¹ Iti parbangon ti umuna nga aldaw iti lawas, napanda idiay tanem, intugotda dagiti pabanglo nga insaganada. ² Nakitada nga naitulid diay bato nga naiyadayo iti tanem. ³ Simrekda, ngem awan ti nakitada nga bagi ni Apo Hesus. ⁴ Ti napasamak, kabayatan a mariribukanda maipanggep iti daytoy, kellaat nga adda dua a lallaki nga nakitakder kadakuada a nakakawes iti makasisirap a pagan-anay. ⁵ Kabayatan a napunno iti buteng dagiti babbai ken nagpaklebda iti daga, kinunada kadagiti babbai, "Apay a birbirukenyo ti sibibiag kadagiti natay? ⁶ Awan isuna ditoy, ngem ketdi nagungaren! Lagipenyo nu kasano iti pannakitungtongna kadakayo idi adda pay laeng isuna idiay Galilea, ⁷ kinunana nga maiyawat ti Anak ti Tao kadagiti im-ima dagiti managbasol a tattao ken mailansa iti krus, ket iti maikatlo nga aldaw, ket agungar manen." ⁸ Nalagip dagiti babbai dagiti sasaona, ⁹ ket nagsublida manipud tanem ket impadamagda amin dagitoy a banbanag kadagiti sangapulo ket maysa ken kadagiti daduma. ¹⁰ Itatta, ni Maria Magdalena, Juana, Maria nga ina ni Santiago, ken dagiti dadduma pay a babbai nga kaduada, impadamagda dagitoy a banbanag kadagiti apostol. ¹¹ Ngem daytoy nga mensahe ket kasla awan serbina nga sarita para kadagiti apostol, ket saanda nga pinati dagiti babbai. ¹² Ngem, timmakder ni Pedro ket nagtaray nga napan idiay tanem, ket nagdumog ken kimmita idiay uneg, ket nakita na laeng ti nabati nga lupot a linen. Nagawid ngarud ni Pedro idiay balayna a masmasdaaw no ania iti napasamak. ¹³ Iti dayta, dua kadakuada ti mapmapan iti dayta metlaeng nga aldaw idiay baryo a managan Emmaus, nga innem a pulo nga estadia manipud Jerusalem. ¹⁴ Pagtungtungtunganda ti maipanggep kadagiti amin nga banbanag a napasamak. ¹⁵ Napasamak a kabayatan nga pagtungtungtunganda ken agdindinnamagda, ket immasideg ni Hesus ken nakikuyog kadakuada. ¹⁶ Ngem dagiti matmatada nalappedan isu nga saanda nga nailasin isuna. ¹⁷ Kinuna ni Hesus kadakuada, "Ania ti pagtungtungtunganyo nga dua kabayatan ti pannagnayo?" Ket nakatakderda idiay nga naliday. ¹⁸ Ket maysa kadakuada, a managan Cleopas, iti simmungbat kenkuana, "Apay sika laeng ti tao idiay Jerusalem nga saan a makaammo kadagiti banbanag a napasamak idiay iti napalabas nga al-aldaw?" ¹⁹ Kinuna ni Hesus kadakuada, "Ania nga banbanag?" Insungbatda kenkuana, "Dagiti banbanag a maipanggep kenni Hesus nga taga-Nazaret, a propeta, mannakabalin iti aramid ken saona iti imatang ti Dios ken iti amin nga tattao. ²⁰ ken no kasanu nga inyawat dagiti panguloen ti papadi ken dagiti turay a maikeddeng nga matay ken mainlansada. ²¹ Ngem ninamnamami nga isuna ti mangpawayawaya iti Israel. Wen, ken malaksid pay kadagitoy amin, maikatlo itan nga aldaw manipud napasamak dagidiay a banbanag. ²² Ngem maysa pay, dagiti dadduma a kakaduami nga babbai ket pinagsiddaaw dakami, iti ipapan da idiay tanem iti bigbigat. ²³ Idi saanda a nabirukan ti bagina, immayda, ket kinunada pay nga nakitada dagiti angheles iti maysa a sirmata ket inbagada a sibibiag isuna. ²⁴ Dagiti dadduma a kakaduami nga lallaki ket napanda idiay tanem, ket nakitada daytoy a kas iti kinuna dagiti babbai. Ngem saanda a nakita isuna." ²⁵ Kinuna ni Hesus kadakuada, "O maag nga tattao ken nakapsot ti puspusoda a mamati kadagiti inbaga dagiti propeta! ²⁶ Saan