¹ Ita, maipanggep kadagiti tiempo ken panawen, kakabsat, saanen a masapul iti aniaman a banag a maisurat kadakayo. ² Ta ammoyon a naan-anay nga umay iti aldaw ti Apo a kasla agtatakaw iti rabii. ³ No ibagada a, "Kapia ken kinatalged," ket kellaat a pannakadadael ti umayto kadakuada. Daytoy ket kaslanto iti sakit ti panagpasikal ti masikog. Awanto ti pamuspusan a makalibasda. ⁴ Ngem dakayo, kakabsat, awankayo iti kinasipnget tapno maunaannakayo iti dayta nga aldaw a kas iti agtatakaw. ⁵ Ta annaknakayo amin ti lawag ken annak ti aldaw. Saantayo nga annak ti rabii wenno ti kinasipnget. ⁶ No kasta ngarud, saantayo koma a matmaturog a kas iti ar-aramiden dagiti dadduma. Ngem ketdi, agpalpaliiwtayo latta ken agteppel. ⁷ Ta dagiti matmaturog ken dagiti agbartek ket aramidenda daytoy iti rabii. ⁸ Ngem gapu ta annaknatayo iti aldaw, agteppeltayo. Ikabiltayo ti kalasag ti barukong iti pammati ken ayat, ken iti helmet, isu iti nakaisiguradoan iti pannakaisalakan. ⁹ Ta saan nga intuding ti Dios a pungtot ti pagtungpalantayo, ngem tapno magun-odtayo ti pannakaisalakan babaen kenni Apotayo a Jesu-Kristo. ¹⁰ Natay isuna para kadatayo tapno uray no nakariingtayo wenno matmaturog, makipagbiagtayo kenkuana. ¹¹ Liwliwaen ken papigsaenyo ngarud iti tunggal maysa, a kas iti ar-aramidenyon. ¹² Dawatenmi kadakayo, kakabsat, a bigbigenyo dagiti agtrabtrabaho kadakayo ken mangituray kadakayo iti Apo ken mangbalbalakad kadakayo. ¹³ Dawatenmi pay kadakayo nga utobenyo ida a raemen iti kasta unay a panagayat gapu iti trabahoda. Makikapiakayo kadagiti kakaduayo. ¹⁴ Ballakadandakayo, kakabsat: ballaaganyo dagiti awan urnosna, papigsaenyo dagiti naupay, tulonganyo dagiti nakapsut, anusanyo iti amin. ¹⁵ Kitaenyo ta awan koma iti agibales ti dakes iti dakes iti siasinoman. Ngem ketdi, ikarigatanyo nga aramiden iti nasayaat para iti tunggal maysa ken para iti amin. ¹⁶ Agrag-okayo a kankanayon. ¹⁷ Dikay agsardeng nga agkararag. ¹⁸ Pagyamananyo ti tunggal banag, ta daytoy ti pagayatan ti Dios kenni Kristo Jesus para kadakayo. ¹⁹ Saanyo a sebseban ti Espiritu. ²⁰ Diyo laisen dagiti padto. ²¹ Padasenyo dagiti amin a banbanag. Salimetmetanyo ti naimbag. ²² Liklikanyo iti aniaman a kita iti dakes. ²³ Sapay koma ta naan-anay a pasantoennakayo ti Dios iti kapia. Sapay koma ta mataginayon ti sibubukel nga espiritu, kararua ken bagi nga awan ti pakapilawan para iti iyuumay ni Apotayo a ni Jesu-Kristo. ²⁴ Napudno isuna a nangayab kadakayo, ti met laeng mangaramid iti dayta. ²⁵ Kakabsat, ikararagandakami met. ²⁶ Kablaawanyo amin dagiti kakabsat babaen iti nasantoan nga agek. ²⁷ Dawatek babaen iti Apo nga ibasayo daytoy a surat kadagiti amin a kakabsat. ²⁸ Sapay koma ta adda kadakayo ti parabur ni Apotayo a Jesu-Kristo.