¹ Vaunyande, vyakuhamena kumaushwi ghampepo yakupongoka, kunahoro ashi muyiyive. ² Mwayiva ashi opo mwakalire vapagani, vaKarunga vavipuru-puru vavimpempa kava mupukitango munkedi dakukushuva-shuva. ³ Ame kuna kumupukurura ashi kwato ogho akaro nampepo yaKarunga wakughamba ashi,'' Yesusi kwamufingilira''. Ntani kwato nka waro wakughamba ashi,'' Yesusi Hompa, pahanashi mpepo yakupongoka yina mutantero. ⁴ Maushwi ghampepo kwakushuva-shuva ngoli mpepo oyo yaghatapango yi mwetu. ⁵ Kwakarapo viruwana vyavingi vyakukushuva-shuva ngoli ogho varuwanenanga Hompa umwetu, ⁶ Pakara viruwana vyankondo daKarunga odo daruwanango ngoli Karunga ogho adiruwanino mwanavantje ghumwetu tupu. ⁷ Ene ngoli kehe uno mpepo, kumuruwanita pankedi peke ashi akwafe navantje. ⁸ Kwaumwe yayo kutapa mpepo yaukonentu ntani kwaumwe ushwi waunandunge ngoli kutunda kumpepo yimwe tupu. ⁹ Ndyoyo mpepo yimwe tupu kwaghumwe kutapa lipuro, kwaumwe kumupa ushwi wankondo dakuverura. ¹⁰ Kwaumwe kutapa ushwi wankondo dakuruwana vitetu, ntani kwaumwe ushwi waku porofeta nakughamba nkango daKarunga. kwaumwe ushwi wakuhangura mpepo, kwaumwe ushwi wakughamba maraka peke-peke, ntani kwaumwe ushwi wakunongonona maraka. ¹¹ Navintje vino viruwana vyampepo yimwe tupu yaviruwanango, yayo kutapa kwakeheghuno maushwi ghakukushuva-shuva kwakehe uno momu yina shanene yene. ¹² Kristus, kwafana yira rutu rumwe tupu oro rwakaro namaruha ghamangi. Nampili rukare ashi kwarushita namaruha ghakukuahuva-shuva, ngoli rutu tupu. ¹³ Atwe natuvantje varutu rumwe tupu kwatu kushira mumpepo yimwe tupu, akare muYuda ndi muGereka, ndi Mupika ndi Mumanguruki, natuvantje kwatunwita mumpepo yimwe tupu. ¹⁴ Rutu kapishi ruha rumwe tupu, mangi. ¹⁵ Ntjene mpadi adighamba ashi,'' Morwa mukonda ame kapishi liwoko, Kapi nahamena kurutu me,'' mbyo virenkito lipire kukara ruha rwakurutu ndi? ¹⁶ Ndi ntjene litwi lighamba ashi,'' morwa ame kapishi lintjo, kapi nahamena kurutu,'' Mbyo shiri virenkito lipire kukara ruha rwarutu ndi? ¹⁷ Ashi ndi rutu naruntje kwakalire lintjo, ndi weni omo twavhuranga kuyuvha? Ndi rutu naruntje kwakalire litwi, ndi weni omo twavhuranga kufumbwira lidumba? ¹⁸ Mara Karunga kwatura maruha murutu, kehe ruha rukare kurutu yira momu arushanena. ¹⁹ Ashi ndi naghantje kwakalire ruha rumwe tupu rwakaliro, ndi kuninko oku rwakara rutu? ²⁰ Mpo ngoli ashi maruha mangi akaro, ngoli rutu rumwe tupu. ²¹ Lintjo nakuvhura shi litantere liwoko,'' Ame kapi nakuhepa.'' Ndi mutwe nakuvhurashi kutantera mpadi,'' Ame kapi namuhepa.'' ²² Ngoli maruha ghakurutu ogho twa mona ashi kapi akara nankondo ngo twahepa unene, ²³ Maruha gharutu ogho twaghayaranga ashi kapi ghafumana unene, ngo twapakeranga mbiri unene, ngoli ogho twashana apire kumoneka ngo twa fumadeka po unene. ²⁴ Ngoli maruha ogho amonekango po kapi ahepa ghagho vidwata. Ngoli Karunga kwahunga rutu weno ashi,'' ruha oro rwapiro lifumano, ndo rwakuwana lifumano lyalinene. ²⁵ Ghuye kwaruwanine vino mposhi apire kukara po makutondoghoro murutu, mposhi maruha naghantje ghakupakere mbili. ²⁶ Ntjeneshi ruha rumwe kuna kukora, maruha naghantje ghanahepa kunyanda kumwe; ndipo ntjene vanafumadekepo rumwe, maruha naghantje ghanahepa kuhafa kumwe. ²⁷ Ngoli anwe ruha rwaKristus ntani kehe uno ruha rumwe tupu. ²⁸ Ntani Karunga kwatura vano mumbunga kriste,; muhovo vaApositoli, mwauviri vaPorofete, mwautatu Varongi, ntani vakuruwana vitetu, nava vapa nkondo dakuverura, navakwafi, nava ruwani ntani nava vakughamba maraka peke-peke. ²⁹ Nani navantje vaApositoli? Navantje vaporofete ndi? Navantje Varongi ndi? Navantje kuruwana Vitetu ndi? ³⁰ Nani navantje vakara nankondo dakuverura ndi? Navantje kughamba maraka ghakukushuva-shuva ndi? Navantje kufwaturura maraka ndi? ³¹ Ano ngoli munahepa kukondyera maushwi ghamanenepo ogho apitakano naghantje. Mara ame nganimuneyeda ndyira oyo yapitakano nadintje.