¹ हमर बीचमे घटके पुरो भए घटनको विवरण सँग्रह करनको काम बहुत जनी अपने हातमे लै हएँ । ² बे जो सुरुसे बचनको प्रत्यक्ष गवाहा और सेवक रहएँ, बे जा बात हमके सुप्दैहए । ³ माननीय थियोफिलस, मए सुरुसे सावधनीसे सब बातके ढुड़ो हँओ, और तुमके ताहीँ लैनसे लैन मिलाएके घटे भए घटना मोके लिखान अच्छो लागो,। ⁴ ताकी तुमके सिकाओ भाव बिषयको सत्य तुमके पता होबाए। ⁵ यहूदीयको राजा, हेरोदके पालामे,अबियाको कुलको जकरिया नाउँ भव एक जनी पूजारी रहए । बाकी बैयर हारुन-वंशकी रहए । बाको नाउँ एलीशिबा रहए । ⁶ बे दोनो परमेश्वरके अग्गु धर्मी रहाए, और परमप्रभुको सबै आज्ञा और धार्मिक-विधानमे निर्दोष हुइके नेगतरहए । ⁷ पर बिनको कोइ सन्तान ना रहए, कहेकी एलिशिबा बाँझी रहए, और बे दोनेनको उमेर ढल् गवरहए । ⁸ जब जकरिया परमेश्वरके अग्गु अपन दलके पालामे पूजारीको काम करत् रहए,। ⁹ तव बाहँवाको रितिके जैसो चिठ्ठासे पूजारीक सेवाके ताहँ मन्दीर भितर धुप पजारन ताहँ छानत रहए । ,और बा चिट्टा डरत पेती परमप्रभुके मन्दिरभितर घुस्के धूप पजारनको काम जकरियाके पड़ो । ¹⁰ धूप पजारन बेरा आदमीको सबै भीड़ बाहेर प्रार्थना करत रहाए । ¹¹ ठिक बहे समय परमप्रभुक एक जनी स्वर्गदूत धूप-वेदीके दाहिनाघेन ठणो देखि । ¹² जकरिया बा स्वर्गदुतके देखके घब्रीयए गौ, और डराए गौ । ¹³ पर दूत बासे कही, “मतडराए जकरिया,कहेकी तिर प्रार्थनाकी सुनाई हुइगै हए। अब तिर बैयर एलीशिबा तिरतही एक लौड़ा जन्माबैगी, और ताए बाको नाउँ यूहन्ना धारीए। ¹⁴ तोके खुशी और आनन्द होबैगो, और बेढब जनी बा के जन्ममे रमांमङ्गे। ¹⁵ कहेकी बा परमप्रभुके अग्गु महान होबैगो । बा दाखमध और कुछु फिर मध कबहू नापिबैगो, और अपनी आइयाके गर्भसे बा पवित्र आत्मासे भरोभौ होबैगो । ¹⁶ बा इस्राएलके सन्तानमे बहुतनके बिनके परमप्रभु परमेश्वरघेन घुमाबैगो । ¹⁷ दौवाको मन लौड़ा-लौड़ीयघेन और अनाज्ञाकारीके धर्मीकी बुध्दीघेन लैटान और प्रभुक तही योग्य बनाएके एक जाति तयार करन बाके अग्गु बा एलियाको आत्मा और शक्तिमे जाबैगो ।” ¹⁸ तव जकरिया दूतसे कहि, ''जा मैए कईसे जानङ्गो्? मैए बूड्ढों हुईगव और मेरी बैएरकी उमेर फिर ढलकगइ हए ।” ¹⁹ स्वर्गदूत बासे कही, ''मैए गब्रिएल हौँ, मैए परमेश्वरके अग्गु ठड़ोरहत हौं। तोसे बात करन और जा ख़ुशीकी समाचार सुनान मोके पठाईहए। ²⁰ जैन दिन तक जे बात पूरो नहुइहए, तब तक तैए गूँगो होबैगो और मसक न पाएहए,कहेकी ताए मीर वचनउपर विश्वास नकरो, जउन वचन अपने समयमे पूरो होबैगो| ।” ²¹ आदमी जकरियाके आसियतरहए और मन्दिरमे देर हुईगव तव घब्रीयाएगए । ²² बा बाहिर निकरके आतै बिनसे मस्कनै नापाई और बा मन्दिरमे दर्शन देखि हए कहिके बे बुझी| बा बिनके इशारा करन लगो,तव बा गूँगो हिइगौ। ²³ बाको सेवाको दिन पुरो हुइके पिछु बा अपन घर गईभव। ²⁴ ऐसीए बाकी बैयर एलीशिबा गर्भवती भई, और पाँच महीनातक लुक्के बैइठी और आइसो कही ।