अध्याय १
1
मय पावल ख्रीष्टको एक प्रेरित जो कोई आदमीसे औ आदमीकद्वारा भव प्रेरित न हऔं, पर येशू ख्रीष्ट और परमेश्वर पिताद्वारा भव हौं, जौन बाके मरो मैसे जिन्दा करी।
2
मिरसँग होनबारे सब भैयनके सँग मय जा चिट्ठी गलातियाके सबै मण्डलीनके लिखन डाटो हौं ।
3
परमेश्वर हमर पिता और प्रभु येशू ख्रीष्टसे तुमके अनुग्रह और शान्ति होबै।
4
जौन हमर परमेश्वर और पिताको इच्छा अनुसार जा वर्तमान दुष्ट संसारसे हमके छुट्कारा देनके हमर पापके ताहिं अपनएके अर्पण करी।
5
परमेश्वरके सदासर्वदा महिमा होत रहबए।
6
मोके अचम्मो लागत हए, कि ख्रीष्टको अनुग्रहमे तुमके बुलानबारेके यित्तो जल्दी छोडके तुम दुसरो सुसमाचार घेन लगरहे हौ।
7
वास्तवमे दुसरो सुसमाचार न हय, बलुक अइसे कोइ-कोइ हँए, जौन ख्रीष्टको सुसमाचारके भ्रष्ट पाणनके ढुणत् हएँ।
8
हमर प्रचार करो सुसमाचारके उल्टा हमके औ स्वर्गसे आनबारो दुत प्रचार करेहए तहुँ फिर बा आदमी श्रापित होबए।
9
हम अग्गुसे कहो जैसो मए फिर और हबए फिर कहत हौं, तुम जौन सुसमाचार ग्रहण करे हौ, बाके उल्टा और कोइ तुमके प्रचार करत् हए तव, बा श्रापित होबए।
10
का मए आदमीनको निगह ढुणत् हौं, कि परमेश्वर को ? औ का मए आदमीनके खुशी करन ढुँणत् हौं ? अगर मए और आदमीनके खुशी करन कोशिस कर रहो हौं तव मए ख्रीष्टको दास न हौं।
11
भैया, तुम जा जानओ करके मए चाहत हौं, कि मए प्रचार करो सुसमाचार आदमीको सुसमाचार न हय।
12
काहेकी मए जा कोइ आदमीसे पाओ न हौं, नत जा मोके कोइ सिखाइ रहए, बलुक येशू ख्रीष्टको प्रकाशनसे मए जा पाओ हौं।
13
यहूदी धर्म मे रहत अग्गुको मेरो जीवनके बारेमे तुम सुनेहौ, कैसे मए परमेश्वरको मण्डलीके भयानक रुपसे सताओ, और बाके नाश करनके ढुँणो।
14
हमर जातिमे, मिर नातेदारमे बहुतनसे मए यहूदी धर्ममे अग्गु बढो रहौं, और मिर पिता-पुर्खाको परम्परामे मए बहुत जोसिलो रहौं।
15
पर, मिर जलम् होनसे अग्गु मोके अलग करन बारो, और अपनो अनुग्रहसे मोके बुलान बारो परमेश्वरके,
16
जब अन्यजातिक बीचमे बाको प्रचार करन् अपन पुत्र मोए मे प्रकट करन् बाके खुशी लागो, तव मए कोइ आदमीसे सल्लाह न लौ,
17
न त मोसे अग्गु प्रेरितनके ठिन मए यरुशलेममे गओ, पर तुरन्त अरब देशमे गओ, और पिछु दमस्कसमे घुमके आओ।
18
तव तीन वर्ष पिच्छु केफाससँग भेट करन् मए यरुशलेम गओ, और उनके सँग पन्ध्र दिनतक बैठो।
19
तव प्रभुको भैया याकूबके बाहेक और कोइ प्रेरितनके मए न मिलो।
20
परमेश्वरको अग्गु मए तुमके विश्वास दिलान चाहत हौं, कि मए जो लिखोहौं बा झुठो न हय।
21
तव पिच्छु मए सिरिया और किलिकियाके इलाका घेन गओ।
22
बा बेरा यहूदीनके ख्रीष्टके मण्डलीके मिर मुहूँ न देखि रहएँ।
23
पर बे सुनी इकल्लो रहएँ, “अग्गु हमके सतान बारो आदमी जौन विश्वास नाश करन ढुणन डटो रहए, और हबए बहे विश्वास प्रचार करन डटो हए।”
24
बे मेरे कारन परमेश्वरके महिमा दैं।