¹ Itatta, kadagidiay nga al-aldaw, immay ti kanito nga ni Cesar Agusto ket nangipatulod iti linteg a mangibilbilin nga masapul a mailista amin nga tattao nga agbibiag iti pagilian ti Roma. ² Daytoy ti kaunaan a panagpalista nga naaramid kabayatan a ni Kerinio ti gobernador idiay Syria. ³ Isu nga tunggal maysa ket napan iti bukodna nga ili tapno agpalista para iti dayta a panagsensus. ⁴ Uray ni Jose ket pimmanaw manipud siudad ti Nazaret idiay Galilea ket nagdalyasat a napan iti ili nga Betlehem a sakop ti Judea, a mabigbig nga siudad ni David, agsipud ta isuna ket kaputotan a nagtaud iti pamilia ni David. ⁵ Napan isuna idiay tapno agpalista a kadwana ni Maria, a naitulag nga asawaenna ken agur-uray iti panaganakna. ⁶ Itatta immay ti kanito a kabayatan nga addada idiay, dimteng ti tiempo tapno ipasngayna ti anakna. ⁷ Inpasngayna ti maysa a lalaki, ti inauna nga anakna, ket binalkotna a nasayaat iti nagaatidug nga persay ti lupot. Sana inkabil iti kulluong, gapu ta awan ti kuarto a para kadakuada iti pagdagdagusan kadagiti bisita. ⁸ Iti dayta met laeng a rehion, adda dagiti agpaspastor nga agnanaed iti away ken banbantayanda dagiti aguurnong a karneroda iti rabii. ⁹ Pagammoan, nagparang kadakuada iti anghel ti Apo, ken ti dayag ti Apo ket linawaganna ti aglawlawda, ket napalalo ti butengda. ¹⁰ Ket kinuna ti anghel kadakuada, "Saan kayo nga agbuteng, agsipud ta dandanin nga ibagak kadakayo ti naimbag a damag a mangiyeg iti dakkel nga ragsak kadagiti amin a tattao. ¹¹ Ita adda mangisalakan a naipasngay para kadakayo iti siudad ni David! Isuna ni Kristo nga Apo! ¹² Daytoy ti pagilasinan a maited kadakayo, masarakanyonto ti maysa nga ubing a nabalkot iti nagatidug a napersay nga lupot a nakaidda iti kulluong." ¹³ Pagammoan, adda naitipon iti anghel nga adu a bilang ti nainlangitan a soldado nga agdaydayaw iti Dios, a kunkunada, ¹⁴ "Gloria iti Dios nga adda iti kangatoan, ken maadda koma ti kapia ditoy daga kadagiti tattao nga pakaay-aywanna." ¹⁵ Apaman a nakapanawen dagiti anghel manipud kadakuada a napandan idiay langit, kinuna dagiti agpaspastor iti tunggal maysa, "Intayo itan idiay Betlehem, ken intayo kitaen daytoy a banag nga napasamak, nga impakaammo ti Apo kadatayo." ¹⁶ Nagdardarasda a napan idiay ket nasarakanda ni Maria ken ni Jose, ken nakitada ti ubing nga nakaidda iti kulluong. ¹⁷ Kalpasan nga nakitada daytoy, impakaammoda kadagiti tattao no ania ti naibaga kadakuada maipapan iti daytoy nga ubing. ¹⁸ Ket nagsiddaaw amin a nakangngeg iti imbaga dagiti agpaspastor kadakuada. ¹⁹ Ngem pinanpanunot ni Maria ti maipapan kadagiti amin nga banbanag a nangngeganna, ket sinalimetmetanna dagitoy iti pusona. ²⁰ Nagsubli dagiti agpaspastor nga intantan-ok ken indaydayawda ti Dios gapu kadagiti amin a nangngegan ken nakitada, a kas iti naibaga kadakuada. ²¹ Idi maikawalo nga aldaw ken isu ti tiempo a pannakakugit ti ubing, pinanagananda isuna iti Hesus, ti nagan nga inted ti anghel sakbay ti pannakaisikogna. ²² Idi nalpas ti kasapulan nga bilang ti aldaw a para iti pannakadalusda, a sigun iti linteg ni Moises, inyeg da Jose ken Maria ti anakda iti templo idiay Jerusalem tapno isagutda iti Apo. ²³ Kas naisurat iti linteg ti Apo, "Tunggal inauna nga anak a lalaki a maipasngay ket mailasin para iti Apo." ²⁴ Immayda pay tapno agidaton da iti sagot a sigun ti naibaga iti linteg ti Apo, "maysa nga pares ti kalapati wenno dua a sibong nga kalapati." ²⁵ Kitaen, adda maysa a lalaki manipud Jerusalem nga agnagan ti Simeon. Daytoy nga lalaki ket nalinteg ken napapati iti Dios. Isu ket agur-uray iti mangliwliwa iti Israel, ken adda kenkuana