¹ Napasamak iti maysa nga Aldaw ti Panaginana, idi napan isuna iti balay ti maysa a panguloen dagiti Pariseo tapno mangan iti tinapay, nga palpaliiwenda isuna iti kasta unay. ² Pagammoan, iti sangoananna ket adda lalaki nga agsagsagaba iti pangdandanum iti bagina. ³ Sinaludsod ni Hesus kadagiti nalalaing iti Linteg dagiti Judio ken Pariseo, "Maiparit kadi ti panangagas iti Aldaw iti Panaginana, wenno saan?" ⁴ Ngem nagulimekda. Ngarud inigganan ni Hesus isuna, pinaimbagna isuna, ken pinalubosanna isuna. ⁵ Kinunana kadakuada, "Siasino kadakayo ti addaan anak a lalaki wenno baka a natnag iti bubon ti Aldaw iti Panaginana ket saanna a dagos nga apan guyuden nga iruar isuna?" ⁶ Saanda nga maited iti sungbat kadagitoy a banbanag. ⁷ Idi nadlaw ni Hesus no kasano dagiti naawis ket pinilida a nagtugaw kadagiti mararaem, nagsao isuna iti pangngarig kadakuada, ⁸ "No adda nangawis kadakayo iti maysa a padaya, saan kayo nga agtugaw iti lugar dagiti mararaem, gapu ta amangan no adda pay naawis nga ad-adda a mararaem ngem kadakayo. ⁹ Inton ti tao nga nagpada a nangawis kadakayo ket summangpet, ibagana kenka, 'Ited mo ti lugarmo iti daytoy maysa a tao,' ket gapu iti bainmo umakarka iti nababbaba a lugar. ¹⁰ Ngem no naawiska, mapanka agtugaw iti kababaan nga lugar, tapno inton summangpet ti nangawis kenka, mabalin nga ibagana kenka, 'Gayyem, inka iti nangatngato.' Ket mapadayawankanto iti imatang dagiti amin a kakaduam nga agtugtugaw iti lamisaan. ¹¹ Agsipud ta iti tunggal maysa nga mangitan-ok iti bagina ket maipababanto, ken isuna nga mangibabbaba iti bagina ket maitan-okto." ¹² Ket kastoy pay ti kinuna ni Hesus iti lalaki nga nangawis kenkuana, "No mangipaayka iti pangaldaw wenno pangrabii, saanmo nga awisen dagiti gagayyemmo wenno kakabsatmo wenno kakabagiam wenno dagiti babaknang nga kaarrubam, ta amangan laeng no awisendakamet, ken masubadanka. ¹³ Ngem no agpadayaka, awisem dagiti nakurapay, dagiti paralitiko, dagiti pilay, ¹⁴ ken dagiti bulag, ket mabendisyonankanto, agsipud ta saandaka a masubadan. Ta masubadankanto iti panagungar dagiti nalinteg." ¹⁵ Idi nangngeg ti maysa a nakitugaw iti lamisaan nga ayan ni Hesus dagitoy nga banbanag, kinunana kenkuana," Nabendisionan isuna a makipanganto iti tinapay iti pagarian ti Dios!" ¹⁶ Ngem kinuna ni Hesus kenkuana, "Adda maysa nga lalaki a nangisagana iti dakkel nga pangrabii ket nagawis iti adu. ¹⁷ Idi naisaganan ti pangrabii, imbaona ti adipenna tapno ibagana kadagiti naawis, 'Umaykayon, agsipud ta nakasagana aminen.' ¹⁸ Ngem nagrugida amin nga padapadada a nagpambar. Kinuna kenkuana ti umuna, 'Gimmatangak iti taltalon, ket masapul nga mapanak ket kitaek daytoy. Dispensarennak.' ¹⁹ Kinuna met ti maysa, 'Nakagatangak met iti lima nga paris iti baka, ket mapanko padasen isuda. Dispensarennak.' ²⁰ Kinuna met ti maysa a lalaki, 'Kaas-asawak laeng, ket ngarud saanak nga makaumay.' ²¹ Nagsubli ti adipen ken imbagana iti amona dagitoy a banbanag. Ket nakapungtot ti amo nga makinbalay ket kinunana iti adipenna, ' Darasem iti rumuar ket ingka kadagiti kalkalsada ken daldalan iti siudad ket iyegmo ditoy dagiti nakurapay, dagiti paralitiko, dagiti bulag, ken pilay.' ²² Kinuna ti adipen, 'Amo, naaramidkon iti imbilinmo kaniak, ngem adda pay latta iti pagyanan.' ²³ Kinuna ti amo iti adipen, 'Rumuarka kadagiti kalkalsada ken kakaykaywan ket pilitem isuda a sumrek, tapno mapunno ti balayko. ²⁴ Ta ibagak kenka, nga awan kadagiti lallaki nga immuna a naawis iti makaramanto iti pangrabiik." ²⁵ Itatta adu unay nga tattao iti sumursurot kenkuana, ket timmalyaw isuna ket kinunana kadakuada, ²⁶ "No adda siasinnoman nga umay kaniak ket saanna nga ayaten ti bukodna nga ama, ina, asawa, annak, kakabsat nga lallaki ken babbai, ken iti bukodna met laeng a bagi, saan isuna nga agbalin nga adalak. ²⁷ Ti siasinoman nga saan a mangawit iti bukodna nga krus ken umay sumorot kaniak ket saan nga agbalin nga adalak. ²⁸ Ta siasino kadakayo ti agtarigagay nga agpatakder iti tore ket saan nga agtugaw nga umuna ken mangbilang iti gatad tapno makwentana metlaeng no adda kenkuana dagiti masapulna a pangleppas iti daytoy? ²⁹ Ta no saan, no naikabilnan ti pundasyon ket saanna a nabaelan nga inleppas, uyawento dagiti amin nga makakita iti daytoy, ³⁰ a kunaenda, 'Nangrugi a nangipatakder daytoy nga tao ngem saanna met a kinabaelan nga inleppas.' ³¹ Wenno ania nga ari, iti ipapanna a mangsango iti maysa pay nga ari iti gubat, ket saan a nagtugaw nga umuna ken dumngeg iti pammagbaga no kabaelanna a kadua iti sangapulo a ribo nga lallaki a makigubat maibusor iti maysa nga ari a kaduana iti duapulo nga ribo a lallaki? ³² Ket no saan, kabayatan nga adayo pay ti sabali a bunggoy dagiti suldado, mangibaon iti mangidaulo ket dawatenna iti panagkapiada. ³³ Isu nga, siasinoman nga saan a mangibbat kadagiti amin nga adda kenkuana ket saan nga agbalin nga adalak. ³⁴ Nasayaat ti asin, ngem no mapukaw iti ramanna daytoy, kasano nga paapgaden manen? ³⁵ Awanen ti usarna para iti daga wenno uray pay iti takki a naurnong. Maibelleng laeng daytoy. Siasino nga adda lapayagna nga agdengngeg, bay-anyo isuna nga agdengngeg."