¹ सुरुमे बचन रहए, बचन परमेश्‍वरसँग रहए, और बचनए परमेश्‍वर रहए | ² बा सुरुवएसे परमेश्‍वरसंग रहए | ³ सब चिज बहेसे बनो, और बनो कोई चिज फिर बा बिना ना बनो । ⁴ बामे जीवन रहए, और बो जीवन आदमीक ताँही ज्योति रहए | ⁵ ज्‍योति अँधीयारोमे चमकत हए, और अँधीयारो बाके ना जित पाई । ⁶ परमेश्‍वरसे पठाओ एक आदमी रहए, जौनको नाउँ यूहन्‍ना रहए | ⁷ बासे सब विश्‍वास करएँ करके बा ज्योतिकी गवाही देनके ताँही साँची बनके अओ | ⁸ यूहन्‍ना अपनाए ज्योति ना रहए, पर बा ज्योति के गवाही देन अओ। ⁹ बा सबए आदमीनके ज्योति देनबारो और संसारमे आनबारो सच्चो ज्योति रहए । ¹⁰ बा संसारमे रहए, और संसार बहेसे बनो, तहुँ संसार बाके ना पहिचान पाईं । ¹¹ बा अपन आदमी ठिन अओ, तहुँ अपने आदमी बाके ग्रहण ना करीं । ¹² तव जित्‍नो बाके ग्रहण करीं और बाको नाउँमे विश्‍वास करीं, बा उनके परमेश्‍वरको सन्तान होनके अधिकार दै । ¹³ बे ना रगतसे, ना शरीरकी इच्छासे, और ना आदमीके इच्छासे , पर बे परमेश्‍वरसे जन्मे रहएँ । ¹⁴ और वचन देहेधारी भव, और हमर बिचमे बास करी । हम पितासे आओ भव एकए पुत्र जैसो और अनुग्रह और सत्यसे पुरो महिमा देखे । ¹⁵ यूहन्‍ना बाके बारेमे गवाही देत जोडसे कहि, “मोसे पिच्छु आन बारो मोसे बडो हए, काहेकी बा मोसे अग्गुको हए जौनके बारेमे मए कहो, बा बहे मनै हए।” ¹⁶ काहेकी बाको पूर्णतासे हम सब अनुग्रह उपर अनुग्रह पाए हएँ । ¹⁷ काहेकी व्यवस्था परमेश्‍वर मोशासे दई, अनुग्रह और सत्यता येशू ख्रिष्टसे आओ । ¹⁸ कोई फिर परमेश्‍वरके कबहु ना देखि हएँ । पिताको छातीमे अडास लागन बारो एकए परमेश्‍वर बाके चिनाई हए । ¹⁹ "यहूदी यरुशलेमसे पुजारी और लेवीके "तुम कौन हौ ?” करके पुछ्न पठाईं, तव यूहन्‍नाकी गवाही जा हए । " ²⁰ "बा खुलके कही, और इन्कार ना करी, और "उत्तर दै "मए ख्रीष्ट न हौं । " ²¹ "तव बे उनसे कही, “तव तुम कौन हऔ ? का तुम एलिया हौ ?” बा कही ,"मए न हौं ।” बे कहि का तुम अगमवक्ता हौ ?” बा कही, मए न हौं ।” ²² तव बे बिनके कही तुम कौन हऔ ताकि हमके पठान बारेके हम जबाफ दए पामए । तुम अपने वारेमे का कहत हौ ?” ²³ "बा कहि "मए उजाड-स्थानमे चिल्लान बारो एक आबाज हौ । "परमप्रभुके ताहीं डगर सुध करओ' जैसो यशैया अगमवक्ता कहि ।" ²⁴ उनके पठाए भए फरिसीनसे रहएँ । ²⁵ " बे बासे पुँछी "और कहिं "तुम ना ख्रीष्ट , ना एलिया, ना अगमवक्ता हौ फिर तव, काहे बप्तिस्मा देतहौ ?” ²⁶ " और यूहन्‍ना उनके यईसी जबाफ दै, “मए पानीसे बप्तिस्मा देतहौं,। तव तुमर बीचमे न‍ चिनो कोई ठाडो हए, । ²⁷ मोसे पिच्छु आनबारो बहे हए । बाके जुताको तनी खोलन लायकको मए न हौं ।” ²⁸ यर्दन नदीया पार बेथानियामे जा बात भव रहए, जहाँ यूहन्‍ना बप्तिस्मा देत रहए । ²⁹ दुसरे दिन यहून्‍ना येशूके अपन घैन आत देखि और कहि, “देखओ, संसारको पाप