ti Espiritu Santo. ²⁶ Inpakaammo kenkuana ti Espiritu Santo nga saan pay a matay agingga nga dina makita ti Kristo nga Apo. ²⁷ Maysa nga aldaw immay isuna idiay templo, babaen iti panangidalan ti Espiritu Santo. Idi impan dagiti nagannakna ti ubing, a ni Hesus, tapno aramidenda para kenkuana no ania ti nakaugalian ti linteg, ²⁸ ket inubba ni Simeon ti ubing, ken nagdayaw iti Dios ket kinunana, ²⁹ "Ita palubusam toy adipenmo nga pumanaw a sitatalna, Apo, a kas kunam iti saom. ³⁰ Agsipud ta nakita dagiti matak ti panangisalakanmo, ³¹ nga insaganam iti imatang dagiti amin nga tattao. ³² Agbalinto a silaw a mangiparangarang iti kinapudno kadagiti Hentil ken agbalin nga dayag dagiti tattaom nga Israel." ³³ Nagsiddaaw ti ama ken ina ti ubing kadagiti banbanag a naibaga maipanggep kenkuana. ³⁴ Ket binendisionan ida ni Simeon ken kinunana ken ni Maria nga inana, "Dumngegka a nasayaat! Daytoy nga ubing ket naituding a pakatinnagan ken pakabangonan dagiti adu nga tattao iti Israel ken pagilasinan a mailaksid. ³⁵ Maysa pay, sugatento ti kampilan ti kararuam, tapno dagiti kapanunotan manipud kadagiti adu nga puspuso ket maiparangarang." ³⁶ Maysa nga propeta a babai nga agnagan ti Ana ket adda met sadiay. Isuna ket anak ni Fanuel a nagtaud iti tribu ni Aser. Pirmi nga nabaketan isunan. Nagdennada iti asawana iti pito nga tawen kalpasan ti pannakikallaysana, ³⁷ ken balo isuna iti walopulo ket uppat nga tawen. Saan nga pulos a pimmanaw isuna iti templo ket kanayon nga agdaydayaw iti Dios babaen ti panagayunar ken panagkarkararag, iti rabii ken aldaw. ³⁸ Iti dayta met laeng nga oras, immasideg isuna kadakuada ken rinugianna ti nagyaman iti Dios. Imbagana ti maipapan iti ubing kadagiti amin nga agur-uray iti pannakasubbot ti Jerusalem. ³⁹ Idin ta nalpasda nga inaramid ti amin a banag a kinasapulan nga aramidenda segun iti linteg ti Apo, nagsublida idiay Galilea, iti bukodda nga siudad, a Nazaret. ⁴⁰ Dimmakkel ti ubing ken nagbalin a napigsa, nanayonan ti kinasiribna, ken adda kenkuana ti parabur iti Dios. ⁴¹ Tinawen nga mapmapan dagiti nagannakna idiay Jerusalem tapno makipagrambakda iti Fiesta ti Paskua. ⁴² Idi agtawen isuna ti sangapulo ket dua, simmang-atda manen a kas nakairwamanda nga ar-aramiden iti tiempo ti fiesta. ⁴³ Kalpasan a nagianda idiay agingga a nalpas ti aldaw ti fiesta, inrugidan ti nagsubli iti pagtaenganda. Ngem ti ubing a ni Hesus ket nagbati idiay Jerusalem a saan nga ammo dagiti nagannakna. ⁴⁴ Inpagarupda a naikuyog isuna kadagiti bunggoy a makipagdaldalyasat kadakuada, isu nga nagdalyasatda iti uneg ti maysa nga aldaw. Ket inrugida ti nagbirok kenkuana kadagiti kakabagian ken gagayyemda. ⁴⁵ Ket idi saanda nga mabirukan isuna, nagsublida idiay Jerusalem ket rinugianda a nagbirok sadiay. ⁴⁶ Iti napasamak ket kalpasan iti tallo nga aldaw, nasarakanda isuna iti templo, agtugtugaw iti tengnga dagiti manursuro, dumdumngeg ken agsalsaludsod kadakuada. ⁴⁷ Amin nga nakangngeg kenkuana ket nasdaaw iti pannakaawatna ken kadagiti sungbatna. ⁴⁸ Idi nakitada isuna, nasdaawda. Kinuna ti inana kenkuana, "Anakko, apay nga kastoy ti panangtratom kadakami? Dumngegka, ni amam ken siak ket nagdandanag a nangbirbiruk kenka." ⁴⁹ Kinunana kadakuada, "Apay nga birbirukendak? Diyo kadi ammo a masapul nga addaak iti balay ni Amak?" ⁵⁰ Ngem saanda nga naawatan ti kayatna nga sawen kadagidiay nga sasao. ⁵¹ Ket nagawid isuna a kaduada idiay Nazaret ken nagtulnog kadakuada. Inpateg amin ni Maria dagitoy a banbanag iti pusona. ⁵² Ngem nagtultuloy ni Hesus a dimakkel iti kinasirib ken bagi, ken nanayonan a naay-ayo kenkuana ti Dios ken dagiti tattao.