¹ Timmangad ni Hesus ket nakitana dagiti nababaknang nga lalaki a mangikabkabil kadagiti sagsagut iti pagipisukan. ² Nakitana ti nakurapay nga balo a babai nga nagipisok iti dua a barya. ³ Isu nga kinunana, "Pudno, ibagak kadakayo, daytoy a balo ket ad-adu pay ti naitedna ngem kadakuada amin. ⁴ Ta paset laeng ti nawadwad a gamengda ti naitedda a sagut. Ngem daytoy nga balo, manipud kinakurapayna, intedna iti amin a pagbiagna." ⁵ Kabayatan a dadduma kadakuada ket pagtutungtonganda ti maipanggep iti templo, no kasanu nga naarkusan iti napipintas a batbato ken datdaton, kinunana, ⁶ "No maipanggep kadagitoy a banbanag a makitkitayo, umayto dagiti al-aldaw nga uray maysa kadagiti batbato ket awanto ti mabati kadakuada nga saan a marba." ⁷ Isunga nagdamagda kenkuana, kunada, "Maestro, kaanunto a mapasamak dagitoy a banbanag? Ken anyanto ti pagilasinan nu dagitoy a banbanag ket mapasamaken." ⁸ Simungbat ni Jesus, "Agannad kayo ket di kay agpaallilaw. Ta adunto ti umay iti nagan ko, a kunada, 'Siak isuna,' ken, 'Asidegen ti tiempo.' Saanyo nga suruten ida. ⁹ Inton makangngeg kayo kadagiti gubat ken riribuk, saan kayo nga agbuteng, ta masapul a mapasamak dagitoy nga umuna, ngem ti panungpalan ket saan pay nga mapasamak a dagus." ¹⁰ Ket kinunana kadakuada, "Aggiginnubatto dagiti pagilian, ken pagarian a maibusur iti pagarian. ¹¹ Addanto napipigsa nga gingined, ken panagbisin ken didigra kadagiti nadumaduma a lugar. Addanto dagiti nakabutbuteng a paspasamak ken nakaskasdaaw a pagilasinan manipud langit. ¹² Ngem sakbay kadagitoy amin a banbanag, kabilendakayto ken idadanes dakayto, maidarum kayo kadagiti sinagoga ken ibaluddakayto, ken isangodakayto kadagiti ar-ari ken gobernador gapu iti nagan ko. ¹³ Daytoy ket iturongnakayto iti gundawayyo a mangipakaammo iti pammaneknekyo. ¹⁴ Ngarud, ikeddengyo iti puspusoyo a diyo isagana ti isungbatyo, ¹⁵ ta itedkonto kadakayo ti sao ken kinasirib a dinto masungbatan wenno kabaelan amin a kabusoryo. ¹⁶ Ngem iyawat dakayto met dagiti nagannak, kakabsat, kakabagian, ken dagiti gagayyem, ket papatayendanto dagiti dadduma kadakayo. ¹⁷ Kaguradakayto ti amin gapu iti nagan ko. ¹⁸ Ngem awanto iti uray maysa nga buokyo a mapukaw. ¹⁹ Gapu iti panagibturyo ket magun-odyonto ti biagyo. ²⁰ No makitayo ti Jerusalem nga napalawlawan kadagiti suldado, ammuyon nga asidegen ti pannakadadaelna. ²¹ Ket palubusanyo dagiti taga Judea nga tumaray kadagiti banbantay, ken pumanaw dagiti adda iti siyudad, ket diyo itulok nga sumrek dagiti naggapu iti ruar ti siudad. ²² Ta dagitoy dagiti panawen iti panagibales, tapno amin a banbanag nga naisurat ket matungpal. ²³ Kaasidanto pay dagiti masikog ken agpaspasuso iti dayta nga aldaw! Ta addanto ti nakaro a rigat iti pagilian, ken pungtot iti daytoy a tattao. ²⁴ Ket matumbadanto iti murdong ti kampilan, ken maipanawdanto nga agbalin a balod kadagiti amin a nasnasion, ket baddebaddekanto dagiti Hentil ti Jerusalem agingga a matungpal ti tiempo dagitoy nga Hentil. ²⁵ Addanto dagiti pagilasinan iti init, ken iti bulan, ken ti bitbituen, ken iti rabaw iti daga. Dagiti pagilian ket agrigat ton, mariribukan gapu iti daranudor iti baybay ken dalluyon. ²⁶ Addanto lallaki a matalimudaw gapu iti butengda ken iti namnamaenda a banbanag nga umay iti lubong. Gapu ta dagiti bileg ti langit ket magun-gonto. ²⁷ Ket makitadanto iti Anak ti Tao nga um-umay iti ulep nga addaan pannakabalin ken dayag. ²⁸ Ngem inton mangrugi a mapasamak dagitoy a banbanag, tumakder ken tumangad kayo, gapu ta iti pannakaisalakanyo ket asidegen." ²⁹ Nagsarita ni Hesus kadakuada iti pangarig, "Kitaenyo diay igos, ken amin nga kaykayo. ³⁰ No agrugi da nga agbulongen, makitayo ken ammoyo a ti panag-giinit ket asidegen. ³¹ Kastamet, inton makitayo dagitoy a banbanag a mapaspasamak, ammoyo a ti pagarian ti Dios ket umadanin. ³² Pudno nga ibagak kadakayo, daytoy nga henerasyon ket saan a mapukaw agingga nga saan a mapasamak dagitoy a banbanag. ³³ Ti langit ken ti daga ket mapukawto, ngem dagiti sasaok ket saan to pulos a mapukaw. ³⁴ Ngem kitaenyo dagiti bagbagiyo, tapno saan nga madagsenan dagiti puspusoyo iti kinadakes ken panagbarbartek ken ania man a pakasikuran iti daytoy a biag, ket ti aldaw saanto a kellaatto nga umay a ³⁵ kas palab-og. Ta umayto kadagiti amin nga agbibiag iti rabaw ti daga. ³⁶ Ngem agridam kayo koma a kankanayon, ikarkararagyo nga naan-anay koma ti pigsayo a mangliklik kadagitoy nga banbanag a mapasamak, ken agtakder iti sangnguanan ti Anak ti Tao." ³⁷ Isu nga kadagiti aldaw ket nagisuro isuna idiay templo, ken iti rabii ket rummuar isuna ken agpatpatnag idiay bantay a maawagan iti Olibo. ³⁸ Dagiti amin nga tattao ket masapada tapno denggen da isuna idiay templo.