उठान बारो परमेश्‍वरको थुमा ! ³⁰ मोसे पिछु आन बारो मोसे बडो हए, काहेकि बा मोसे अग्गुसे हए कहिके मए कहो बहे हए।' ³¹ मए अपनए बाके न चिनो, तव बा इस्राएलमे प्रघट होबए कहिके मए पानीसे बप्तिस्मा देत आओ ।” ³² यूहन्‍ना अइसे गवाही दै, “मए पवित्र आत्मा स्वर्गसे कबुतरके रुपमे उतरतै आत और बाके उपर बैठत देखो । ³³ मए बाके ना चिनो रहौं, पर पानीसे बप्तिस्मा देनके पठान बारो मोके कहि ,तुम जौनके उपर पवित्र आत्मा उतरत आए और बाके उपर बैठत देखए हए, पवित्र आत्मासे बप्तिस्मा देन बारो बहे हए ।” ³⁴ मए देखो भव, और बहे परमेश्‍वरको पुत्र हए कहिके गवाही दओ हओं।" ³⁵ फिर दुसरे दिन यूहन्‍ना आपनो दुई जनी चेलाके संग ठाडो रहए । ³⁶ बे येशूके बहे डगर हुईके जात देखीं और यूहन्‍ना कहि, “देखौ, परमेश्‍वरको मेम्‍ना !” ³⁷ यूहन्‍ना अइसो कहात जे दुई चेला सुनी और बे येशूके पिच्छु लगगए । ³⁸ तव येशू बे बाके पिच्छु आत देखी , और बिनसे कही, “तुम का ढुड्त हऔ ?” बे बासे कहीं, “रब्बी {जौनको अर्थ हए गुरुजी} तुम कहाँ रहत हऔ ?” ³⁹ बा उनसे कहि, “आओ, और तुम देखैगे ।” तव बे आए, और बाको बैठन बारो ठाऊँ देखिं । बे बहे दिन बाके संग बैठे, काहेकी लगभग चार बजिगव रहए । ⁴⁰ यूहन्‍नाको कहो सुननबारे और येशूक पच्छु लागनबारे बे दुई जनी मैसे एक जनी सिमोन पत्रुसको भईया अन्द्रीयास रहए । ⁴¹ अन्द्रीयास अपन भईया सिमोनके पाईके कहि “हम मसिहके (जौनको अर्थ हए, ख्रीष्ट) के पाएगयँ हएँ ।” ⁴² बा अपन भईयाके येशू ठिन लाई । और येशू बाके देखि और कहि, “तए यूहन्‍नाके लौंड़ा सिमोन हए, । तए केफास (जौनको अर्थ हए, पत्रुस) कहोजाइगो ।” ⁴³ दुस्रो दिन येशू गालीलमे जान बा जगहके छोड्न चाँहत रहए । और फिलिपके पाएके येशू बासे कही, 'मिर पिच्छु लाग ।” ⁴⁴ अन्द्रियास और पत्रुस कता फिलिप फिर बेथसेदा सहेरके रहएँ, । ⁴⁵ फिलिप नथानेलके पाएके कहि, “जौनके बारेमे मोशा व्यवस्थामे और अगमवक्ता फिर लिखिरहँए, योसेफको पुत्र नासरतको येशूके हम पाएगएँ हए ।” ⁴⁶ नथानेल उनसे कहि, “का नासरतसे कछु अच्छी बात अए सकत हए ?” फिलिप बासे कही,”आएके देखओ ।” ⁴⁷ येशू नथानेलके अपने घेन आत देखि और बा उनके बारेमे कहि, “एक जनी पक्को इस्राएलीके देखओ, जोमे कोई झुठ ना हए।” ⁴⁸ नथानेल पुँछी, “तुम मोके कैसे चिनलए ?” येशू बाके जवाफ दैके कही, “फिलिप तोके बुलानसे अग्गु, गुलरको रुखा तरे मए तोके देखो रहौं ।” ⁴⁹ नथानेल बासे कही, “रब्बी, तुम परमेश्‍वरके पुत्र हौ, तुम इस्राएलके राजा हऔ ।” ⁵⁰ येशू बिनके जबाफ दैके कही, “मए तोके गुलरके रुखा तरे देखनके कारनसे का तुम मोके विश्‍वास करत हऔ ? तुम जासे फिर बडो बडो काम देखैगे ।” ⁵¹ येशू कही, “नेहत्य, मए तुमसे कहात हऔँ, तुम स्वर्ग खुलो और परमेश्‍वरके स्‍वर्गदुत आदमीको पुत्रके उपर चढत और उतरत देखैगे ।”