ame kwaruwana unene kupita kana vaApostoli navantje. Ngoli kapishi me, nani nkenda yaKarunga oyo nakara nayo. ¹¹ Vikareshi ame ndi vavo, mongoli twayuvita mbudi yaKarunga mbyo mwayipura. ¹² Kristusi nkene shi kumuyuvita ashi ghavhumbuka kughufe, weni omo vaghamba ashi livhumbuko lyavafe kwato. ¹³ Nkene shi livhumbuko lyavafe kwato, nkwa ndi naYesusi naye kapi avhumbuka kughufe, ¹⁴ ano nkene Kristusi kapi vamuvhumbura kughufe, nani nkango odo twayuvitanga damawoko-woko nalipuro lyenu lya mawoko-woko. ¹⁵ Nkeneshi vyaushili vafe kapi ngava vhumbuka kughufe, makura atwe vambangi vavimpempa vaKarunga, mukondashi atwe kughamba ashi Karunga avhumbura Yesusi kughufe. Mukondashi atwe kwangambipara ashi Karunga kwavhumburu Yesusi kughufe, ghuye ahana kumuvhumbura kughufe. ¹⁶ Nkene vafe kapi ngava kava vhumbura, Kristusi naye kapi vamuvhumbura kughufe. ¹⁷ Ngoli nkene Kristusi kapi avhumbuka kughufe, lipuro lyenu lya mawoko-woko nani shimpe nda mwakarera mundyo denu. ¹⁸ Navo vafo mukonda yakupura mwaKristusi, nkwandi navo vakayende mulindyonauko lyanaruntje. ¹⁹ Atwe nkene tupu kuhuguvarera Kristusi ngo uno monyo wapantunda yalivhutupu, atwe vana lihudi unene twa pitakana navantje. ²⁰ Ngoli ushili ngo uno ashi Kristusi ndye vahova kuvhumbura kughufe, kwanavantje ovo vafo. ²¹ Momu dakarapo mfa mughudyuni morwa muntu umwe, nalivhumbuko lyavafe nalyo kwakarapo morwa muntu umwe. ²² Yira momu tupu vafanga vantu navantje morwa vamuruvharo rwaAdamu, monka tupu ngava kavatura navantje vakakare namonyo. ²³ Morwa vavo kwaku kwatakana naKristusi. Ngoli kehe uno narufo rwendi: wakuhova varambwita kughufe, Kristusi, ntani mbovo vahamo kwaKristusi opo ngakaya. ²⁴ Ntani ngauya uhura, opo ngamana kuhanaurapo lipangero, unankondo nauntje, makura ngayatape untungi waKarunga kwavashe. ²⁵ Yesusi Kristusi ndye ngapangero tupu dogoro nkoko ngakatulira vana nkore vendi kuntji yampadi dendi. ²⁶ Munankore wendi wakuhulilira ogho ngavaya dyonaura, mfa. ²⁷ Matjangwa kwatanta ashi, '' Ghuye kwatura navintje kumpadi dendi,'' Nkango dino, '' Vininke navintje,'' dapwa kukenita ashi kapishi naKarunga mwene ashi naye mpwalimo, ogho aturo vininke navintje kuntji yampadi dendi daKristusi. ²⁸ Nkeneshi vininke vana vitapa mulipangero lya mona, makura mona naye kutapa kwagho amupo navintje. Karunga makura akare ngoli mupangeli wavininke navintje. ²⁹ Nkene ashi livhumbuko lyavafe kwato, ovo vakushira mulivango lyavafe, vinke vyakwafanga? Vafe nkene kapi ngava kavhumbuka, vinke ovyo vakarera naliyoyero lyavafe? ³⁰ Atwe ne vinke ovyo twa kareranga mumaudito kehe pano? ³¹ Vaunyande, ame kehe liyuva kwakara mushiponga shamfa. Ovino kuna kuvitapa mukukufumudeka kwande, mughukaro wenu mwaYesusi kristusi Hompa wetu. ³² Nkeneshi ame kwarwana navikashama vyamo Efeso nahana lihuguvaro lyamonyo wanaruntje, vinke ngavi vhura kukwafa kwande? Ano vafe nkene kapi ngava vavyumbura, vishewe kuna kutanta ashi, '' tudyombwanenu nakunwa, mbyovyoshi yona ngatufa,'' ³³ Walye mwakupukanga: Ndyoyera yayidona kuvipita nkedi dadiwa.'' ³⁴ Kororokenu! karenu mughuhungami! kapishi