¹ Vaunyande, ame kuna kumuvhurukita ashi vakurona vetu navantje kwayendilire muliremo ntani navantje kwavindakanine lifuta. ² Navantje kwava kushilire mwamosesi muliremo namulifuta, ³ ntani navantje kwalire ndya dimwe tupu dapa mpepo. ⁴ Navantje kavanwanga vinwa vimwe tupu vyapa mpepo. Vavo kavanwanga kuliwe lya pampepo olyo kaliva kwamango, olyo ndyo Kristusi. ⁵ Ngoli Karunga kapi akalire naruhafo rwamumutjima navantu vavangi vamumbunga yavo, makura mbyo avadyonaulirepo mumburundu. ⁶ Mposhi navintje vino vikare marondoro kukwetu, tupire kukara nalidowo kuvinke ovyo kava dowokeranga. ⁷ Walye mwakareranga vaKarunga vavimpempa, yira momu kavaruwananga vamwe. Matjangwa kwatanta ashi, '' Mbunga kwayenda yikashingire, yilye nakunwa ntani yina kushapuka yidane.'' ⁸ Walye twa shonderanga, yira momu kavaruwanangamo vamwe. ⁹ Walye mwashana kusheteka Kristusi, yira momu varuwaninemo vamwe makura avafu kumayoka. ¹⁰ Mwashakara narushivano, yira momu vakalire shingi shavo makura muEngeli wamfa avadyonaurapo. ¹¹ Navintje vino kwashorokire kukwavo mposhi vatape shihonena kukwetu. Vino kwavi tjangera vatape marondoro-kukwetu atwe tuna karo mughudjuni uno tuyive ashi uhura waudyuni unatiki. ¹² Mpo ngoli ashi kehe uno ana kughayaro ashi uye anayimana nawa-nawa akukunge mposhi kapishi ngawe. ¹³ Kwato masheteko ghakuvhura kumuwana nkene ashi kapishi ngogho awanango vantu navantje. Mposhi, Karunga mulimburuki. Ghuye nakumukengererashi amuwane masheteko akupitakana nkondo denu. Mposhi mumasheteko uye kumuwapayikira lya kughashendauka, mpo ngolishi mukare nalididimiko. ¹⁴ Mpongolishi, vaunyande vakuhora, tundenuko mukukarera vaKarunga vavimpempa. ¹⁵ Ame kuna kughamba nanwe yira vantu vaukonentu, mposhi mukengurure nawa kwavino nakughamba. ¹⁶ Nkinda yakutungika oyo twataperanga mpandu kwaKarunga kumwe nakunwamo, kapi yatungwanikitanga kuhonde yaYesusi? Mboroto oyo twa bamunanga tulye, kapi yatugwanikitanga kurutu rwaKristusi? ¹⁷ Mukondashi muntje umwe tupu wamboroto, Atwe twakaro ashi tuvangi kwakara rutu rumwe tupu. Mukondashi natuvantje kulya kumuntje umwe tupu wamboroto. ¹⁸ Monenu mbunga yava Israeli muma rutu ghavo. Nani kapishi vaPristeli mbova kulya kundjambo nani kapishi mbovo vakuruwana kushidyambero. ¹⁹ Vinke nakushana kutanta nani? Karunga wavimpempa ne vyuma ndi? ndi ndya dakudyambera kwaKArunga wavimpempa ne mbyo vintu po ndi? ²⁰ Ame kuna kughamba vyakuhamena kuva Hedana vavapagani ovo vadyambango ndjambo kuva Karunga vavimpempa, ashi kapishi kwaKarunga vadyamberanga nani ngoli kumpempo dadidona. Ame kapi namushanena ashi mukukwatakane nampepo dadidona! ²¹ Nakuvhurashi munwe kunkinda yaHompa ntani munwe nka waro kunkinda yampepo dadidona. Nakuvhurashi muhamene kutafura yaHompa ntani nakutafura yampepo dadidona. ²² ndi kuna shana tushangumune lifupa lya Hompa ndi? ndi atwe nkondo detu dinene dapitakana dendi ndi? ²³ '' Navintje vavipulitira,'' ngoli kapishi navintje kuvhura kukwafa. '' Navintje vavipulitira,'' ngoli kapishi navintje kuvhura kutunga vantu. ²⁴ Kapishi ukondyere uwa wana umoye. Nani ngoli kehe uno akondyere uwa waunyendi. ²⁵ Lyenu kehe vino vaulitanga kumavango ghakughulitira mwahana kukupura liywi lyamumutjima. ²⁶ Mbyovishi, '' Udyuni kumwe nanavintje vyakaromo vyaHompa.'' ²⁷ Keneshi vapagani vanamuyita mukalye ndya, makura muna shana kuyenda, kukalya tupu kehe dino ndya vana muyumbura mwahana kukupura liywi lya mumutjima. ²⁸ Ngoli nkene umwe atanta kukwenu ashi, oyinyama yakudyambera kuva Karunga vavimpempa,'' Mwasha lyako, mukondashi ana mupukurura ntani morwa yaliywi lya mumutjima wendi. ²⁹ Liywi lya munda yamutjima lya vantu peke, kapishi lyoye. Umwe kuvhura akupure ashi, mukonda munke muntu peke apangulira umanguruki wamunda yamutjima wendi? ³⁰ Nkene nulya ndya oku kuna kupandura Karunga, vinke nka waro mumpera ndyo, movyo nakulya oku natapa kare mpandu? ³¹ Kehe vino muna kulya ndi muna kunwa, ndi kehe vino tupu muna kuruwana, viruwanenu mutape lifumano kwaKarunga. ³² Karenu muna kushuka kwanavantje vaYuda nakuva Gereka, nakungereka yaKarunga. ³³ Momu nakambadaranga kuwapekera vantu navantje muvinke navintje. Kapi nashananga ma uwa ghana umwande, ngoli kushana ghavantu vavangi. Ame kuruwana vino mposhi vavhure kuparuka.