, ²⁵ "आदमीक बिचमे मीर कलङक हटानतही अब परमप्रभु मिरउपर आईसी कृपा करिहैए। ²⁶ " छैटौँ महीनामे परमेश्वर गब्रिएल स्वर्गदूतके गालीलको नासरत नाउँको सहेरमे पठाईरहए। ²⁷ बा एक कन्य- लौड़ीयठीन गव बाकी मगनी दाऊदके घरानाको योसेफ कहनबारो एक आदमीसे भव रहए| बा कन्यको नाउँ मरियम रहए। ²⁸ स्वर्गदूत बाकेठिन जाएके कही, “हे कृपा -पात्र तोके अभिवादन! परमप्रभु तीरसँग हए।” ²⁹ पर बा जा बातसे गजम चिनचित हुइगई, और जा कईसो किसमको अभिवादन हए कहिके मनमे सोचन् लागी। ³⁰ स्वर्गदूत बासे कही, “मतडराबए,मरियम, कहेकी ताए परमेश्वरसे कृपा पाओ हए। ³¹ अब देख तेरो गर्भधारण होबैगो, और एक लौड़ा जन्माबैगो, और ताए बक नाउँ येशू धरैगो। ³² बा माहान होबैगो और परमप्रधानको पुत्र कहेलाबैगो और परमप्रभु परमेश्वर बाको बक् पुर्खा दाउदको सिंहासन देबैगो। ³³ बा याकूबके वंशउपर सदासर्वद राज्य करैगो, और बाको राज्यको अन्त कबहुनाए होबैगो।” ³⁴ मरियम स्वर्गदूतसे कही, “जा कईसे होबैगो, कहेकी मए एक कन्या हौ ।” ³⁵ स्वर्गदूत बाके जवाफ दैइके कही, “पवित्र आत्मा तिरमे अबैगो, और सर्वोच्चक शक्तिको छांइ तीरउपर पणौगी । बहेमरे जो जन्मैगो, बा पवित्र,अर्थात् परमेश्वरको पुत्र कहेलाबैगो। ³⁶ देख, तीर नातेदार एलीशिबा फिर बुड़ेवस्थामे लौड़ा गर्भधारण करिहए, और जो बाँझी कहेलात रहए, बा अभए छैटौँ महीनामे हए । ³⁷ कहेकी परमेश्वरके ताहिँ कछु बात असम्मभ नाहए ।” ³⁸ तव मरियम कही, “देख,मए परमप्रभुकी दासी,मोके तुमर वचनअनुसार होबए । तव स्वर्गदूत बाकेठीनसे बिदा हुइगै । ³⁹ बे दिनमे मरियम जलदीसे पहाड़घेन यहूदियाक एक गाउँमे गई,। ⁴⁰ और जकरियाको घरमे घुस्के एलीशिबाके अभिवादन करी। ⁴¹ जब एलीशिबा मरियमकी अभिवादन सुनी तब बाको गर्भको बालक कुदपड़ो, और एलीशिबा पवित्र आत्मासे भरिपूर्ण भई,। ⁴² और एलीशिबा जोड़से कही, “बैयर मैइसे ताए धन्यकी हए, और तीर गर्भक फल धन्यको होबै। ⁴³ मीरउपर कैसे अइसो कृपा भव कि मेरी प्रभुकी आइय मीरठीन आइ? ⁴⁴ कहेकी देख, तीर अभिवादन मीर कानमे पड़तएखिनक् बालक मीर गर्भमे आनन्दसे कुदो। ⁴⁵ बे धन्यकी हए, जो परमप्रभु बिनसे कहीभई बात पूरो होबैगो कहिके विश्वास करी।” ⁴⁶ तव मरियम कही, “मीर प्राण परमप्रभुको गुणगान करत हए,। ⁴⁷ और मीर आत्मा मीर मुक्तिदाता परमेश्वरमे रमाहट करतहए। ⁴⁸ कहेकी बा अपनी दासीकी दिनतामे कृपा-दृष्टि करीरहए,। देख अब से सबै पुस्ताके मोके धन्यकी कहमङ्गे। ⁴⁹ कहेकी बा, जो शक्तिशाली हए, बा मीर तही महान काम करीहए| बाकी नाउँ पवित्र हए। ⁵⁰ बाको डरमानन् बारेक् उपर बाकी कृपा पुस्तासे पुस्तातक रहबैगो। ⁵¹ बा अपनी बाहुलीको सामर्थ्य प्रकट करीहए। बा मनभितरको कल्पनामे घमण्ड करनबारोक् छरपष्ट करहए। ⁵² बा शक्तिशालीनके बिनकी सिंहसनसे हटाईहए,। और दीनन्के उठाइहए। ⁵³ भुखनेके बा अच्छी चीजसे तृप्त करीहए, और धनीके बा रितो हात पठाईहए। ⁵⁴ बा अपनो कृपा स्मरण करके अपनो सेवक इस्राएलके सहायता दैईहए,। ⁵⁵ और हमर पुर्खाके कहोभवहानी, अब्राहाम और बाकी भावी सन्तानके सदाकालके ताहिँ दया देखाईहए।” ⁵⁶ मरियम बाकेसँग लगभग: तीन महीना बैठके अपने घर घुमी। ⁵⁷ अब एलीशिबाको लरकौरी होन बेरा आयो, और बा एक लौड़ा जन्माई। ⁵⁸ परमप्रभु बाकउपर बाके बाड़ो अनुग्रह दिखाइरहए कहिके सुनी बाकी परोसी और नातेदार बोकसंग रमाई। ⁵⁹ आठौँ दिनमे बे बालके खतना करन आए। और बाको नाउँ बाको दौवाको नाउँजैसो जकरिया धरन लगेरहए,। ⁶⁰ पर बाकी आईया कही, “नाए, जक नाउँ यूहन्ना होबैगो।” ⁶¹ बा बिनसे कही, “तिर नातेदारमे आईसो नाउँ भौ कोई नाहए।” ⁶² तव बे बाको दौवासे इशारा करके पुछि ताए जाको नाउँ का धरन चाँहतहए? ⁶³ बा एक लिखनबारो मगाई ""जाको नाउँ यूहन्ना हए'' कहिके लिखदाई| बे सब छक्क पड़ीगए। ⁶⁴ तुरन्ताए बाको मुह खुलीगव और बाक् बोली खुलिगई और बा परमेश्वरको प्रशंसा करन लगो। ⁶⁵ बाक पड़ोसीमे डर छैगौ। यहूदियाको जम्माए पहाड़ी मुलकभर जा घटनाको चर्चा फैलगव। ⁶⁶ जा बात सुनके सबए जा बालक पछु कइसो होबैगो कहिके अपन मनमे गुनी। कहेकी परमप्रभुको बाहुली बाके उपर रहए। ⁶⁷ बाको दौवा जकरिया आत्मासे भरके अगमवाणी बोलन लागो, ⁶⁸ " इस्राएलको परमप्रभु, परमेश्वरको प्रशंसा होबए, कहेकी बा आओ हए, और अपन आदमीके उध्दार दैईह। ⁶⁹ बा हमर ताहिँ आपन दास दाऊदकी वंशमे एक शक्तिशाली मुत्तिदाता खड़ा करदैईहए,। ⁷⁰ जैसी बा प्राचीन कालसे आपन पवित्र अगमवक्ताके मुहुसे बोलिरहए,। ⁷¹ कि हमर दुस्मनसे और हमके घृणा करनबारेक सबैक हातसे हम उध्दार पामए। ⁷² बा हमर पुर्खानके कृपा दिखन ताहिँ, और अपनो पवित्र करार स्मरण करन ताहिँ,। ⁷³ जैन शपथ बा हमर पुर्खा अब्राहामसँग खाईरहए,। ⁷⁴ की हम हमर शत्रुके हातसे मुक्त होमए, और बिना डरके ⁷⁵ हमर सबैए जीवनभर पवित्रता और धार्मिकतामे बाके अग्गु बाको सेवा करनताहि योग्यको बनान कहिके कसम खाइ। ⁷⁶ हे बालक, ताए सर्वोच्चको अगमवक्ता कहलाबैगो, कहेकी ताए प्रभुके अग्गु अग्गु बाको डगर तयार करत जाबैगो,। ⁷⁷ बाको जातिके पाप-क्षामासे मुक्तिको ज्ञान देन ताहिँ। ⁷⁸ हमर परमेश्वरको कोमल कृपाके कारणसे, स्वर्गसे सबेरेको जोत हमरउपर पड़ैगो । ⁷⁹ और अन्धकार और मृत्युकी छाँईमे बैठनबारेको जोत मिलैगो । और हमर पाँव शान्तिक डगरघेन डूर्यमङ्गे।” ⁸⁰ तव बालक यूहन्ना बढ़ताए और आत्मामे ताग्तीलो होतएगव, और इस्राएलीठीन खुला रुपमे देखा ना पड़न तक बा उजाड-स्थानमे बैठो।