aya nga masapul a sagabaen ni Kristo dagitoy a banbanag, ken sumrekto idiay gloriana?" ²⁷ Ket manipud kenni Moses ken kadagiti amin a propeta, impalawag ni Hesus kadakuada iti amin a banbanag maipapan kenkuana kadagiti amin nga nasantoan a sursurat. ²⁸ Kabayatan nga umas-asidegda iti bario nga papananda, nagpammarang ni Hesus nga kasla adayo pay ti papananna. ²⁹ Ngem pinilitda isuna, a kinunada, "Makidagus kan kadakami, ta rumabiin ket ti aldaw ket dandanin a malpas." Isu nga simrek ni Hesus nga nakidagus kadakuada. ³⁰ Ti napasamak, idi nakitugawen isuna kadakuada a mangan, innalana ti tinapay, binendisyonanna, ket iti panangguduana, intedna daytoy kadakuada. ³¹ Ket naluktan dagiti matmatada, nailasinda isuna, ket nagpukaw isuna iti imatangda. ³² Kinunada iti tunggal maysa, "Saan kadi nga agap-apoy dagiti kaunggan iti puspusotayo, kabayatan a nakitungtungtong kadatayo idiay dalan, kabayatan nga nilukatanna kadatayo dagiti nasantoan a surat?" ³³ Nagrubwatda iti dayta met laeng nga oras ket nagsublida idiay Jerusalem. Nasangpetanda nga naurnong dagiti sangapulo ket maysa ken dagiti kakaduada, ³⁴ nga ibagbagada, "Ti Apo ket nagungar nga agpayso, ket nagpakita pay kenni Simon." ³⁵ Isunga imbagada dagiti banbanag a napasamak idiay dalan, ken no kasanu nga naipakita kadakuada ni Hesus babaen iti pannakapisipisi iti tinapay. ³⁶ Kabayatan nga ibagbagada dagitoy a banbanag, nagtakder ni Hesus iti nagtengtengngaanda, ket kinunana kadakuada, "Kapia kuma ti adda kadakayo." ³⁷ Ngem nakigtotda ken napnoanda iti buteng ta impagarupda nga nakakitada iti espiritu. ³⁸ Kinuna ni Hesus kadakuada, "Apay nga mariribukan kayo? Apay adda rumuar a saludsod dita pusoyo? ³⁹ Kitaenyo dagiti imak ken dagiti sakak, siak a mismo daytoy. Sagidendak ket makitayo. Gapu ta ti espiritu ket awan lasag ken tulangna, kas makitayo met nga addaanak." ⁴⁰ Idi naibagana daytoy, impakitana kadakuada dagiti ima ken dagiti sakana. ⁴¹ Kabayatan nga kasta la unay ti ragsakda, ken agsidsiddaawda, kinuna ni Hesus kadakuada, "Adda kadi uray ania nga makanyo?" ⁴² Inikkanda isuna iti tinuno a lames. ⁴³ Innala ni Hesus, ket kinnanna iti imatangda. ⁴⁴ Kinunana kadakuada, "Dagitoy dagiti insaok idi addaak kadakayo, nga amin a nakasurat iti linteg ni Moses ken kadagiti insurat dagiti propeta ken kadagiti Salmo ket masapul a maipatungpal." ⁴⁵ Kalpasannna, linukatanna dagiti panunotda, tapno maawatanda dagiti nasantoan a sursurat. ⁴⁶ Kinunana kadakuada, "Kas iti naisurat, masapul nga agsagaba ni Kristo ken agungar manipud kadagiti natay inton maikatlo nga aldaw. ⁴⁷ Ket ti panagbabawi ken pannakapakawan dagiti basbasol ket masapol a maikasaba iti naganna kadagiti amin a nasyon, nga mangrugi idiay Jerusalem. ⁴⁸ Dakayo ti testigo kadagitoy nga banbanag. ⁴⁹ Kitaenyo, ibaonko kadakayo ti kari ni Amak. Ngem aguray kayo idiay siyudad inggana nga makawesan kayo iti pannakabalin a naggapo idiay ngato." ⁵⁰ Ket inturong ida ni Hesus a rimuar inggana a makaasidegda idiay Betania. Inngatona dagiti imana ket binendisionanna ida. ⁵¹ Ti napasamak, kabayatan ti panangbendisionna kadakuada, imbatina ida ket naipangato idiay langit. ⁵² Ket dinayawda isuna sada nagsubli idiay Jerusalem nga napalalo iti ragsakda. ⁵³ Ket tuloytuloy nga addada idiay templo, nga nagdaydayaw iti Dios.