¹ Ngarud, no pinagungarnakayo ti Dios a kadua ni Kristo, sapulenyo dagiti banbanag idiay ngato, a pagtugtugawan ni Kristo iti makannawan ti Dios. ² Panunotenyo dagiti banbanag iti ngato, saan a dagiti banbanag iti daga. ³ Ta nataykayon, ken nailemmeng dagiti biagyo a kadua ni Kristo iti Dios. ⁴ Inton agparang ni Kristo, nga isu ti biagyo, ket makipagparangkayonto met kenkuana iti dayag. ⁵ Patayenyo ngarud dagiti kamkameng nga adda iti daga - kinaderrep, kinarugit, pakaragsakan, dakes a tarigagay ken agum, a panagrukbab kadagiti didiosen. ⁶ Ta gapu kadagitoy a banbanag nga um-umay ti pungtot ti Dios kadagiti annak iti kinasukir. ⁷ Kadagitoy met laeng a banbanag ti nagnaanyo idi nagbiagkayo kadakuada. ⁸ Ngem ita ket masapul nga iwaksiyo amin dagitoy a banbanag-pungtot, unget, dakes a tarigagay, dagiti panaglais, ken naalas a sarsarita a rumrumwar kadagiti ngiwngiwatyo. ⁹ Saankayo nga aggiinnulbod, ta inussobyon ti daan a kinatao agraman dagiti aramidna. ¹⁰ Inkabilyon ti baro a kinatao, a mapabpabaro iti pannakaammo maiyannurot iti ladawan ti nangiparsua kenkuana. ¹¹ Iti daytoy a pannakaammo, awan iti Griego ken Judio, pannakakugit ken saan a pannakakugit, narungsot a tattao, taga Scythian, tagabu, nawaya a tao, ngem ketdi ni Kristo ti amin a banbanag ken ti adda iti amin a banbanag. ¹² Isuotyo ngarud, a kas maysa a pinili ti Dios, nasantoan ken maipatpateg, paggapgapuan ti asi, kinaimbag, kinapakumbaba, kinaemma ken kinaanus. ¹³ Aggiinnanuskayo. Agpipinnaraburkayo. No adda riri ti maysa a tao maibusor iti sabali a tao, pakawanenyo iti isu met laeng a wagas a panangpakawan kadakayo iti Apo. ¹⁴ Kangrunaan kadagitoy amin a banbanag, maaddaankayo iti ayat, nga isu ti reppet ti kina-annay. ¹⁵ Ipalubosyo nga agturay ti kapia ni Kristo kadagiti puspusoyo. Iti daytoy a kapia a nakaayabanyo iti maymaysa a bagi. Ken agbalinkayo a managyaman. ¹⁶ Agnaed koma kadakayo ti sao ni Kristo a siaanay. Iti amin a kinasirib, surwan ken bagbagaanyo ti maysa ken maysa a mabuyugan kadagiti salmo ken himhimno ken naespirituan a kankanta. Agkantakayo nga addaan iti panagyaman kadagiti pusoyo para iti Dios. ¹⁷ Ken aniaman nga aramidenyo, iti sao wenno iti aramid, aramidenyo amin para iti nagan ni Apo Jesus. Agyamankayo iti Dios Ama babaen kenkuana. ¹⁸ Assawa a babbai, agpaituraykayo kadagiti assawayo, ta daytoy ti maiyannatop iti Apo. ¹⁹ Assawa a lallaki, ayatenyo dagiti assawayo, ken saankayo a gumura maibusor kadakuada. ²⁰ Annak, agtulnogkayo kadagiti nagannakyo iti amin a banbanag, ta makaay-ayo daytoy iti Apo. ²¹ Amma, saanyo a ruruden dagiti annakyo, tapno saandanto a maupay. ²² Dakayo a tagabu, agtulnogkayo kadagiti amoyo segun iti lasag iti amin a banbanag, saan nga iti panaginggagaget a kas mangay-ayo kadagiti tattao, ngem iti napasnek a puso. Agbutengkayo iti Apo. ²³ Aniaman nga aramidenyo, agtrabahokayo nga agtaud iti kararua a kasla para iti Apo ken saan a para kadagiti tattao. ²⁴ Ammoyo nga awatenyonto manipud iti Apo ti gungguna ti panagtagikua. Ni Apo a Kristo ti pagserserbianyo. ²⁵ Ta ti siasinoman nga agaramid iti kinakillo ket awatennanto ti supapak ti kinakillo nga inaramidna, ken awan iti panangidumduma.