muture nka waro ndyo. Mbyovyoshi vamwe mo kapi vayiva Karunga. Ovino kuna kuvighamba numufite ntjoni. ³⁵ Umwe kuvhura aghambe ashi,'' Weni omo ngava kavhumbuka vafe, ntani marutu ghakufana weni ngava kara nagho.'' ³⁶ Ove ligova! mbuto oyo wakuna nkene kapi yinafu mulivhu nakumenashi. ³⁷ Opo wakunanga kapi wakunanga vimeno ovyo ngavikakaroko, ngoli mbuto vakunanga. kuvhura yikare yaMahangu ndi yapeke. ³⁸ Ngoli Karunga ndye wakuyipa shimeno yira momu anayishanene, kwakehe mbuto nashimeno shayo. ³⁹ Marutu naghantje kapi ngahakufana. ghavantu peke, avikorama naghopeke, ghavidira naghopeke nagho ghantjwi peke. ⁴⁰ Pakara nka marutu ghamuliwiru namarutu ghapantunda yalivhu. Pakara maurenga ghamuliwiru ntani namaurenga ghapa ntunda yalivhu. ⁴¹ Kumpayima kwaliyuva peke, kumpayima kwakakwedi peke, ntani kapayima kwambungururu peke. Ntani lipayimo lya mbungururu nadintje dakukushuva-shuva. ⁴² Napalivhumbuko lyavafe ngoli ngapakakara. Ovyo twakunanga vyakudyonaukapo ntani vyakuvhumbuka mbyo vyakukarererapo. ⁴³ Kwavhumbinga rutu rwakupira likuto; ngarukavhumbuka rwakupayima. ⁴⁴ Kwavhumbinga rutu rwakupira nkondo; ngarukavhumbuke rutu rwankondo. Kwavhumbinga rutu rwapa nyama, waro pakara nka rutu rwapampepo. ⁴⁵ Matjangwa kwatanta waro ashi, '' Muntu wakuhova ndye Adam, kwamuhungire akare namonyo.'' Ngoli Adma wakuhulilira ghuye ndye mpepo oyo yakutapa monyo. ⁴⁶ Rutu rwapampepo kapishi ndo rwakuhoverera vashitire ntani runa kuya kwamako rwapampepo. ⁴⁷ Muntu wakuhova kwamuhungire kulivhu, lya mbundu. Ngoli muntu wauviri, Hompa ogho atundo muliwiru. ⁴⁸ Momu afanine Adamu wapalivhu, vapalivhu navo monka waro vafana, Adamu wamuliwiru kwakufana nava vamuliwiru. ⁴⁹ Momu twakufana nogho atundo vahunga kulivhu monka waro ngatu kakufana nogho atundo muliwiru. ⁵⁰ Vaunyande, ovyo nakumutantera mbyovino ashi rutu rwapalivhu nakuvhurashi kupinga Untungi waKarunga. Ntani nkwa waro vyakudyonauka naku vhurashi kupinga ovyo kukarerepo. ⁵¹ monenu! Ame kuna kumutanterako vihoramo ashi: Kapishi natuvantje ngatufa, ngoli natuvantje ngavatushintununa tukutjindye. ⁵² Mushirugho shashifupi tupu, yira mukukapwida kwalintjo, opo ngaru shaghara rumbendo rwakuhulilira. Opo ngarushaghara makura ngava vhumbuka namarutu ghavo ghakukarererapo, makura ngava tushitunune ngatukutjindye. ⁵³ Mbyovyo shi rutu rwakudyonauka vana hepa kurutjinya ngarukare rwakupira kudyonauka, rwakupira kukarererapo rukare rwakukarerera po. ⁵⁴ Ene ngoli nkene rutu rwakupira kukarerera po runa kutjindyi rukare rwakukarererapo ntani rutu rwapanyama runa kara rwapa mpepo, navintje vina shoroka kutanta ashi nkango dinatikimo odi vatjanga ashi, '' Mfa vana dimini, vana difundu,'' ⁵⁵ '' Mfa, nkondo doye kuni dinakara? mfa virwita vyoye kuni vinakatra?'' ⁵⁶ Mfa virwita vyado ndyo, ntani una nkondo wandyo kwakara muveta. ⁵⁷ Kupandura kwaKarunga ogho atupo lifundo mwaHompa wetu Yesusi Kristusi! ⁵⁸ Vaunyande vakuhora, karenu munakoro kapishi mukunyungaure. Karenu naupampi kehe pano naviruwana vyaHompa, mukondashi mwayiva ashi viruwana ovi mwaruwanenanga Hompa kapishi vyamawoko-woko.